O le Perisitua a le Atua

Saunia e le Au Peresitene Aoao o Tamaitai Talavou

O mea e tatau ona iloa e talavou uma e uiga i le perisitua ma lo latou sootaga i ai.

Pe na e matauina le fenumiai lea e mafai ona i ai pe afai e lua ni auala e faaaoga ai se upu e tasi? Mo se faataitaiga, i le faaPeretania o le upu earth[lalolagi] e faatatau uma i le paneta o loo tatou nonofo ai ma le palapala i lalo ifo o o tatou vae. E sao uma lava, ae o le uiga o lau tala pe a e faaaogaina le faaupuga e faalagolago lea i le mea o loo e talanoa i ai i le taimi lena. Ina ia faateleina lo latou fenumiai, o lona uiga o le earth [lalolagi] o lo tatou paneta, e aofia ai foi ma le manatu i le dirt [eleele], aua o loo i ai le eleele i luga o le paneta.

O le faamatalaina o le upu Perisitua

O se tasi o faaupuga tatou te faaaogaina i le Ekalesia i auala e lua o le perisitua. O le faaupuga ua faasino i le mana atoa ma le pule a le Atua. Ae peitai, tatou te faaaogaina foi le perisitua i se auala e faatapulaa atu —e faatatau i le “o le mana ma le pule lea e tuuina mai e le Atua i e ua faauuina e umia le perisitua e galulue ai i mea uma e tatau ai mo le faaolataga o fanau a le Atua.”¹

O le perisitua na faaee atu i luga o le tagata e le o le mana uma o le Atua. O le siata lenei ua faaali atu ai lenei manatu.

I le siata lenei e te vaaia ai nisi o faataitaiga o le mana o le Atua, lea e le iu ma e leai foi ni tuaoi. I totonu o lena mea, ua outou vaai ai foi i faataitaiga o le mana ma le pule o le perisitua a le Atua e Na te faaee atu, pe tuuina mai i, ni alii agavaa e galulue ai i le Ekalesia a Keriso.

Faataitaiga o le Pule o le Perisitua i Lou Olaga

O faamanuiaga uma o le perisitua ua avanoa mo afafine ma atalii faapelepele uma o le Tama Faalelagi. O le lisi lona lua ua na o le faatusa o na faamanuiaga e oo mai ia te oe e ala mai i se tasi o loo umia ki o le perisitua pe ua faaee foi i ona luga le pule o le perisitua.

O le faatulagaga lea ua faavaeina e le Atua mo le faatulagaina ma le taitaiga o Lana Ekalesia i le lalolagi. O isi faataitaiga o le pule o le perisitua a le Atua e aofia ai se peresitene o le korama a tiakono po o aoao o e ua i ai ki e taitai ai le galuega a lana korama, o faamanuiaga a se tama e tuuina mai i se aiga, ma sauniga ma feagaiga o le malumalu.

Alii, Tamaitai, ma le Perisitua

E ui lava o le faauuina i le tofi o le perisitua e tuuina atu i na o alii, na faamatala mai e Peresitene Dallin H. Oaks, le Fesoasoani Muamua i le Au Peresitene Sili, se mataupu faavae taua: “O le perisitua o se mana ma le pule paia a le Atua e umia ona ua faatuatuaina, e faaaoga mo le galuega a le Atua mo le manuia o Ana fanau uma. O le Perisitua e le o i latou ua faauuina i se tofi o le perisitua po o i latou o ē faaaogaina lana pule. O alii o loo umiaina le perisitua e le o le perisitua. … E le tatau ona tatou faasino atu i tagata ua faauuina o ni perisitua.“²

E ui lava e le faauuina tamaitai i le perisitua, sa faamalamalama mai e Peresitene Russell M. Nelson, “a vaetofia loa oe e auauna atu i se valaauga i lalo o le taitaiga a se tasi o loo umia ki o le perisitua … ua tuuina atu ia te oe le pule o le perisitua e galue ai i lena valaauga.”³ O nisi o faataitaiga o lenei mea e aofia ai au peresitene o vasega a tamaitai talavou, o tamaitai faifeautalai faamisiona o loo talaiina le talalelei, o taitai o uarota ma siteki ua vaetofia e aoao atu ma taitai, ma tagata e galulue i sauniga i le malumalu.

O le Mana o le Perisitua e Faamanuiaina Tagata Uma

O faamanuiaga o loo maua e outou alii ma tamaitai talavou e ala i feagaiga tou te osia i le papatisoga ma feagaiga o le a outou osia i le malumalu. E tusa lava pe leai se tasi e umia le perisitua i lou aiga, e mafai lava ona faamanuiaina oe i le mana o le perisitua a le Atua i lou olaga pe a e tausia feagaiga na e osia ma Ia (tagai i le 1 Nifae 14:14).

A o tatou ola e tusa ai ma a tatou feagaiga, tatou te maua faamanuiaga e faamalosia ma faamanuiaina ai i tatou. Matou te valaaulia outou e mafaufau loloto i faamanuiaga o le perisitua i o outou olaga—o faamanuiaga e oo mai ona o le mana o le perisitua e le iu o le Atua ma i latou e patino atu e ala i le pule o le perisitua lea e faaeeina ma faamatuu mai i le Ekalesia a le Atua.