“Ko e hā e meʻa te u talaange ʻi he taimi ʻe ʻeke mai ai ʻe he kakaí pe ko e hā e ʻuhinga ʻoku ʻikai ke tau inu tī pe kofi aí?” Ki Hono Fakamālohia ʻo e Toʻu Tupú, ʻAokosi 2021, 31.
ʻAi Hangatonu
Ko e hā e meʻa te u talaange ʻi he taimi ʻe ʻeke mai ai ʻe he kakaí pe ko e hā e ʻuhinga ʻoku ʻikai ke tau inu tī pe kofi aí?
Ko e Lea ʻo e Potó ko e fono mo e fekau ia ʻa e ʻEikí ki he meʻa ʻoku tau fakahū ki hotau sinó (vakai, Tokāteline mo e Ngaahi Fuakava 89). Ko ha meʻa ʻe taha ʻokú ne talamai ke tau fakaʻehiʻehi mei he “inu velá” (Tokāteline mo e Ngaahi Fuakava 89:9). Kuo fakamatalaʻi ʻe Siosefa Sāmita mo e kau taki kehe ʻo e Siasí ʻoku ʻuhinga ʻeni ki he tií mo e kofí.
Neongo ʻoku ʻi ai e ʻaonga ʻo e Lea ʻo e Potó ki he moʻui leleí, ka ʻoku ʻikai ko e tefitoʻi ʻuhinga ʻeni ʻoku tau muimui ai ki aí. ʻOku tau muimui ki he Lea ʻo e Potó he kuo tau fai ha fuakava ke talangofua ki he ngaahi fekau ʻa e ʻEikí.
Kuo talaʻofa mai ʻe he ʻEikí ha ngaahi tāpuaki maʻongoʻonga ki hono tauhi e Lea ʻo e Potó, ʻo kau ai ha ngaahi tāpuaki fakalaumālie. Hangē ko ʻení, kuó Ne folofola ʻo pehē te tau maʻu ʻa e moʻui leleí, potó, mo e ngaahi fuʻu koloa mahuʻinga ʻo e ʻiló, kae pehē foki ki Heʻene maluʻí (vakai, Tokāteline mo e Ngaahi Fuakava 89:18–21).
ʻOku tokolahi ha kakai ʻi he māmaní ʻoku nau inu tī mo kofi, pea koeʻuhí ʻoku ʻikai ke tau inu iá ʻe hā ngali kehe ia kiate kinautolu. Mahalo ʻe talaatu ʻe ha kakai ʻe niʻihi ʻa e ʻuhinga ʻoku nau fakakaukau ai ʻoku moʻui lelei ʻa e tií, kofí, pe ngaahi meʻa kehe ʻoku tapui ʻe he Lea ʻo e Potó. Ka ko e tefitoʻi ʻuhinga ia ʻoku tau moʻui ʻaki ai ʻa e Lea ʻo e Potó he kuo tau fai ha ngaahi fuakava ke talangofua ki he ngaahi fekau ʻa e ʻEikí, pea te tau maʻu ha ngaahi tāpuaki ʻi heʻetau fai iá.