“Lou Fafagaga Faaleagaga i Aso Taitasi,” Mo le Malosi o le Autalavou, Aok. 2021, 26–27.
Lesona Faatinoo le Afiafi Faaleaiga
Lou Fafagaga Faaleagaga i Aso Taitasi
O mea laiti ma faatauvaa e mafai ona maua ai le malosiaga o le kalave, ma taunuuga o le suia o le olaga!
E i ai se lagona e faapea o loo e feagai ma faatinoga o faiga masani o le talalelei i aso taitasi ae e le o faia se eseesega? Ua uunaia i tatou uma e faaalu se taimi i tusitusiga paia i aso uma ma ia tatalo e le aunoa. Ae o nisi taimi e faigata ai ona iloa faamanuiaga o nei masani laiti, i aso taitasi.
E ui o ni masani faigofie e pei o tatalo faaletagata lava ia ma le suesue i tusitusiga paia i aso uma e ono foliga faatauvaa, ae ua ia i latou le mana e uunaia ai le taitaiga o lou aso—ma lou olaga.
Saili se selu uga, o se paipa, ma se volenitia e mago le lauulu—o le taimi mo le lesona faatino!
O le Mea e Fai
-
Ki le paipa i sina vai manifinifi lava. I lenei tulaga, o le kalave ua na o le pau lea o le mea e uunaia ai le itu o le vai. Faamalamalama atu i lou aiga, o le kalave e pei lava o a tatou faiga masani o aso uma. Ae o se toefafagaina faaleagaga i aso taitasi e mafai ona i ai se aafiaga matagofie i le taitaiga o o tatou olaga, e pei lava o le selu ua fafagaina o le a aafia ai le tamai vai laitiiti.
-
Pulumu le selu uga i lou lauulu (po o le lauulu o le tagata o lou aiga) faa 10 taimi. Aumai loa le selu faalatalata i le tafe o le vai manifinifi (e aunoa ma le pai moni i ai). Matau ao tupu le maneta. Afai e lelei mea uma, o le a pi’o le tafe o le vai agai i le selu!
Ua lelei, o lona uiga o le saienisi moni lava, ae le o se maneta. Ao e seluina pea lava pea lou lauulu, o le eletise e faaputuputu i le selu i le tulaga o tamai eletoni ninii. A e faalatalata atu le selu i le vai, o le faaputuga o na tamai eletoni e tosina mai ai le vai, ma e pio moni lavale alavai!
-
Toe fai le faataitaiga, o le taimi lenei selu na o le faatasi pe faalua foi lou lauulu. E le lava eletoni e faaputuputu e pio ai le vai. Ae o le faia faa 10, po o le 20 po o le 30, e mafai ona faaputuina se aofaiga maoae o le eletise!
Fesili i lou aiga po o le a le eseesega i le va o suesuega e lua, ma le auala e mafai ona fesootai ai i o tatou lava uiga masani faaleagaga i le aso (po o le vaiaso, po o se olaga atoa). Ona toe fai lea o le gaoioiga i le auala sao mo se isi taimi, aua, e malie!
O Le Mana o se Fafagaga i Aso Taitasi
Na aoao mai Elder David A. Bednar o le Korama a Aposetolo e Toasefululua: “O le mamanu faaleagaga o mea iti ma faatauvaa i le aumaia i luma o mea tetele e fua mai ai le mausali ma le mautu, tuuto ua loloto, ma le liua ua atoatoa atili i le Alii o Iesu Keriso ma Lana talalelei.”1
E pei o eletoni ninii e faaputuputu mai i luga o le selu, e i ai gaoioiga laiti, faaleagaga i aso taitasi e mafai ona tatou faia e fafaga ai a tatou molimau. O nei fafagaga faaleagaga e mafai ona tele ni mea: suesueina o tusitusiga paia, tatalo faaletagata lava ia, tagofia o le faamanatuga, alu i le seminare. Faamalamalama atu o mea uma e ono foliga laiti mai i aso taitasi, ae o na fafagaga faaleagaga e mafai ona faia se eseesega tele, e tusa lava pe na o le pio ai o lou olaga teisi i le itu sao (tagai Mataupu Faavae ma Feagaiga 64:33).
Fai atu i lou aiga e lisi mai ni auala e mafai ona e faaputuina ai i luga ni fafagaga laiti faaleagaga i le aso ma le vaiaso. O faatosinaga faifai pea, faaleagaga i lou olaga e mafai ona lava lona malosi e tetee ai le kalave!