“O le Mana o le Faaleatua e Ala i Sauniga ma Faamanuiaga o le Perisitua,” Mo le Malosi o le Autalavou, Aok. 2021, 10–13.
O le Mana o le Faaleatua e Ala i Sauniga ma Faamanuiaga o le Perisitua
O sauniga nei e fa o le perisitua ma faamanuiaga e valaaulia ai le mana o le Atua i lou olaga.
I a’u femalagaaiga o se sui o le Korama a Aposetolo e Toasefululua, ou te feiloai i le autalavou i le lalolagi atoa. O le toatele o i latou e tauivi ma ni atugaluga moni: “Pe o le a fesoasoani mai le Atua ia te au? Pe o le a Ia taitaia lou olaga? E mafai faapefea ona ou maua le fesoasoani, taitaiga, ma le filemu ou te manaomia?”
A’u uo talavou pelē, o le a fesoasoani le Atua ia te outou, ma ua Ia tu saunia e faamanuia outou. I le avea ai ma o tatou Tama alofa, ua Ia tuuina mai ia i tatou sauniga e fesoasoani tatou te lagona ai Lona mana i o tatou olaga—le mana o le faaleatua.
Mafaufau i lenei mau: “O ona sauniga … , ua faaalia ai le mana o le faale-atua” (Mataupu Faavae ma Feagaiga 84:20).
O sauniga ma faamanuiaga nei e fa e valaaulia ai lena mana i lou olaga.
1. Mana o le Faamanatuga
Muamua, e mafai ona tatou lagonaina le mana o le faaleatua e ala i le faamanatuga. A tatou agai atu i le faamanatuga o se vaega taua o lo tatou vaiaso, e faafouina ai i tatou ma fesoasoani ia i tatou e saunia mo aso e ono o i luma atu.
O le faamanatuga e faamalosia ai a tatou taumafaiga ia salamo e le aunoa. A o tatou ola amiotonu ma taumafai e manatua pea le Faaola, o le a tatou maua se faateleina o le faatuatua i le Alii o Iesu Keriso. Tatou te maua le malosi, e ala ia te Ia, e suia ai o tatou olaga mo le lelei sili atu.
Pe a tatou tagofia le faamanatuga ma taumafai ia avea atili e faapei o lo tatou Faaola, o le a amata ona tuputupu ae ia uiga lelei i totonu o i tatou. E masani ona amata ona tatou alolofa atili i tagata ma faaitiitia le faamasinoina o i latou. E telegese lo tatou ita, ma ua tatou mumusu e savavali i faaosoosoga.
O le manatuaina ma le tausia o a tatou feagaiga ma le Alii, e pei ona tatou faia pe a tatou tagofia le faamanatuga, Na te folafola mai ai ia i tatou o le a faatasi pea Lona Agaga ma i tatou (tagai i le Mataupu Faavae ma Feagaiga 20:77, 79)—e le na o le aso, ae o taimi uma.
2. Mana i le Malumalu
Lona lua, e mafai ona tatou maua le taitaiga ma le mana mai le Atua e ala i le auai i le malumalu. E i ai le mana i le malumalu, e tusa lava pe e te lei maua faaeega paia. O le maota moni lava o le Alii.
O le auala sili e agai atu ai i le malumalu o le saunia muamua lava. Ole atu i le Tama Faalelagi e fesoasoani ia te oe e fausia lou faatuatua ia te Ia ma Lona Alo. Ole atu ia te Ia e fesoasoani atu ia e iloa o loo i ai o Ia iina.
E le mafai ona e faamalosia ni lagona faaleagaga po o ni aafiaga. E masani lava, o le a latou o mai pe afai e te le o faamoemoeina i latou. O se tasi o uunaiga sili ona faifai pea ou te mauaina i le malumalu o le, “Ia filemu ma ia iloa o Au o le Atua” (Salamo 46:10; tagai foi Mataupu Faavae ma Feagaiga 101:16).
