“O se Meafaigaluega Ofoofogia e Tetee ai le Atuatuvale,” Mo le Malosi o le Autalavou, Aok. 2021, 6–7.
O se Meafaigaluega Ofoofogia e Tetee ai le Atuatuvale
Pe o faaatuatuvaleina oe e le olaga? O se mea lenei e ono fesoasoani.
Ata na tusia e Corey Egbert
A lagona ua vevesi le olaga, o se fuafuaga masani le oso e lafi ma see atu i se tulaga saogalemu. Aemaise lava pe afai o loo tatou lagonaina le atuatuvale po o le popole. Sa talanoa Peresitene Dieter F. Uchtdorf, a o avea ma Fesoasoani Lua i le Au Peresitene Sili, e uiga i lenei mea e faatatau i tulaga o laau ma le salutulutu o vaalele. I faataitaiga uma e lua, a oo mai taimi faigata, o le fofo sili lava o le faalemu. O laau e ola telegese i le tele o tausaga e aunoa ma ni tulaga lelei. O le mafuaaga lena e laiti ai nisi o mama o le tuputupu ae. E faapena foi, o pailate o vaalele e faaitiitia le saoasaoa pe a faasolo ina salutulutu le ea.
“O le tagata atamai e malamalama ma faaaoga lesona mai li’o o laau ma faafitauli o le ea. “Latou te tetee i le faaosoosoga o le lāvea i totonu o le nanati fitivale o le olaga i aso uma.”1
O le faia o laasaga e faaitiitia ai le saoasaoa o le faanatinati o se faiga poto tele. O se mea lenei e fesoasoani tele, e ui atonu e le manino lelei i le tepa i ai i le taimi muamua:
O le setiina o sini e mafai ona fesoasoani ia te oe e faalemu ai mea uma.
O Taimi Lelei ma Leaga o Sini
O nisi tagata e fiafia e faatutu ni sini. E i ai a latou miti tetele ma le tele o uunaiga ina ia oo atu iina. Ae o isi e vaai i le faatutuina o sini e taufaamatau ma atuatuvale, ae maise lava pe a le o sologa lelei le olaga. I le mafaufau ai i le fautuaga a Peresitene Uchtdorf, o le taumafai e faatutu ni sini, atonu e ono lagona e pei o se tasi lea o mea e te le mafai lava ona puleaina. “Faamalie atu, lalolagi! Ua oo i le taimi e faifai lemu ai, o lona uiga e leai ni sini fou!”
Ae, o le vaega malie lenei. Pe a faafuasei ma vevesi mea uma, o le taimi tonu lava lena e mafai ai ona sili ona fesoasoani ia te oe le faatutuina o sini—ae le na o upu o le “faia o ni mea.” O le faagasologa tonu lava o le setiina ma le tulimatai atu i sini, e mafai ona fesoasoani ia te oe e lagona ai le faaitiitia o le popole ae sili atu le filemu. O lena tala, e i ai nai vaega ia manatua pea.
Faaitiitia le Vevesi i Sia Vaega ma Sia Vaega
O se tasi o fuafuaga ia manatua pea o le aloese lea mai le taumafai e soona fai ni mea se tele i le taimi e tasi. Na aoao mai Peresitene Henry B. Eyring o le Au Peresitene Sili: “O le toatele o i tatou sa i ai ni aafiaga i taumafaiga o le faaleleia o le tagata lava ia. O lo’u aafiaga na aoaoina ai au e uiga i le auala e faaleleia atili ai tagata ma faalapotopotoga: o le nofoaga sili e tagai ai, o ni suiga laiti e mafai ona tatou faia i mea tatou te faia soo. E i ai le mana i le mausali ma le fai soo.“2
O sini e tetele tele pe o le a umi se taimi e faataunuu ai, e tele lava ina lagona ai le faigata e faatino ai iinei ma le taimi nei. Ae peitai, o loo i ai se tulaga manaia i taimi faatulagaina mo sini, ma e fetaui tonu lava i le 7 i le 10 aso.
O le faaitiitia o au sini tetele i le pe tusa ma se tai vaiaso e tele e aoga tele. Mo se tasi mea, na te aveesea le atuatuvale o faamoemoega tetele o le lofituina lea tatou te tuuina i o tatou luga. Ma e i ai le lotovaivai e tele lava ina tatou lagonaina pe a tatou pauu. O taimi faatulagaina laiti e mafai ona faaitiitia ai na lagona.
O le vaiaso e i ai foi se taimi puupuu mo oe e vaaia ai le malamalama i le faaiuga o le ana. Ua e iloa le mea e tatau ona e faia iinei ma le taimi nei. Ma ae e te lei iloaina, ua uma ona e faia se vaega se tasi o se sini e tele atu. Sosoo ai ma le isi vaega. O le taimi lava e amata ai ona e agai i luma, o nai vaiaso faamanuiaina e liua i ni taimi fiafia. Ma o iina e amata ai ona tupu se mea mamana.
Filemu Sili Atu, Nai U Laiti
Faapea la o loo i ai sau sini tele i luma atu o oe e pei o le talosaga mo le kolisi po o le iunivesite. Mo nisi o i tatou, o le tele o laasaga e manaomia e lenei mea e mafai ona lagona ai le lofituina.
Ae tau lava ina e taulimaina se vaega se tasi i le taimi. Mo lenei sini, o le mea lena e mafai ona amata i le filifili ia le itiiti ifo i le lua ni aoga e te manao e talosaga i ai.
O le isi vaiaso e sosoo ai, pau le mea e te faia o le faailoa o na aoga. Ma, i le vaiaso lona lua, atonu e te filifili e saili le faasologa o taimi o talosaga mo le kolisi mo na aoga. I le vaiaso lona tolu e mafai ona e talanoa i se faufautua faaleaoaoga pe amata ona otootoina talatusia o le talosaga mo le kolisi po o isi mea tusitusia e manaomia.
O lenei malosiaga e mafai ona vave ona faaauau ma ausia. E faafuasei lava ona lagona o mea ua mafai ona faia. O lena sini ua leva ona lofituina, ua le o toe taufaafefe tele. O le mea moni, atonu e te lagona le fiafia!
E galue lenei faagasologa i ni sini tetele, e tusa lava pe faaleagaga, faaagafesootai, faaletino, pe faaleatamai.
Tamaiti ma le Autalavou ma Oe
O le vaega sili ona lelei e uiga i le faatutuina o sini e faapea, o lena ua i ai sau punaoa maoae i le taimi e te manaomia ai. A o e faaaogaina le Tamaiti ma le Autalavou e aoao ai ma tuputupu ae e pei ona faia e le Faaola, ia manatua o soo sau sini lapoa lava atonu o le a i ai—e pei o le auauna atu i se misiona, tamoe i se malafoni, po o le aoaoina o se gagana—e mafai ona vaevae i ni laasaga laiti, e taitasi le vaiaso le uumi.
O le tumau ma le pulea o le tuputupu ae i vaega paleni o lou olaga, e oo atu ai i le filemu sili atu, ae le o le atuatuvale sili atu ma le faanatinati. O le a mafai ona e faifai lemu i le faateleina o lou taulai atu ona olioli teisi ai lea i le olaga—i le vaiaso e tasi i le taimi.