“Ko Ha Founga Fakaofo ki hono Tekeʻi e Loto-Mafasiá,” Ki Hono Fakamālohia ʻo e Toʻu Tupú, ʻAokosi 2021, 6–7.
Ko Ha Founga Fakaofo ki hono Tekeʻi e Loto-Mafasiá
ʻOku fakamafasia nai ʻa e moʻuí kiate koe? Ko ha meʻa ʻeni ʻe ala tokoni.
ʻŪ tā fakatātā ʻa Corey Egbert
ʻI he taimi ʻoku ngali moveuveu ai e moʻuí, ko ha founga angamaheni ʻa e toitoi mo tafoki ʻo tokanga taha pē ki he ngaahi tefitoʻi fiemaʻu vivilí. Tautautefito kapau ʻoku tau ongoʻi mafasia pe loto-hohaʻa. Naʻe talanoa ʻa Palesiteni Tieta F. ʻUkitofa he taimi naʻá ne hoko ai ko e Tokoni Ua ʻi he Kau Palesitenisī ʻUluakí, fekauʻaki mo e meʻá ni ʻo fakatātā ia ki he ʻuluʻakaú mo e ngalulu ʻa e vakapuná he ʻeá. ʻI he ongo fakatātaá fakatouʻosi, ko e solovaʻanga lelei taha ʻi he taimi faingataʻá ko e māmālie hifo. ʻOku tupu māmālie ʻa e ʻuluʻakaú ʻi ha ngaahi taʻu lahi ʻo ʻikai ha ngaahi tūkunga lelei ke tupu ai. Ko e ʻuhinga ia ʻoku iiki ange ai ʻa e ngaahi foʻi fuopotopoto ʻokú ne fakaʻilongaʻi e tupu ʻa e ʻakaú. Ko e ʻuhinga tatau pē ia ʻoku holoki ai ʻe he pailate ʻo e vakapuná ʻa e vave e puna ʻa e vakapuná ʻi he taimi ʻoku fetōʻaki ai ʻa e ʻeá.
Naʻe akoʻi ʻe Palesiteni ʻUkitofa, “ʻOku mahino mo fakaʻaongaʻi ʻe he kakai potó ʻa e ngaahi lēsoni mei he tupu ʻa e ʻakaú mo e fetōʻaki ʻa e ʻeá.” “ʻOku nau tekeʻi ʻa e ʻahiʻahi ko ia ke kau he fakavavevave ʻo e moʻui fakaʻahó.”1
ʻOku ʻuhingamālie ʻa e māmālie ke fakasiʻisiʻi e hohaʻa ʻo e fakavavevavé. Ko ha meʻa ʻeni ʻe tokoni moʻoni, neongo he ʻikai ʻilonga ia he taimi te ke ʻuluaki fakakaukau ai ki aí:
ʻE ala tokoni ʻa hono fokotuʻu ha ngaahi taumuʻá ke ke māmālie hifo ai.
Ko e Ngaahi Lelei mo e Faingataʻa ʻo e Ngaahi Taumuʻá
ʻOku ʻi ai ha kakai ʻoku nau manako ke fokotuʻu ha ngaahi taumuʻa. ʻOku lahi ʻenau ngaahi fakaʻānauá pea ʻoku nau longomoʻui ke aʻusia ʻenau ngaahi taumuʻá. Ka ko ha niʻihi ʻoku nau ilifia mo fakamafasia ʻi he fokotuʻu ha taumuʻá, tautautefito ki he taimi ʻoku ʻikai tokamālie ai e moʻuí. ʻI he akonaki ʻa Palesiteni ʻUkitofá, mahalo ko e feinga ko ia ke fokotuʻu ha ngaahi taumuʻá ʻoku hangē ia ha toe meʻa ʻe taha he ʻikai pē ke ke lava ʻo mapuleʻí. “Fakamolemole atu! Kuo taimi ke kiʻi mālōlō, pea ʻoku ʻuhinga ia he ʻikai ha toe taumuʻa foʻou!”
Ka ko e konga ʻeni ʻoku mālié. Ko e taimi ʻoku feliliuaki mo moveuveu ai e ngaahi tūkungá, ko e taimi ia ʻe tokoni lahi taha ai kiate koe ʻa hono fokotuʻu ha ngaahi taumuʻá—pea ʻoku ʻikai ngata pē ʻi he tokoni ke “ikunaʻi e meʻa ʻoku fie maʻú.” ʻE ala tokoni ʻa e foʻi founga ki hono fokotuʻu mo tulifua ki he ngaahi taumuʻá ke ke ongoʻi ʻoku siʻi ange ai ho loto-hohaʻá kae lahi ange ho loto-nongá. ʻI heʻene peheé, ʻoku ʻi ai ha fanga kiʻi tokoni ke tau fakakaukau ki ai.
Fakasiʻisiʻi Māmālie e Moveuveú
Ko ha founga ʻe taha ke fakakaukau ki ai ko e fakaʻehiʻehi mei he feinga ke fai ha meʻa lahi he taimi pē ʻe tahá. Naʻe akonaki ʻe Palesiteni Henelī B. ʻAealingi ʻo e Kau Palesitenisī ʻUluakí: “Ko e tokolahi ʻo kitautolu kuo tau aʻusia ʻa e feinga ke fakatupulaki kitá. Kuo akoʻi mai he meʻa ne u aʻusiá ʻa e founga ʻoku fakalakalaka ai ʻa e kakaí mo e ngaahi kautahá: ko e feituʻu lelei taha ke te fekumi aí ko e fanga kiʻi liliu iiki ʻe lava ke tau fakahoko ʻi he ngaahi meʻa ʻoku tau fakahoko maʻu peé. ʻOku ʻi ai e mālohi ʻi he kātakí mo e toutou fakahokó.”2
Ko e ngaahi taumuʻa ʻoku fuʻu tāukakapá pe ʻe taimi lōloa kae toki aʻusiá ʻoku faʻa faingataʻa ke fakahoko ia he taimí ni. Ka neongo iá, ʻoku ʻi ai ha taimi lelei ʻoku fakatuʻamelie ke fakahoko ai e ngaahi taumuʻá, pea ʻoku fakafuofua ia ki he ʻaho ʻe 7 ki he 10.