E faateleina le mana o le faaleatua i totonu o le malumalu pe a e faatinoina sauniga mo tagata ua maua igoa e ala i le galuega o talafaasolopito o aiga. E tele taimi sa ou lagonaina ai le mana ma le faatasi mai o i latou sa ou faia galuega i le malumalu.
A o e saofaga atu i lenei galuega paia, o le a faateleina lou malamalama ma lou faatuatua i le Faaola. O le a e mauaina se molimau e sili atu ona patino e faapea o loo faaauau pea le olaga i tua atu o le veli.
E le o tagata uma e nonofo latalata i se malumalu ina ia auai soo. O le a silafia e le Alii lou alofa mo le malumalu e tusa lava pe e te mamao ese. Ia tuu se ata o le malumalu i lou fale, ma saili ma le filiga i latou o loo manaomia ia sauniga.
3. Mana i Lou Faamanuiaga Faapeteriaka
O le mea lona tolu o le a valaaulia ai le mana o le Atua i lou olaga o lou faamanuiaga faapeteriaka. E tatau ona mafaufau talavou uma e uiga i le mauaina o se faamanuiaga faapeteriaka. O se faafanua mamana mo lou olaga.
O faamanuiaga faapeteriaka e le tautatala i vaaiga uma o o tatou olaga. Ae latou te faamamafaina mai ni lapataiga eseese, faamanuiaga, ma folafolaga mo tagata taitasi ma saunia le taitaiga taua mai le Tama Faalelagi.
E oo mai foi le mana e ala i sauniuniga. Sa faasoa mai e se tasi o au fanau tama laiti talu ai nei ia te au sa ia saunia mo lona faamanuiaga faapeteriaka. E lei i ai se mea na uunaia ai o ia e ona matua—o lana lava taumafaiga. Sa manao o ia i le taitaiga o le a aumaia ai. Sa faagaeetia au i lana sauniuniga faaleagaga.
E taua foi le i ai i le tulaga sao faaleagaga o le mafaufau e maua ai lou faamanuiaga faapeteriaka. E te manao ia maua lou faamanuiaga pe a e toafilemu. O se faamanuiaga faapeteriaka o se meaalofa sili ma e aumaia ai le mana o le faaleatua i lou olaga.
4. Mana i Faamanuiaga Faaleperisitua
Ma le mea mulimuli, ou te fia faamanatu ia i tatou uma le mana e mafai ona tafe mai i o tatou olaga e ala i faamanuiaga faaleperisitua i le au perisitua agavaa.
Ou te iloa o nisi taimi atonu e te lagona ai le le manao e fesili mo se faamanuiaga mai lou tama, ma o nisi taimi atonu e lagona ai e tama le mumusu e tuuina atu se faamanuiaga. Atonu latou te lagonaina le le saunia, ae o le a faamanuiaina i latou e le Alii i a latou taumafaiga.
Ou te uunaia outou, afai o ia te outou se tama o loo umia ma le agavaa le perisitua, ia alu faalilolilo ia te ia, ma fai atu, “Tama, ou te manao i se faamanuiaga. Afai e te manao i se vaiaso po o se masina e saunia ai lou mafaufau ma le agaga, e mafai ona ou faatali. Ae e mafai ona ta fuafua i ai?”
Afai e le mafai e lou tama ona tuuina atu ia te oe se faamanuiaga faaleperisitua, talanoa i ou matua e uiga i le fesili atu i se isi tagata o lau uarota e te alofa ma faaaloalo i ai. O le a e maua le malosi ma le mafanafana mai lo tatou Tama Faalelagi e ala i vavega i aso uma o faamanuiaga o le perisitua.
Faamalologa, saunia e J. Kirk Richards
O Le a E Lagonaina le Mana o le Atua i Lou Olaga
A’u uo talavou e, o nei sauniga e fa o le perisitua o le a oo mai ai le mana o le faaleatua i lou olaga. O le a e iloa, e pei ona ou faia, o Iesu o le Keriso, o le Alo o le Atua, ma o mea lelei uma e mai ia te Ia. Ou te molimau atu e mafai ona tatou maua lena mana e ala i le auai i le faia o le amiotonu i Ana sauniga o le perisitua.