Fesili ma Tali

“E mafai faapefea ona fesoasoani le talalelei i lo’u atuatuvale?”

Manatua: Afai e faaauau pea lou atuatuvale mo ni nai vaiaso pe amata ona faalavelave i lou olaga i aso taitasi, saili le fesoasoani mai matua, uo faatuatuaina, po o se polofesa o le mafaufau.

“O le alofa paia [o Iesu Keriso] ma le fesoasoani e le uma o le a i ai ia i tatou e tusa lava pe tatou te tauivi—leai, o le a faatasi ma i tatou e matua faapitoa lava pe a tatou tauivi.”

Elder Jeffrey R. Holland o le Korama a Aposetolo e Toasefululua, konafesi aoao Ape. 2016 (Ensign po o le Liahona Me 2016, 127).

Aua Le Fiu

“Afai e i ai ni ou atuatuvalega faataumālie, taumafai e saili ni auala e auauna atu ai i isi. E mafai foi ona e taumafai e faitau ia tusitusiga paia, tatalo, ma galue i au sini mo le polokalama fou a le autalavou. Afai o se tulaga ogaoga, atonu e te manao e saili se fesoasoani faapolofesa. O le mea sili lava, aua nei galo e alofa lou Tama Faalelagi ia te oe. Afai e te tatalo atu ia te Ia mo se fesoasoani, o le a e maua se tali.”

Ryan B., 11, Arisona, ISA

E Le o Tuua Na o Oe

“E mafai e i tatou uma ona maua le faamoemoe e ala i le Tama Faalelagi, Iesu Keriso, ma isi tagata. Ua aoaoina i tatou e le Atua ina ia i ai le faatuatua pe a tatou tatalo ma fesili atu e uiga i o tatou faafitauli. E fesoasoani tusitusiga paia tatou te malamalama atili ai ia Iesu Keriso ma le auala na Ia faatoilaloina ai le tele o tofotofoga. E taua foi le talanoa atu i se tasi, e pei o se matua po o se uo faatuatuaina, o le e mafai ona fesoasoani ia i tatou ia iloa ai e le o tuua na o i tatou.”

Martin N., 18, Chihuahua, Mekisiko

O Le a Ia Faamafanafana ia te Oe

“Pe a ou lagona le faanoanoa, ou te manatua o loo ia te au Iesu Keriso, o le na lagonaina mea uma na ou lagonaina. I le Alema 7:11, e faitauina faapea: “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.” Na te silafia lelei lava le auala e fesoasoani atu ai ia te oe aua sa Ia lagonaina lea lava mea e tasi. A e liliu atu ia Iesu Keriso, o le a Ia faamafanafana ia te oe.”

Makayla F., 17, Kalefonia, ISA

Ia Onosai ia te Oe Lava Ia

“Ia onosai ma ia agalelei ia te oe lava ia. Seti ni sini faigofie e ausia i aso uma, e pei o le tatalo, mafaufau loloto, ma le faia o se mea e te fiafia i ai. Ona tumau lea e oo i le iuga o aso taitasi. Ua silafia e le Tama Faalelagi lou tulaga ma faatalitali mai ia te oe i Lona malo. Ia tumau mausali i lou faatuatua, ma o le a faamamaina le avega. E moni lava. Ua ou iloaina.”

IsabelleF., 21, Rio de Janeiro, Pasila

Mafaufau i Faamanuiaga

“Soo se taimi lava ou te lagonaina ai le atuatuvale po o le faanoanoa, ou te fia tomanatu i le aso po o le vaiaso ma mafaufau i mea ua faamanuiaina ai au e le Atua. Pe a ou faia lena mea, ou te lagonaina le filemu ma le fiafia aua e fesoasoani ou te iloa ai o loo silafia e le Tama Faalelagi au.”

TayleeL., 16, Iuta, ISA

Taimi e Lei Fuafuaina

“O le 2020 o se tausaga faigata mo tagata uma—le tuuesea mo le umi tele o le a mafai ona mafua ai lagona o le atuatuvale. Ae ou te iloa afai tatou te saili mo le faatasi mai o le Alii ao tatou tatalo ma suesue i tusitusiga paia, o le a i ai o Ia iina mo i tatou. Atonu e le o taimi tatou te faamoemoe ai, ae o le a i ai o Ia iina mo i tatou i Lana taimi, o le taimi sili lea ona lelei. I na taimi e lei mafaufauina, o le a tatou iloa ai o loo mafuta mai ma le alofa le Atua ma i tatou.”

MartinN., 18, Chihuahua, Mekisiko

Manatua Upu Musuia

“O nisi taimi tatou te lagona ai ua leai so tatou faamoemoe. Ia tumau le talitonu i le talalelei. E tusa lava pe tatou te lagona ua le mafai ona tatou tatalo, e mafai lava ona tatou tootutuli mo ni nai minute. E mafai ona tatou faalogo i tusitusiga paia po o se savali mai le Ekalesia. E mafai ona tatou manatua upu o se viiga po o le taulotoina o se fuaitau e faamanatu mai ai ia i tatou le lototele o loo tatou maua. Sa ou taulotoina se fuaitau na saunia e Elder Jeffrey R. Holland o le Korama a Aposetolo e Toasefululua lea na aumaia ia te au le faamoemoe: O le mea tele e uiga i le talalelei o le maua lea o o tatou togi mo le taumafai, e tusa lava pe tatou te le manuia i taimi uma‘ (konafesi aoao Ape. 2016 [Ensign po o le Liahona, Me 2016, 125–26).”

Giani V., 22, Cordoba, Atenitina

Manatua Lona Alofa

“O le talalelei a Iesu Keriso o se talalelei o le alofa. Na manumalo Iesu Keriso i le lalolagi ona e alofa o Ia ia i tatou. Ona o lena taulaga, ua ou iloa ai ua Ia silafia mea uma o loo ou asaina. I le Mataio 11:28, ua valaaulia i tatou e le Faaola: “Ia outou o mai ia te au, o outou uma o e tigaina ma mafatia i avega, o au foi e malolo ai outou.’ O Lona alofa, o le mea lea e tatau ona tatou manatua i le tele o taimi o le tiga.”

Lyvia S., 17, Parana, Pasila

O Le A Sou Manatu?

Ou te lei maua lava ni aafiaga mamana faaleagaga. E mafai faapefea ona ou faasoa atu la’u molimau?

Auina mai lau tali ma le ata ae lei oo i le aso 15 o Setema, 2021.

Alu i le ftsoy. ChurchofJesusChrist.org, kiliki i le “Submit Your Work.” Saini e alu i totonu i lau Faitotoa a le Ekalesia ona filifili lea o le “For the Strength of Youth” i lalo o le “Choose Magazine.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ia i matou lau faila. Pe imeli mai ia i matou i le [e-mail].

E ono faatonutonuina ia tali mo le uumi po o le manino.