“Tamaitai Talavou ma le Perisitua,” Mo le Malosi o le Autalavou, Aok. 2021, 14–15.
Sau, Mulimuli Mai ia te A’u
Tamaitai Talavou ma le Perisitua
Atapue mai le Getty Images
E ofoofogia le perisitua a le Atua. Afai o oe o se tamaitai talavou, atonu e faigata ona malamalama i le auala e faatatau ai ia te oe. O fea la e te amata ai?
O nisi nei o fesili masani atonu o ia te oe, ma ni tali:
O le mea muamua lava, o le a le perisitua?
“O le perisitua o se mana ma le pule paia a le Atua e umia ona ua faatuatuaina, e faaaoga mo le galuega a le Atua mo le manuia o Ana fanau uma.”1
O le perisitua o se meaalofa mai le Tama Faalelagi e faamanuia ai Ana fanau uma o le tamaitai ma le alii.
O le a le pule o le perisitua?
“O le faatagaga e fai ma sui o le Atua ma galue i Lona suafa.”2 E faaaogaina i lalo o le taitaiga a i latou o i ai ki o le perisitua. E mafai e alii agavaa ona maua le pule o le perisitua e ala i le faaeeina atu ma le faauuina. E faatagaina foi e lenei pule ia tagata uma o le Ekalesia e galulue i valaauga ma tofiga, mo se faataitaiga, pulefaamalumalu i fonotaga, aoao atu, ma le mauaina o faaaliga mo na valaauga ma tofiga.
O a ki o le perisitua?
“O ki o le perisitua o le pule lea e taitai ai le faaaogaina o le perisitua e fai ma sui o fanau a le Atua. O le faaaogaina o le pule uma o le perisitua i le Ekalesia e taitaia e i latou o ē umia ki o le perisitua (tagai i le Mataupu Faavae ma Feagaiga 65:2).”3
O le a le eseesega i le va o le pule o le perisitua ma le mana o le perisitua?
O le mana o le perisitua i lou olaga patino e faafaigofieina:
-
Taitaiga mai le Agaga Paia.
-
Faaaliga mo oe lava ia.
-
Logolelei.
O le pule o le perisitua e mafai ai ona e:
-
Faatino ou valaauga.
-
Pulefaamalumalu i fonotaga.
-
Maua faaaliga i valaauga.
Pe maua ea e tamaitai talavou le mana o le perisitua?
Ioe. “O le mana o le perisitua o le mana lea e faamanuiaina ai e le Atua Ana fanau. E tafe atu le mana o le perisitua a le Atua i tagata uma o le Ekalesia—tamaitai ma alii—pe a latou tausia feagaiga latou te osia ma Ia. E osia e tagata o le ekalesia nei feagaiga pe a latou mauaina sauniga o le perisitua. (Tagai i le Mataupu Faavae ma Feagaiga 84:19-20.)”4
Pe mafai e tamaitai talavou ona faaaoga le pule o le perisitua?
I ni tulaga faapitoa, ioe. Na tau atu e Peresitene Russell M. Nelson i tamaitai talavou o le Ekalesia: “Ina ua vaetofia oe e auauna atu i soo se valaauga i lalo o le taitaiga a se tasi e umia ki o le perisitua—e pei o lou epikopo po o le peresitene o le siteki—ua tuu atu ia te oe le pule o le perisitua e galue ai i lena valaauga.”5
Pe o umia e tamaitai talavou ia ki o le perisitua?
Leai. O Iesu Keriso o loo umiaina ki uma o le perisitua. I lalo o Lana taitaiga, ua tuuina atu ai i na o alii e i ai valaauga patino. Mo le autalavou, e umia e peresitene o korama a tiakono ma aoao ia ki.
E maua avanoa o tamaitai talavou mo le perisitua.
E ui atonu e te le umia ki o le perisitua, ua ia te oe le pule e galue ai i ou valaauga aua sa vaetofiaina oe i lalo o le taitaiga a se tasi o i ai ki o le perisitua. Ua faamanuiaina oe i le mana o le Atua a o e auauna atu i isi ma maua le taitaiga faaleagaga. Ua ia te oe foi le avanoa e maua ai faamanuiaga uma o le perisitua ua tuuina mai e le Tama Faalelagi ia i tatou.
Afai e te le o malamalama i mea uma e uiga i le perisitua, aua e te popole. A o e suesue i tusitusiga paia ma suesue i upu a taitai o le Ekalesia o ona po nei, o le a fesoasoani le Alii ia te oe e aoao atili e uiga i lou mauaina o le mana o le perisitua, le pule o le perisitua ma faamanuiaga faaleperisitua.