“Usa ka Espesyal nga Pasko didto sa Habagatang Amerika,” Alang sa Kalig-on sa mga Kabatan-onan, Dis. 2021.
Usa ka Espesyal nga Pasko didto sa Habagatang Amerika
Unsa nga gasa ang makapanalangin og tibuok kontinente?
Presidente Reinhold Stoof, Presidente sa South American Mission; iyang asawa, si Ella; Elder Rey L. Pratt sa Seventy; ug Elder Melvin J. Ballard sa Korum sa Napulog Duha ka Apostoles didto sa Habagatang Amerika.
Uban sa pagkatawo ni Jesukristo sobra sa 2,000 ka tuig ang milabay, ang atong Langitnong Amahan mihatag sa kalibotan sa labing mahinungdanon nga gasa nga madawat niini. Kini nga gasa hilom nga gihatag. Gamay ra ang nasayod mahitungod niini. Bisan karon, daghan ang wala mahibalo kon sa unsang paagi ang gasa sa atong Manluluwas makapanalangin sa ilang mga kinabuhi.
Hapit 100 ka tuig ang milabay, sa Adlaw sa Pasko, laing espesyal nga gasa ang gihatag ngadto sa tibuok nga kontinente. Kadaghanan wala makahibalo niini nga gasa. Hilom kini nga gihatag, nga wala gipahibalo sa publiko, walay mga post sa social media, ug walay mga pag-interbiyo sa media. Apan, unsay nahitabo niini nga Adlaw sa Pasko makatabang sa minilyon ka mga tawo nga makadawat sa labing mahinungdanon nga gasa sa Langitnong Amahan nga mao ang Iyang Anak.
Usa ka Pag-ampo sa Pasko
Kasiyaman ug unom ka tuig ang milabay, niadtong Disyembre 1925, tulo ka lider sa Simbahan ang miabot sa Buenos Aires, Argentina. Milungtad kini kanila og 34 ka adlaw nga pagbiyahe gikan sa Siyudad sa Salt Lake, Utah, paingon ngadto sa Buenos Aires, Argentina, pinaagi sa tren ug barko. Nianang higayona, dihay pipila lamang ka mga miyembro sa tibuok Habagatang Amerika. Apan ang Ginoo nag-andam og paagi alang sa Ang Simbahan ni Jesukristo sa mga Santos sa Ulahing mga Adlaw nga makaangkon og hayag nga kaugmaon sa Habagatang Amerika.
Si Elder Melvin J. Ballard, usa ka sakop sa Korum sa Napulog Duha ka Apostoles, ug duha ka laing mga lider sa Simbahan, sila si Elder Rey L. Pratt ug Rulon S. Wells, gipadala ngadto sa Argentina alang sa usa ka espesyal nga buluhaton. Ang propeta, si Presidente Heber J. Grant, mipadala kanila aron sa pagpahinungod sa tibuok kontinente sa Habagatang Amerika alang sa pagsangyaw sa ebanghelyo.
Sa buntag sa Pasko, si Elder Ballard ug ang iyang mga kauban milakaw paingon ngadto sa hilom nga willow nga kakahoyan sa Buenos Aires. Mikanta sila og mga himno ug mibasa gikan sa Basahon ni Mormon. Dayon si Elder Ballard mihalad og pag-ampo. Ubos sa direksyon sa Presidente sa Simbahan ug pinaagi sa apostolikanhong awtoridad nga iyang gihuptan, si Elder Ballard miingon, “Ako motuyok sa yawe, mobukas, ug moabli sa pultahan alang sa pagsangyaw sa ebanghelyo ngadto niining tanan nga nasod sa Habagatang Amerika.”1
Nangayo usab si Elder Ballard og panalangin alang sa mga lider sa mga nasod sa Habagatang Amerika nga magmabination ngadto sa Simbahan ug motugot nga masangyaw ang ebanghelyo sa ilang mga nasod aron ang kaluwasan mahimong moabot ngadto sa tanan.
Usa ka Propetikanhon nga Saad
Human niana nga buntag sa Pasko, si Elder Ballard ug ang iyang mga kauban migahin sa mosunod nga walo ka bulan sa paglakaw-lakaw sa kadalanan sa Buenos Aires ug mipaambit sa mensahe sa Pagpahiuli sa ebanghelyo. Dihay gamay nga mga materyal sa pagtudlo nga Español nianang higayona, apan gibuhat nila ang ilang labing maayo ug mipadayon sa unahan uban ang hugot nga pagtuo. Ang ilang mga paningkamot miresulta lamang sa usa ka pagkakabig nianang higayona.
Sa wala pa mobiya sa Argentina, si Elder Ballard miingon nga ang Simbahan hinay-hinay nga molambo, “sama lamang sa usa ka tugas nga motubo sa hinay-hinay gikan sa usa ka liso.” Apan misaad siya nga liboan ang magpamiyembro sa Simbahan ug nga ang adlaw moabot nga ang mga tawo sa Habagatang Amerika “mahimong kusog sa Simbahan.”2
Ang Gasa Nagpadayon
Hapit na 100 ka tuig sukad nianang adlawa ug ang pag-ampo ni Elder Ballard natubag na—ug padayon nga matubag—sa talagsaong mga paagi.
Karon ang Simbahan sa Habatagang Amerika adunay:
-
4,178,375 ka miyembro
-
97 ka misyon
-
21 ka templo (uban sa 14 nga gipahibalo o gitukod pa)
Pagkanindot nga gasa sa ebanghelyo ni Jesukristo! Ug sama ni Elder Ballard ug sa iyang mga kauban, kita adunay responsibilidad ug oportunidad sa pagpaambit niining bililhon nga gasa ngadto sa uban. Niini nga Pasko, hinumdomi kini nga bililhon nga gasa, ug paningkamot sa pagpaambit niini. Bisan asa pa kamo, adunay daghang oportunidad sa pagpaambit sa ebanghelyo ngadto sa mga tawo nga naglibot kaninyo. Sa pagbuhat sa ingon, kamo makahimo sa inyong bahin sa pagtabang sa ebanghelyo ni Jesukristo nga mokatap sa tibuok kalibotan.