Ko hono vahevahe ko ia hoʻo ngaahi taumuʻa ʻoku tāukakapá ki ha fanga kiʻi ngāue ʻe lava ʻo fakahoko ʻi ha uike pē ʻe tahá, ko ha fakakaukau lelei ia. Ko ha ʻuhinga ʻe taha, ʻokú ne toʻo ʻa e loto-tailiili koeʻuhí ko e ngaahi ʻamanaki kāfakafa ne tau fakamafasia ʻaki kitautolú. Pea ʻoku ʻi ai foki mo e loto-siʻi ʻoku tau faʻa ongoʻi he taimi ʻoku tau tōnounou aí. ʻE lava ʻe he vahevahe iiki ʻo e taimí ʻo fakasiʻisiʻi e ngaahi ongo ko iá.
Ko e uike ʻe tahá ko ha taimi nounou feʻunga foki ia maʻau ke ke vakai ai ki ha fakatuʻamelie ki he kahaʻú. ʻOkú ke ʻiloʻi ʻa e meʻa ʻokú ke fie maʻu ke fakahoko he taimi ní. Pea he ʻikai fuoloa, kuó ke ikunaʻi ha konga ʻe taha ʻo ha taumuʻa lahi ange. Pea mo ha toe konga ʻe taha. Ko e kamata pē ke ke fakalakalaká, ʻe hoko leva e ngaahi lavameʻa fakauiké ko ha tōʻonga moʻui pea ʻe faingofua leva ke hokohoko atu. Pea ko e taimi leva ia ʻe kamata ke hoko ai ha meʻa maʻongoʻonga.
Nonga Lahi Ange, Ngāue Iiki Ange
Tau pehē pē ʻoku ʻi ai haʻo taumuʻa lahi ki he kahaʻú hangē ko e tohi kole ki ha kolisi pe ʻunivēsiti. ʻE lava ke fakamafasia ki hatau niʻihi ʻa e ngaahi sitepu kehekehe ʻoku fie maʻu ke fakahoko ʻaki ʻení.
Ka ʻoku fie maʻu ke ke fakahoko pē ʻa e ngāue ʻoku siʻisiʻi feʻunga ki hono ikunaʻí. Mahalo ʻe ʻuhinga ia ke ke kamataʻi e taumuʻa ko ʻení ʻaki hano fili ha ʻapiako ʻe ua pe lahi ange ʻokú ke fie tohi kole ki ai.
Ko e meʻa pē ke ke fai ʻi he uike ka hoko maí ko e fili e ngaahi ʻapiako ko iá. Pea ʻi he uike hono uá leva, mahalo te ke fili ke fakatotolo ki he vahaʻataimi ʻoku fakahoko ai e tohi kole ki he ngaahi ʻapiako ko iá. Lolotonga e uike hono tolú, mahalo te ke talanoa ki ha faifaleʻi fakaako pe kamata fokotuʻutuʻu e ngaahi ʻēsei ki he tohi kole ki he ʻapiakó pe ngaahi fiemaʻu fakapepa kehé.
ʻE lava ke hokohoko atu ʻa e sīpinga lavameʻa ko ʻení pea ʻe vave ʻene fakalakalaká. ʻE ʻohovale pē kuo faingofua hono fakahoko e ngaahi meʻá. He ʻikai leva ke loko fakamanavahē ʻa e taumuʻa ko ia ne ngali faingataʻa he kamatá. Ko hono moʻoní, mahalo te ke ongoʻi fiefia!
ʻOku ʻaonga ʻa e founga ko ʻení ʻi ha faʻahinga taumuʻa pē, ʻo tatau ai pē pe ʻoku fakalaumālie, fakasōsiale, fakatuʻasino, pe fakaeʻatamai.
Fānaú mo e Toʻu Tupú pea mo Koe
Ko e konga lelei taha ʻi hono fokotuʻu ha taumuʻá ko hoʻo ʻosi maʻu pē ʻe koe ʻa e maʻuʻanga tokoni leleí ʻi hoʻo kató. ʻI hoʻo ngāue ʻaki ʻa e Fānaú mo e Toʻu Tupú ke ako mo tupulaki ʻo hangē ko e Fakamoʻuí, manatuʻi ʻoku malava ha faʻahinga taumuʻa lalahi pē—hangē ko e ngāue fakafaifekaú, lele ʻi ha malafoni pe ko hono ako ha lea fakafonua—ʻo vahevahe ki ha fanga kiʻi taumuʻa ʻoku uike ʻe taha pē hono fakahokó.
ʻOku iku ʻa e tupulaki lelei mo puleʻi ngofua ʻi he ngaahi tapa hoʻo moʻuí ʻoku potupotutataú ki ha nonga lahi ange, kae ʻikai ko ha loto-mafasia mo e fakatovave lahi ange. Te ke lava ʻo fakatuotuai hifo hoʻo loto-hohaʻá pea moʻui fiefia ange—ʻi he uike takitaha.