Ngaahi Fehuʻí mo e Ngaahi Talí

ʻE lava fēfē ke tokoniʻi au ʻe he ongoongoleleí ʻi he ongoʻi mafasiá?

Fakatokanga‘i ange: Kapau ʻe kei hokohoko atu ho loto-mafasiá ʻi he ngaahi uike lahi pe kamata ke ne fakahohaʻasi hoʻo moʻui fakaʻahó, fekumi ki ha tokoni mei he mātuʻa tauhi fānaú, ngaahi kaungāmeʻa falalaʻangá, pe ha mataotao ʻi he moʻui lelei fakaeʻatamaí.

“ʻE ʻiate kitautolu ʻa e ʻofa faka-ʻOtua mo e tokoni taʻetūkuá [‘a Sīsū Kalaisí] naʻa mo e taimi ʻoku tau faingataʻaʻia aí—ʻikai, ʻe iate kitautolu ia tautautefito ki he taimi ʻoku tau faingata‘aʻia aí.”

‘Eletā JeffreyR. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, konifelenisi lahi ʻo ʻEpeleli 2016 (Ensign pe Liahona, Mē 2016, 127).

ʻOua ʻE Foʻi

finemui

“Kapau ‘oku siʻisiʻi pē ho loto-mafasiá, feinga ke kumi ha ngaahi founga ke tokoniʻi ai ʻa e niʻihi kehé. Te ke lava foki ʻo feinga ke lau ʻa e ngaahi folofolá, lotu, mo ngāueʻi hoʻo ngaahi taumuʻa ki he polokalama foʻou ʻa e toʻu tupú. Kapau ko ha tuʻunga mamafa ia, te ke lava ʻo fekumi ki ha tokoni fakapalōfesinale. Kae mahu‘inga tahá, ʻoua naʻa teitei ngalo ʻoku ʻofa ʻa e Tamai Hēvaní ʻiate koe. Kapau te ke lotua ha tokoni meiate Ia, te ke maʻu ha tali.”

RyanB., ta‘u 11, ʻAlesona, USA

ʻOku ʻIkai Ke Ke Tuenoa

talavou

“Te tau lava kotoa ʻo maʻu ha ʻamanaki lelei ʻo fakafou ʻi he Tamai Hēvaní, Sīsū Kalaisi, mo e kakai kehé. ʻOku akoʻi kitautolu ʻe he ʻOtuá ke tau maʻu ʻa e tuí ʻi he taimi ʻoku tau lotu mo tautapa ai fekauʻaki mo ʻetau ngaahi palopalemá. ʻOku tokoni ʻa e folofolá ke mahino lahi ange kiate kitautolu ʻa Sīsū Kalaisi pea mo e founga naʻá Ne ikunaʻi ai ʻa e ngaahi faingataʻa lahi pehē faú. ʻOku mahuʻinga foki ke talanoa ki ha taha, hangē ko ha mātuʻa pe kaungāmeʻa falalaʻanga, ʻa ia te ne lava ʻo tokoniʻi kitautolu ke tau ʻilo ʻoku ʻikai ke tau tuenoa.”

ChristianV., taʻu 18, Siuāuā, Mekisikou

Te Ne Fakafiemālieʻi Koe.

finemui

“‘I he taimi ʻoku ou ongoʻi loto-mamahi aí, ʻoku ou manatuʻi ʻoku ou maʻu ʻa Sīsū Kalaisi, ʻa ia kuó Ne ongoʻi e meʻa kotoa pē kuó u ongoʻí. ʻOku pehē ʻi he ʻAlamā 7:11“Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.” ʻOkú Ne ʻafioʻi moʻoni ʻa e founga ke tokoniʻi ai koé koeʻuhí he kuó Ne ongoʻi ʻa e meʻa tatau. ʻI hoʻo tafoki kia Sīsū Kalaisí, te Ne fakafiemālieʻi koe.”

Makayla F., taʻu 17, Kalefōnia, USA

Faʻa Kātaki ʻiate Koe pē.

finemui

“Faʻa kātaki mo angalelei kiate koe. Fokotu‘u ha ngaahi taumuʻa faingofua ke ikunaʻi fakaʻaho, hangē ko e lotú, fakalaulaulotó, mo hono fakahoko ha meʻa te ke fiefia aí. Hili ia peá ke kātaki ki he ngataʻanga ʻo e ʻaho takitaha. ʻOku ʻafioʻi ʻe he Tamai Hēvaní ho tuʻungá pea ʻokú Ne tatali kiate koe ʻi Hono puleʻangá. Nofo ma‘u ʻi hoʻo tuí, pea ʻe maʻamaʻa ʻa e kavengá. ʻOku moʻoni ia. ʻOku ou ʻiloʻi ia.”

Isabelle F., taʻu 21, Lio ti Senelo, Palāsila

Fakakaukau ki he Ngaahi Tāpuakí

finemui

“Ko e taimi kotoa pē ʻoku ou ongoʻi mafasia pe loto-mamahi aí, ʻoku ou saiʻia ke fakamanamanatu ʻa e ʻaho pe uike mo fakakaukau ki he ngaahi meʻa kuo tāpuekina ʻaki au ʻe he ʻOtuá. ʻI he taimi ʻoku ou fakahoko ai iá, ʻoku ou ongoʻi ha nonga mo ha fiefia lahi ange koeʻuhí ʻoku tokoni ia ke u ʻiloʻi ʻoku ʻafioʻi au ʻe he Tamai Hēvaní.”

