“Ko e Lakanga Fakataulaʻeiki ʻa e ʻOtuá,” Ki Hono Fakamālohia ʻo e Toʻu Tupú, ʻAokosi 2021, 20–21.
Haʻu, ʻo Muimui ʻIate Au
Ko e Lakanga Fakataulaʻeiki ʻa e ʻOtuá
Tokāteline mo e Ngaahi Fuakava 84
Ko e meʻa ʻoku totonu ke ʻiloʻi ʻe he toʻu tupu kotoa pē fekauʻaki mo e lakanga fakataulaʻeikí pea mo ʻenau fehokotaki ki aí.
Kuó ke fakatokangaʻi nai ʻa e puputuʻu ʻoku malava ke hoko ʻi he taimi ʻoku fakaʻaongaʻi ai ha foʻi lea ʻe taha ʻi ha founga ʻe uá? Hangē ko ʻení, ʻoku ʻuhinga ʻa e foʻi lea earth [māmani] ʻi he lea faka-Pilitāniá ki he palanite ʻoku tau nofo aí mo e kelekele hotau lalo vaʻé. ʻOku tonu fakatouʻosi pē ʻa e ongo fakaʻuhingá, ka ʻoku makatuʻunga ʻa e meʻa ʻokú ke ʻuhinga ki ai he taimi ʻokú ke fakaʻaongaʻi ai e foʻi leá ʻi he meʻa ʻokú ke talanoa ki ai he taimi ko iá. Ke toe fakapuputuʻu lahi angé, ko e taimi ʻoku ʻuhinga ai ʻa e earth ki hotau palanité, ʻoku toe kau foki ai ʻa e foʻi fakakaukau ʻo e kelekelé, he koeʻuhí ʻoku ʻi ai e kelekele ʻi he palanité.
Ko e Fakaʻuhinga ʻo e Foʻi Lea Lakanga Fakataulaʻeiki
Ko ha lea ʻoku tau fakaʻaongaʻi ʻi he Siasí ʻi ha founga ʻe ua ko e lakanga fakataulaʻeiki. ʻOku ʻuhinga ʻa e leá ki he mālohi mo e mafai kakato ʻo e ʻOtuá. Ka neongo iá, ʻoku tau fakaʻaongaʻi foki ʻa e lakanga fakataulaʻeikí ʻi ha founga ʻoku toe fakangatangata angé—ke ʻuhinga ki he “mālohi mo e mafai ʻoku foaki ʻe he ʻOtuá ki he kau maʻu lakanga fakataulaʻeiki kuo fakanofo ke ngāue ʻi he ngaahi meʻa kotoa pē ʻoku fie maʻu ki hono fakamoʻui ʻo e fānau ʻa e ʻOtuá.”1
Ko e lakanga fakataulaʻeiki ne foaki ki he tangatá ʻoku ʻikai ko e kotoa ia e mālohi ʻo e ʻOtuá. ʻOku fakatātaaʻi ʻe he saati ko ʻení ʻa e meʻá ni.
Te ke vakai ʻi he sātí ni ki ha ngaahi sīpinga ʻo e mālohi ʻo e ʻOtuá, ʻa ia ʻoku taʻefakangatangata pea ʻikai hano ngataʻanga. ʻI loto aí, te ke vakai foki ai ki ha ngaahi sīpinga ʻo e mālohi mo e mafai ʻo e lakanga fakataulaʻeiki ʻo e ʻOtuá ʻa ia ʻokú Ne foaki ki he kakai tangata moʻui tāú ke nau ngāue ʻi he Siasi ʻo Kalaisí.
Ngaahi Sīpinga ʻo e Mafai ʻo e Lakanga Fakataulaʻeikí ʻi Hoʻo Moʻuí
ʻOku ʻatā ʻa e ngaahi tāpuaki kotoa pē ʻo e lakanga fakataulaʻeikí maʻá e ngaahi ʻofefine mo e ngaahi foha ʻofeina kotoa pē ʻo e Tamai Hēvaní. ʻOku fakafofongaʻi ʻe he lisi hono uá ʻa e ngaahi tāpuaki ko ia ʻokú ke maʻu ʻo fakafou ʻi ha taha ʻokú ne maʻu e ngaahi kī ʻo e lakanga fakataulaʻeikí pe kuo foaki kiate ia ʻa e mafai ʻo e lakanga fakataulaʻeikí.
