“Mga Himno sa Pasko sa tibuok Kalibotan,” Alang sa Kalig-on sa mga Kabatan-onan, Dis. 2021.
Mga Himno sa Pasko sa tibuok Kalibotan
Upat ka batan-on nagpaambit sa ilang paborito nga mga himno sa Pasko.
Gisaulog ang Pasko sa nagkalain-laing mga paagi sa tibuok kalibotan, ug ang mga himno sa Pasko sa kasagaran managlahi usab. Apan bisan unsa nga mga awit ang inyong kantahon, ang mga mensahe niini nga mga himno mokonektar kanato ngadto sa usag usa—ug ngadto ni Jesukristo. Ania ang unsay ikasulti sa upat ka batan-on gikan sa tibuok kalibotan mahitungod kon sa unsang paagi ang ilang mga himno sa Pasko nagtabang kanila nga mas maduol sa Manluluwas.
“Mahil[o]m nga Gabii! Balaan nga Gabii!”
Si Kasen L., 14, gikan sa Auckland, New Zealand, ganahan sa kalinaw nga moabot gikan sa pagkanta og mga himno sa Pasko. “Usa sa akong paborito nga mga himno nga among kantahon sa New Zealand mao ang ‘Mahil[o]m nga Gabii.’ Isip usa ka pamilya ug sa Primary, nakat-onan namo kini sa Samoan, Maori, Tongan, ug ubang mga pinulongan sa Pasipiko. Nagdala kini og kalinaw ngadto sa daghang tawo ug nagsulti kanako nga Balaan ang gabii nga natawo si Kristo ug nga Siya mao ang akong Manluluwas.
“Ang musika sa Pasko nakatabang kanako sa paghinumdom sa Manluluwas. Kon maminaw ako sa mga himno sa Pasko, mabati nako ang Espiritu. Kini nakatabang kanako nga mobati nga ako usa ka lakang nga mas duol sa Langitnong Amahan ug ni Jesukristo.”
“Kalipay sa Kalib[o]tan”
Si Lumiere S., 16, gikan sa Montagnes, Côte d’Ivoire, nakakaplag og kalinaw sa pagkasayod nga si Kristo moanhi pag-usab. Ang iyang paborito nga himno sa Pasko mao ang “Kalipay sa Kalib[o]tan.” “Kini kanunay nakapalipay kanako tungod kay ako nasayod nga ang Manluluwas moanhi pag-usab. Ang akong paborito nga linya mao ang una: ‘Kalipay sa kalib[o]tan.’ Makapahupay kanako nga masayod nga Siya moanhi pag-usab ug moayo sa kalibotan gikan sa mga kahugaw niini.”
“Pagdagkot og Kandila”
Si Mina H., 16, gikan sa Vestland, Norway, ganahan kon sa unsang paagi ang mga himno sa Pasko makahatag og hingpit nga kalipay.
“Ako adunay daghang tradisyonal nga mga himno nga ganahan nakong kantahon atol sa Pasko. Usa niini mao ang gitawag og ‘Deilig er jorden’ [‘Labing Halangdon nga Ginoong Jesus’; nailhan usab nga ‘Beautiful Savior [Matahom nga Manluluwas]’ (tan-awa sa Children‘s Songbook, 62–63)]. Ang tradisyonal nga mga himno magdala gayod og hingpit nga kalipay ug malipayon nga mga pagbati sa Pasko.
“Kadtong tradisyonal nga mga himno sa Pasko maayo kaayo pagkasulat, sa paagi nga balaknon kaayo, ingon man usab nga malipayon. Ang akong paborito nga bahin sa awit nga ‘Deilig er jorden’ mao ang nag-ingon kini nga, ‘Kalinaw sa kalibotan. Tawo, pagsadya. Karon usa ka Manluluwas ang natawo ngari kanato.’”
“Kasadya Ning Táknaa”
Si Jairus C., 16, gikan sa Bohol, Philippines, mibati nga espesyal ang mga himno sa Pasko tungod kay kini naghiusa sa atong mga hunahuna sa Manluluwas. “Ang mga himno sa Pasko nagdala og kalipay ug paghinumdom ngadto sa katawhan bahin sa pagkatawo ni Kristo. Ang mga pulong dako nga bahin sa mga himno sa Pasko tungod kay kini nagpahinumdom kanako ni Jesukristo—kon unsa Siya ka talagsaon nga ehemplo ngari kanato.”
Usa sa tradisyonal nga Filipino nga himno sa Pasko nga ganahan ni Jairus mao ang “Kasadya Ning Táknaa”. “Kini nga awit makapadasig sa mga tawo,” miingon siya. “Kini adunay sadya nga kumpas, nga naghiusa sa mga tawo. Kon walay mga himno sa Pasko, tingali ang Pasko dili ingon ka malipayon o sadya. Importante kanako ang mga himno sa Pasko.”