“Unsaon sa Pagpalig-on sa Inyong Pamilya,” Alang sa Kalig-on sa mga Kabatan-onan, Dis. 2021.
Dali, Sunod Kanako
“Ang Pamilya: Usa ka Pamahayag ngadto sa Kalib[o]tan”
Unsaon sa Pagpalig-on sa Inyong Pamilya
Makahimo kamo og dakong kalainan sa inyong panimalay kay sa inyong gituohan.
Kon mahitungod na gani sa pagtabang og pagpalig-on sa inyong pamilya, ania ang pipila ka buluhaton sa panimalay nga dili kaayo lisod paminawon: lakaw og dungan nga paglingaw-lingaw! Kini nga direksiyon naggikan sa “Ang Pamilya: Usa Ka Pamahayag ngadto sa Kalib[o]tan,” giisyu sa Unang Kapangulohan ug Konseho sa Napulog Duha ka Apostoles.
Ang pag-apil sa “maayo nga mga kalihokan” isip usa ka pamilya gilista isip usa ka dapit nga magpabilin ang inyong pamilya nga malig-on ug malampuson. Adunay walo ka laing mga butang nianang samang lista, apan atong tutukan kini usa og dugay-dugay.
Ang maayo nga mga kalihokan makapasuod kanato ug motabang sa pagpahiuli sa atong kusog.
Ang unang mga pioneer sa Simbahan nasayod sa usa ka butang o duha mahitungod sa kaimportante sa paglingaw-lingaw sa pagbalanse sa lisod nga adlaw. Ang mga pamilya kasagaran misaulog uban sa musika ug pagsayaw aron magpabilin nga madasigon ang ilang mga kalag, bisan sa taas nga adlaw sa pagpanglakaw.
Ania ang usa ka wala mailhi nga pioneer sa mubo nga istorya mahitungod niini nga buhat: “Bisan unsa kalisod ang panaw niana nga adlaw, sa dihang miabot ang kilom-kilom ug nagkampo na, nanihapon, ang kakapoy niana nga adlaw nakalimtan sa usa ka pagsayaw.”1
Nakuha na ninyo ang inyong buluhaton sa panimalay: paglingaw-lingaw uban sa inyong pamilya! Unsa pay inyong gihulat?
Siyempre, ang pamahayag sa pamilya naglista sa ubang mga butang nga makatabang sa mga pamilya. Usa sa piho nga mahimong tukma kauban sa maayo nga mga kalihokan: ang trabaho.
Trabaho
Kadali lang, trabaho? Dili ba kana sukwahi sa kalingawan? Usa ka tawo mahimong matintal sa pagpangutana, “Sa unsang paagi nga ang duha niini nga mga kasinatian makatabang sa paglig-on sa pamilya?”
Paghunahuna og mga lemonsito ug asukar. Kini dili managsama og lami sa usag usa. Apan isagol kining duha sa tubig ug kamo adunay lemonada.
Sa usa ka pakigpulong sa kinatibuk-ang komperensiya mahitungod sa kaimportante sa pagtrabaho og maayo, si Elder D. Todd Christofferson sa Korum sa Napulog Duha ka Apostoles mihisgot kon sa unsang paagi kining duha ka baroganan magtinabangay.
“Nakahisgot og pagdayeg sa trabaho, kinahanglan kong modugang og maayong pulong sa lulinghayaw,” miingon siya. “Sama sa matinuoron nga paningkamot makahatag og katam-is sa pagpahulay, ang limpyo nga paglingaw-lingaw mao ang higala ug makanunayong kauban sa trabaho.”2
Kon walay trabaho, kita dili makakaon, makatagamtam og kapuy-an, o makatuman sa hapit bisan unsa. Ang trabaho makahatag usab og tumong sa atong mga kinabuhi nga dili nato makuha sa bisan unsang paagi. Si Elder Neal A. Maxwell (1926–2004) sa Korum sa Napulog Duha ka Apostoles nagtudlo niadto, “Ang trabaho sa kanunay mao ang espirituwal nga panginahanglan bisan kon, alang sa uban, ang trabaho dili usa ka ekonomikanhong panginahanglan.”3
Ang pagtrabaho isip usa ka pamilya mahimong nagpasabot sa paghuman sa mga buluhaton sa balay, sa pagserbisyo sa uban, o bisan sa paghatag og kinitaan. Bisan unsa ang porma niini, kini mas makapasuod kaninyo.
Si Elder Dieter F. Uchtdorf sa Korum sa Napulog Duha ka mga Apostoles nagtubo sa usa ka panimalay nga komportabling nagpakabuhi—hangtod miulbo ang Ikaduhang Gubat sa Kalibotan. Unya ang iyang pamilya nawad-an sa tanang butang ug nahimong mga bakwit.
Apan nagtinabangay sila! Sa pagpamulong kabahin niining panahona, si Elder Uchtdorf (Presidente Uchtdorf kanhi sa Unang Kapangulohan), miingon, “Karon, ako nadani pag-ayo sa paagi nga nagtrabaho ang akong pamilya human nga nawad-an sa tanang butang human sa Ikaduhang Gubat sa Kalibotan! Nakahinumdom ko sa akong amahan … midawat og pipila ka lisod nga mga trabaho. … Ang akong inahan misugod sa pagdawat og labada ug mitrabaho og pila ka oras sa paghimo og ubos kaayo nga posisyon. Gipaapil niya ang akong igsoong babaye ug ako sa iyang negosyo. Gamit ang akong bisekleta ako nahimong tigkuha ug tighatod. Nindot ang akong bation nga makatabang sa pamilya sa gamay nga paagi.”4
Ang pagtrabaho og maayo makahatag og mga panalangin, katagbawan, ug, oo, kasuod isip usa ka pamilya.