Taylee L., taʻu 16, ʻIutā, USA

Ngaahi Momeniti Ta‘e-ʻamanekiná

“Ne hoko e taʻu 2020 ko ha taʻu faingataʻa ki he tokotaha kotoa pē—pea fakatupu ha ngaahi ongo ʻo e loto-mafasia ʻi he nofo mavahevahe ʻo fuʻu fuoloá. Ka ʻoku ou ʻilo kapau te tau vakai ki he ʻafioʻanga ʻo e ʻEikí ʻi heʻetau lotu mo ako e folofolá, te Ne ʻi ai maʻatautolu. Mahalo he ‘ikai ke Ne ʻi ai ʻi he taimi ʻoku tau ʻamanaki ki aí, ka te Ne ʻi ai maʻatautolu ʻi Hono taimi, ʻa ia ko e taimi lelei tahá. ‘I he ngaahi momeniti taʻe-‘amanekina ko iá, te tau fakatokangaʻi ʻoku ʻiate kitautolu ʻa e ʻOtuá mo ʻEne ʻofá.”

Martin N., taʻu 18, Siuāuā, Mekisikou

Manatuʻi e Ngaahi Lea Langaki Moʻuí

“Taimi ‘e niʻihi ʻoku tau ongoʻi hangē ʻoku ʻikai ke ʻi ai haʻatau taumuʻá. Hokohoko atu e tui ki he ongoongoleleí. Naʻa mo e taimi ʻoku tau ongoʻi ai hangē he ʻikai ke tau lava ʻo lotú, ka te tau lava ʻo tūʻulutui ʻi ha ngaahi miniti siʻi pē. Te tau lava ʻo fanongo ki he ngaahi folofolá pe ko ha pōpoaki mei he Siasí. Te tau lava ‘o manatuʻi ʻa e ngaahi lea ‘o ha himi pe ako maʻuloto ha kupu‘i lea ʻoku nau fakamanatu mai kiate kitautolu ‘a e loto-toʻa ‘oku tau maʻú. Ne u ako ma‘uloto ha kupuʻi lea ‘a ʻEletā Sefilī R. Hōlani ‘o e Kōlomu ʻo e kau ‘Aposetolo ʻe Toko Hongofulu Mā Uá ‘okú ne ʻomi ha ʻamanaki lelei kiate au: ‘Ko hono lelei ʻo e ongoongoleleí he ʻoku tāpuakiʻi kitautolu ʻi heʻetau feingá, neongo kapau ʻoku ʻikai ke tau lavaʻi maʻu pē ia.’ (konifelenisi lahi ʻo ʻEpeleli 2016 [Ensign pe Liahona, Mē 2016, 125–26).”

Giani V., taʻu 22, Kotoupa, ‘Asenitina

Manatuʻi ʻEne ʻOfá

“Ko e ongoongolelei ʻo Sīsū Kalaisí ko ha ongoongolelei ia ʻo e ʻofa. Naʻe ikunaʻi ʻe Sīsū Kalaisi ʻa e māmaní koeʻuhí ko ʻEne ʻofa ʻiate kitautolú. Koeʻuhí ko e feilaulau ko iá, ʻoku ou ʻilo ʻoku mahino kiate Ia ʻa e meʻa kotoa pē ʻoku ou fouá. ʻI he Mātiu 11:28, ʻoku fakaafeʻi kitautolu ʻe he Fakamoʻuí: ‘Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.’ Ko ʻEne ʻofá ʻa e meʻa ʻoku tau fie maʻu lahi taha ʻi he ngaahi taimi ʻo e faingataʻaʻiá.”

Lyvia S., taʻu 17, Palana, Palāsila

Ko e Hā Hoʻo Fakakaukaú?

Kuo te‘eki ai ke u maʻu ha ngaahi a‘usia fakalaumālie mālohi. Te u vahevahe fēfē nai ʻeku fakamoʻoní?

ʻOmi hoʻo talí mo e laʻitaá kimuʻa ʻi he ʻaho 15 ʻo Sepitema, 2021.

ʻAlu ki he ftsoy.ChurchofJesusChrist.org, lomiʻi ʻi he “Submit Your Work.” Hū ʻaki hoʻo ʻAkauni ʻi he Siasí pea fili leva ʻa e “Ki Hono Fakamālohia ʻo e Toʻu Tupú” ʻi lalo ʻi he “Fili e Makasiní.” Lomiʻi ʻi he “Tānaki Atu ha Faile” ke fili hoʻo failé mo e ʻū taá, pea lomiʻi ‘i he “Fakahū” ke upload mo ʻomi kiate kimautolu hoʻo failé. Pe ‘īmeili mai kiate kimautolu ʻi he [e-mail].

ʻE lava ke liliu ʻa e ngaahi talí koeʻuhí ko e lōloa feʻungá pe mahinó.