“Lele Maualuga ao Maua’a i le Talalelei,” Mo le Malosi o le Autalavou, Aok. 2021, 16–19.
Lele Maualuga ao Maua’a i le Talalelei
A o ia faia ni miliga i le olaga, e le galo lava ia Sophia le mea e sili ona taua.
Ata pue na saunia e le Mad Moose Media @MadMooseMedia
O le tele o taaloga e aofia ai se mea faitino e lele i le ea e agai atu i se tini. O le tapolo, lakapi Amerika, soka, pesipolo, badminton, ma le kirikiti ua na o ni nai vaega lava.
Ona i ai lea o se isi ituaiga o taaloga lea e avea ai oe o se mea faitino e lele i le ea. E le mo le fatu pe. Ae peitai, e leai lava se tasi e valaau Sofia P., 18, o Iuta, ISA, o se fatu pe.
O ia o se tamaitai talavou e lele maualuga, o se tamaitai talavou e fefaasoaai-molimau e lagona le toafimalie i soo se mea e i ai ni uili se lua. Ma a o fiafia o ia e auai i le au tietie uila i le mauga a le aoga maualuga, o ana uila pau-lua e faananau i ai e alu i le kesi.
Ata na pueina e Erin Malcom, Elevated MX @ErinMalcom
“O le Motocross o le taaloga o le miliga o uila i le palapala i luga o se ala o mea faalavefau na gaosia uma mai i le palapala,” o le tala lea a Sophia. “Matou te taututuu i ituaiga eseese uma o aega, mauga, ma isi mea faapena. Sa oo lava ina latou eliina ni vaega o le auala e tuuina mai ai ia i matou ni pu loloto mo se luitau sili atu.”
O uila palapala (pasika mo le tietie i auala lauleaga) e matuai malolosi lava. Sa mafai ona latou aea mauga ma auina atu oe e lele i luga o le ea i se maualuga ofoofogia. Ma i nei tuuga, latou te fiafia uma ai lava.
Ata pue na saunia e le Mad Moose Media @MadMooseMedia
A o ia puleaina lelei le taaloga o miliga uila, sa faia e Sophia ni fesootaiga mamana i le talalelei. O se tasi o ia mea tetele o le taua lea o faaaliga. “Afai e mafai ona talanoa mai le Agaga Paia ia te au ao ou mili i luga o maugaa o poloka i le 50 maila i le itula, e mafai ona Ia talanoa moni mai ia te au pe a ou savali i ala savali o le aoga,” o lana tala lea.
O le Saoasaoa i Luga o Faaaliga
Ua i ai ia Sophia ni malamalamaaga tulaga ese i le taua o le faalogo atu i musumusuga a le Agaga Paia. Mo ia, o le tumau ai ma le faamaoni i le ala o faaaliga e faatumauina ai lona saogalemu faaleagaga ma faaletino. “E 100% lou talitonu i le mana o tatalo. Ou te tatalo i taimi uma ou te faataitai ai, “o lana tala lea. “Ou te lagona ni uunaiga laiti mai le Agaga Paia i taimi uma ou te i ai iina.”
O se faataitaiga se tasi, e manatua e Sophia se taimi na ia latalata atu ai i se vaega e oso ai i luga ao saoasaoa lana alu. Sa ia lagonaina se uunaiga uiga ese faapea sa ia manaomia ia faasaofa’i lelei atili o ia lava. “I miliga nei, e tatau ona tatou oomiina le uila i o tatou tulivae. E tatau ona tatou tuu atu polo o o tatou vae i luga o peki ma ifo maualalo lava o tatou ulu i luga teisi ae o ave.”
O le lele maualuga ao nofo sao i luga, i le isi itu, e taunuu i se faalavelave ogaoga.
Na ia maua loa le uunaiga, e lei toe faatali o ia. Sa ia fetuunaia le tulaga o lona tino. Na vave lava mulimuli ane, sa i ai sona faafitauli ogaoga i le tulaueleele mai le oso maualuga. E mautinoa lava sa tatau ona lavea o ia. Ae peitai, ona sa ia faalogo i le musumusuga ma faaleleia atili ai lana nofo, sa mafai ai ona ia tatalia le faalavelave. “Nai lo le lavea, sa ou fiki i luga faatasi ma le pasika.”
Ata pue e le Mad Moose Media @MadMooseMedia
Sa aoao Sophia ia aua lava nei le amanaiaina ia uunaiga. O se tasi o eria na te maua ai le tele o uunaiga o le galuega faafaifeautalai.
Faifeautalai i Miliga
“Ou te faatusaina le aofai o avanoa ou te talanoa ai i tagata i le avea ai o se faifeautalai,” o le tala lea a Sophia.
A o ia auai i tauvaga eseese o miliga, e feiloai Sophia ma talanoa ma le autalavou mai soo se itu o le olaga. Ma e ala i le ola ai i le talalelei, e tu ese ai o ia mai le motu o tagata. E matauina e isi tagata tietie.
Ata na pueina e Malea Ellett @MaleaEllett
“Latou te fai mai ni fesili e pei o le, “Aisea e te le palauvale ai? ‘ po o le “Aisea e te le mili ai i Aso Sa? ’” Ua fai mai Sophia. “O nisi taimi e liua ai nei fesili i talanoaga o le talalelei. E i ai sau molimau malosi ma manao i isi ia latou maua le olioli ua ia te au.”
I nei talanoaga uma, sa ia lagonaina le taitaiga a le Agaga Paia na fesoasoani ia te ia ia iloa upu e fai atu. Na te iloa foi le taua o le ola agavaa ina ia maua ai faaaliga ma le manino.
“E te valaaulia le Agaga Paia e ala i le tausia o poloaiga,” o le tala lea a Sophia. “Ma e taua le mulimuli i na uunaiga! O le tele o lou mulimuli i ai, o le tele foi lena o le tuuina atu e le Agaga Paia.”
E talanoa Sophia ma isi tagata tietie e uiga i le auai i le lotu, le tulafono o le legavia, malumalu, ma le anoanoai o isi autu o le talalelei. O se vaega o mafuaaga e tele ai ana talanoaga faaletalalelei o le talanoa lea i le toatele o tagata, ae maise lava i miliga. “Na fetalai mai Iesu ia alofa i tagata uma,” o lana tala lea, “o lea ou te talanoa ai i tagata uma.”
Miliga ma le Amiotonu
Ioe, ona e lelei o ia ia te oe i fafo o le miliga e le faapea o le a ia faafaigofie ai mo oe i le taimi lava e amata ai le tuuga! E tautino mai e Sophia e sili atu o ia nai lo na o sina tautava. Mo se faataitaiga, pe a ia taututuu ma lona tama (o se tietie uila palapala foi), e tasi lava lona faamoemoega patino i le mafaufau. “O lau sini ia mua ia te ia, ma o lana sini ia aua nei ou mua ia te ia!”
Ata na pueina e Erin Malcom, Elevated MX @ErinMalcom
Ae tusa lava pe oo mai i le manumalo ma le faiaina, o Sophia e sa’o lava ana mea e faamuamua. “Ua aumai e le talalelei ia te au le tele o le taitaiga,” ua ia faamatala mai ai. “E tusa lava pe ou te faiaina i le miliga, e mafai lava ona ou manumalo i le tausinioga i le olaga. I le olaga, e te le taututuu ma soo se isi lava ae o oe lava ia.”