Ko e hokohoko ʻeni kuo fokotuʻu ʻe he ʻOtuá ki hono fokotuʻutuʻu mo hono puleʻi ʻo Hono Siasí ʻi he māmaní. Ko e ngaahi sīpinga kehe ʻo e mafai ʻo e lakanga fakataulaʻeiki ʻa e ʻOtuá ʻoku kau ai ʻa e palesiteni ʻo e kōlomu ʻo e kau tīkoní pe akonakí ʻa ia ʻokú ne maʻu e ngaahi kī ke tataki e ngāue ʻo ʻene kōlomú, ko ha tāpuaki kuo foaki ʻe ha tamai ʻi ha ʻapi, mo e ngaahi ouau mo e ngaahi fuakava fakatemipalé.
Houʻeiki Tangatá, Houʻeiki Fefiné mo e Lakanga Fakataulaʻeikí
Neongo ko e fakanofo ki he tuʻunga ʻo e lakanga fakataulaʻeikí ʻoku foaki pē ia ki he kakai tangatá, ka naʻe fakamatalaʻi ʻe Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, ha tefitoʻi moʻoni mahuʻinga: “Ko e lakanga fakataulaʻeikí ko ha mālohi mo ha mafai fakalangi ia kuo tuku mai ki he ngāue ʻa e ʻOtuá ki he lelei ʻEne fānaú kotoa. ʻOku ʻikai ko e lakanga fakataulaʻeikí ʻa kinautolu kuo fakanofo ki ha tuʻunga ʻi he lakanga fakataulaʻeikí pe ko kinautolu ʻoku nau ngāue ʻaki hono mafaí. ʻOku ʻikai ko e lakanga fakataulaʻeikí ʻa e houʻeiki tangata ʻoku nau maʻu e lakanga fakataulaʻeikí. … ʻOku ʻikai totonu ke tau ui e houʻeiki tangata kuo fakanofó ko e lakanga fakataulaʻeikí ia.”2
Neongo ʻoku ʻikai fakanofo e kakai fefiné ki he lakanga fakataulaʻeikí, ka naʻe fakamatalaʻi ʻe Palesiteni Lāsolo M. Nalesoni ʻo pehē, “ʻi he taimi ʻoku vaheʻi ai koe ke ngāue ʻi ha fatongia ʻi he fakahinohino ʻa ha taha ʻokú ne maʻu e ngaahi kī ʻo e lakanga fakataulaʻeikí … ʻoku foaki atu ʻa e mafai ʻo e lakanga fakataulaʻeikí ke ke ngāue ʻi he fatongia ko iá.”3 Ko ha ngaahi sīpinga ʻe niʻihi ʻoku kau ai ʻa e kau palesitenisī fakakalasi ʻo e Kau Finemuí, kau faifekau sisitā ʻoku malanga ʻaki e ongoongoleleí, kau takimuʻa ʻi he ngaahi uōtí mo e siteikí kuo vaheʻi ke faiako mo takí, mo e kau ngāue ouau fakatemipalé.
ʻOku Tāpuekina ʻe he Mālohi ʻo e Lakanga Fakataulaʻeikí ʻa e Taha Kotoa Pē
Ko e ngaahi tāpuaki ʻoku maʻu ʻe kimoutolu kau talavou mo e kau finemui ʻoku ʻamoutolu ia ʻo fakafou ʻi he ngaahi fuakava ʻoku mou fakahoko ʻi he papitaisó mo e ngaahi fuakava te mou fakahoko ʻi he temipalé. ʻOku tatau ai pē kapau ʻoku ʻikai ha taha maʻu lakanga fakataulaʻeiki ʻi homou ʻapí, ʻe kei lava pē ke faitāpuekina hoʻo moʻuí ʻaki e mālohi ʻo e lakanga fakataulaʻeiki ʻa e ʻOtuá ʻi hoʻo tauhi e ngaahi fuakava kuó ke fakahoko mo Iá (vakai, 1 Nīfai 14:14).
ʻI heʻetau moʻui ʻo fakatatau mo ʻetau ngaahi fuakavá, ʻoku tau maʻu ai ha ngaahi tāpuaki te ne fakaivia mo faitāpuekina kitautolu. ʻOku mau fakaafeʻi koe ke ke fakalaulauloto ki he ngaahi tāpuaki ʻo e lakanga fakataulaʻeikí ʻi hoʻo moʻuí—ʻa e ngaahi tāpuaki ʻoku hoko mai koeʻuhí ko e mālohi taʻengata ʻo e lakanga fakataulaʻeiki ʻa e ʻOtuá pea mo e ngaahi tāpuaki ʻoku fakatefito ʻene hokó ʻi he mafai ʻo e lakanga fakataulaʻeiki ʻoku foaki ʻi he Siasi ʻo e ʻOtuá.