Kataposang Pulong

Usa ka Mas Makahuloganon nga Pasko

Ni Elder Ulisses Soares

Sa Korum sa Napulog Duha ka Apostoles

Gikan sa 2019 nga Debosyonal sa Pasko sa Unang Kapangulohan.

Mga paghulagway pinaagi ni Mallory Clinger

Samtang saulogon nato ang pagkatawo sa Manluluwas niining malipayon nga panahon sa tuig, ang nagpadayon ug walay kataposan nga gugma sa Dios ingon og mas buhong nga mopuno sa atong mga kalag ug makatabang kanato nga maghunahuna og una sa atong pamilya, mga higala, ug mga silingan. Kini makatabang kanato nga mahimong mas sensitibo niadtong kinsa tingali mibati nga nag-inusara, gimingaw, o kinsa nagkinahanglan og paghupay ug kalinaw.

Ang kinabuhi sa Manluluwas mao ang hingpit nga ehemplo sa gugma ug panagdait ngadto sa katawhan. Kanunay Niyang gikalimtan ang Iyang Kaugalingon alang sa uban. Ang Iyang walay hinakog nga mga buhat gipakita sa Iyang tanang gibuhat sa matag adlaw sa Iyang kinabuhi ug dili limitado sa piho nga panahon o holiday.

Samtang unahon nato ang uban sama sa gibuhat sa Manluluwas, mosaad ako nga mas maayo natong masinati ang kahulogan sa Pasko ug makakaplag og walay kinutoban nga mga oportunidad sa paghatag sa atong kaugalingon sa hilom ug mabination nga paagi ngadto sa mga tawo nga nagkinahanglan kanato. Kini makatabang kanato nga mas makaila sa Manluluwas ug makakaplag alang sa atong kaugalingon sa gugma, kalinaw, ug nabag-o nga kalig-on nga atong mabati ug mapaambit sa uban.

Samtang mangita kita sa Manluluwas sa tanan natong gibuhat, ang Pasko dili lang usa ka adlaw o usa ka panahon apan kini usa ka kahimtang sa kasingkasing ug hunahuna, ug ang kalipay ug gugma nga nabati sa Pasko mahimong duol ra kanunay.

1. Ang buhong nagpasabot “sa dinaghan.”

2. Ang panagdait usa ka mabination, mahigalaon, o matinabangon nga pagbati ngadto sa laing tawo.

3. Ang pagkahimong tawo nga walay hinakog nagpasabot nga mahimong andam sa pagtabang sa laing tawo bisan kon kini dili sayon.

4. Ang usa ka kahimtang sa kasingkasing ug hunahuna nagpasabot “sa paagi nga kita mobati ug mohunahuna.”