“Ngaahi Folofola ki he Ngaahi Fakatuʻupakē Fakalaumālié,” Ki Hono Fakamālohia ʻo e Toʻu Tupú, ʻAokosi 2021, 25.
Ngaahi Folofola ki he Ngaahi Fakatuʻupakē Fakalaumālié
Tā fakatātaaʻi ʻe Katy Dockrill
ʻI heʻeku tupu haké, naʻá ku fakaʻamu maʻu pē ke u maʻu ha fakamoʻoni ki he Tohi ʻa Molomoná. Ka naʻe faingataʻa kiate au ke u tui ko e kakaí, ngaahi meʻa naʻe hokó, mo e ngaahi mana ʻoku fakamatalaʻi aí ne moʻoni ia. Kuó u lotua fuoloa ki he Tamai Hēvaní ke Ne tokoniʻi au ke u ʻiloʻi ʻiate au pē ʻoku moʻoni ʻa e Tohi ʻa Molomoná.
ʻI ha Sāpate ʻe taha, naʻe akoʻi ʻe hoku ongo kaungāmeʻá ha lēsoni fekauʻaki mo e folofolá pea mo e founga ʻe lava ke ne tokoni ai ke tali ʻetau ngaahi fehuʻi loto-vivilí. Naʻá na tufa mai hamau laʻipepa takitaha naʻe fakahingoa ko e “Fika Fetuʻutaki ki ha Meʻa Fakatuʻupakē.” Naʻe ʻi ai ha ngaahi tūkunga kehekehe ʻe uofulu-mā-nima ai, pea ʻi he tafaʻaki ʻo e tūkunga takitaha naʻe ʻi ai ha potufolofola. Naʻe toʻoa ʻe he taha ʻo e ngaahi lainé ʻa ʻeku tokangá:
“Ki ha fakamoʻoni ki he Tohi ʻa Molomoná, vakai ki he Molonai 10:3–5.”
Naʻá ku fakaava hake ʻa e folofolá. ʻOku talamai ai te ke lava ʻo ʻiloʻi ʻoku moʻoni ʻa e Tohi ʻa Molomoná ʻi he mālohi ʻo e Laumālie Māʻoniʻoní ʻo kapau te ke lau ia pea lotua ia pea “ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”
Naʻe ongo kiate au ha tali faingofua kae mālohi. Kuo teʻeki ke u lau moʻoni ʻa e Tohi ʻa Molomoná ʻiate au pē! Ko e ʻuhinga ia naʻe ʻikai ai ke u maʻu ha fakamoʻoni ki aí.
ʻI heʻeku aʻu pē ki ʻapí, naʻá ku tangutu hifo ʻo kamata lau ʻeku Tohi ʻa Molomoná. ʻI heʻeku laukonga fekauʻaki mo e kakai ʻi he kuonga muʻá, naʻá ku ongoʻi ʻa e tupulaki ʻeku fakamoʻoní naʻe moʻoni ia pea naʻe hoko moʻoni ʻa e ngaahi maná kiate kinautolu.
Hili ha ngaahi māhina mei ai, ʻi heʻeku ʻosiki e Tohi ʻa Molomoná, naʻá ku ongoʻi ʻoku ou fonu ʻi he Laumālié. ʻOku ou ʻilo ne ʻomi ʻe he Tamai Hēvaní ʻa e “Fika Fetuʻutaki ki ha Meʻa Fakatuʻupakeé” ke tokoni kiate au ʻi he taimi ne u fie maʻu ai ha talí. ʻOku ou fakamālō kiate Ia he ʻaho kotoa pē koeʻuhí ko ʻeku maʻu ha fakamoʻoni maʻongoʻonga angé, pea ʻoku ou ʻilo te u lava ʻo ongoʻi ofi kiate Ia ʻi heʻeku lotu mo lau e folofolá.
ʻOku nofo ʻa e tokotaha naʻá ne faʻú ʻi ʻIutā, USA.