“Tusitusiga Paia mo Faalavelave Faafuasei Faaleagaga,” Mo le Malosi o le Autalavou, Aok. 2021, 25.
Tusitusiga Paia mo Faalavelave Faafuasei Faaleagaga
Ata na tusia e Katy Dockrill
Ao tuputupu ae, sa ou manao lava i taimi uma i se molimau i le Tusi a Mamona. Ae sa faigata ia te au ona talitonu o tagata, o mea na tutupu, ma vavega o loo ia faamatalaina o ni mea moni. Mo se taimi umi sa ou tatalo ai i le Tama Faalelagi e fesoasoani mai ia ou iloa mo au lava e moni le Tusi a Mamona.
I se tasi Aso Sa, sa aoao ai e a’u uo e toalua se lesona e uiga i tusitusiga paia, ma le auala e mafai ona latou fesoasoani ai e tali a tatou fesili e sili ona manaomia vave ni tali. Na la tuuina mai ia i matou taitoatasi se pepa na faaautuina “Numera Fesootai o Faalavelave Faafuasei.” Sa i ai ni tulaga eseese e lua-lima, ma e sosoo ai ma tulaga taitasi sa i ai se mau. Sa ou gauai atu i se tasi o laina:
“Mo se molimau o le Tusi a Mamona, tagai i le Moronae 10:3–5.”
Sa ou sueina le mau. E tau mai ia te oe e mafai ona e iloa e moni le Tusi a Mamona e ala i le mana o le Agaga Paia pe afai e te faitau i ai ma tatalo e uiga i ai ma “o le mana foi o le Agaga Paia e mafai ona outou iloa ai le moni o mea uma lava.”
Sa taia au i se tali mamana ma le faigofie. Ou te lei faitauina moni lava le Tusi a Mamona mo au lava! O le mafuaaga lena sa lei i ai sau molimau e uiga i ai.
O le taimi lava na ou taunuu ai i le fale, na ou nofo ai i lalo ma amata ona faitau lau kopi o le Tusi a Mamona. A o ou faitau e uiga i tagata mai aso anamua, sa mafai ona ou lagonaina le tuputupu ae o lau molimau e moni i latou ma sa tutupu moni lava ia i latou na vavega.
O ni masina mulimuli ane, ina ua uma lau Tusi a Mamona, sa ou lagonaina le faatumulia i le Agaga. Ou te iloa na auina mai e le Tama Faalelagi ia te au na “Numera Fesootai Faafuasei” e fesoasoani ia te au pe a ou manaomia se tali. Ou te faafetai ia te Ia i aso uma mo lau molimau sili atu, ma ou te iloa ua na o se tatalo lava ma se mau Lona mamao.
E alala le tusitala i Iuta, ISA.