Pagdugang og Kalig-on sa Inyong Pamilya
Siyempre, kadto mao lang ang duha sa siyam ka mga hiyas gikan sa pamahayag sa pamilya. Samtang atong minuboon ang uban pang pito, ikonsiderar ang pagsulat sa usa o duha sa siyam ka mga butang nga sa inyong hunahuna inyong mahimo, sa pagkakaron, aron makatabang sa pagpalig-on sa inyong pamilya.
_____________________________________________________________________________________________________________
Hugot nga Pagtuo
Diha sa ebanghelyo, sa ibabaw sa lista—ang unang baroganan sa ebanghelyo—mao ang “hugot nga pagtuo sa Ginoong Jesukristo” (Mga Artikulo sa Hugot nga Pagtuo 1:4).
Kon mas mosunod ang inyong pamilya sa ebanghelyo ni Jesukristo, mas maduol ang inyong tabang sa langit diha sa inyong panimalay. Tinuod kini bisan kon kamo lamang ang nagsunod sa ebanghelyo diha sa inyong panimalay. Ang kahayag ni Kristo makahimo og gamhanang kalainan niadtong kinsa makasugat niini.
Buhata ang inyong bahin sa pagdala og dugang nga hugot nga pagtuo sa inyong panimalay.
Pag-ampo
Ang pag-ampo isip pamilya mao ang sigurado nga mas makapasuod kaninyo—ilabi na kon kamo mag-ampo alang sa inyong mga sakop sa pamilya. Si Elder David A. Bednar sa Korum sa Napulog Duha ka apostoles mitudlo, “Ang ato bang mga kapikas, mga anak, ug ubang mga sakop sa pamilya … mobati sa gahom sa atong mga pag-ampo nga gihalad ngadto sa Amahan alang sa ilang piho nga mga panginahanglan ug mga tinguha?”5
Sama pananglit, mas lisod ang magpabilin nga masuko sa imong igsoong babaye tungod sa butang nga nahitabo sayo pa nianang adlawa sa dihang siya nag-ampo og kusog atol sa pag-ampo sa pamilya nga ikaw makahimo ra og maayo sa imong nagsingabot nga pasulit sa eskwelahan.
Ang pag-ampo alang sa matag sakop sa pamilya pinaagi sa ngalan nagtugot kanimo sa paghunahuna mahitungod sa matag tawo ug sa iyang panginahanglan. Nasayod usab sila nga ikaw naghunahuna mahitungod kanila.
Pagpasaylo, Pagtahod, ug Paghigugma
Kining tulo ka hiyas sa kasagaran magtambayayong. Kabahin sa pagtratar sa usag usa uban sa gugma ug pagtahod mao ang kaandam nga mopasaylo sa usag usa. Kon kita mopasaylo ug gipasaylo, ang pagtahod ug gugma nga atong gibati ngadto sa usag usa motubo.
Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo, “Wala gy[o]y mas kuyaw nga sumpay sa kalipay—sa atong kaugalingon ug sa atong mga anak—kaysa giunsa nato paghigugma ug pagsuporta ang usag usa diha sa pamilya.”6
Tagda ang usag usa nga may diyutayng kamabination. Dugangi ang paghigugma, minusi ang pagdumot.
Kalooy
Ang pagpakita og kalooy ngadto sa ubang mga sakop sa pamilya nagpasabot sa kagustohan nga motabang sa pagwagtang sa uban nilang palas-anon ug motabang kanila sa ilang mga panglimbasog.
Si Jesus mao ang atong hingpit nga ehemplo sa pagpakita og kalooy. Ania ang usa lang sa daghang mga ehemplo diha sa mga kasulatan.
Sa dihang si Jesus naglakaw gikan sa Jerico, duha ka buta nga tawo diha sa daplin sa dalan nanagtawag Kaniya. Ang mga tawo misulay sa pagpahilom kanila, nag-ingon nga sila “[maghilom]” (Mateo 20:31).
Dili ba sama kita nianang pundok sa katawhan ang atong pamilya? Usahay sayon ra nga mosalikway sa usa ka tawo kinsa nanghangyo og tabang. “Dili karon!” usahay gusto natong isulti.
Apan si Jesus mipakita kanato og mas maayong paagi. Sa dihang ang duha ka buta nga lalaki mitawag og mas kusog pa alang Kaniya, si Jesus nangutana, “Unsa may gusto ninyo nga akong buhaton kaninyo?” (Mateo 20:32).
Naghangyo sila sa pag-ayo sa ilang pagkabuta. “Nalooy si Jesus kanila ug gihikap niya ang ilang mga mata ug diha-diha nakakita sila ug misunod kaniya” (Mateo 20:33–34).
Ang kalooy dili kanunayng sayon, apan nagpakita kini kanunay sa gugma sa Dios.
Ang Gahum diha Kanimo
Sa kataposan, tingali kamo matintal sa paghunahuna nga, “Apan ako usa lamang ka tawo. Unsaon nako pagtabang?” Ang tubag mao, dako kaayo! Ibutang ang pamahayag sa pamilya sa pagsulay.
Ikaw ug ang imong pamilya angay sa paningkamot.