“Pagpaambit sa Gasa sa Pasko,” Alang sa Kalig-on sa mga Kabatan-onan,s Dis. 2021.
Pagpaambit sa Gasa sa Pasko
Paghigugma—Pagpaambit—Pagdapit
Ang pagpaambit sa gasa sa ebanghelyo ni Jesukristo sa normal ug natural nga mga paagi mao ang mga paagi nga kamo makaapil sa labing nindot nga buhat dinhi sa yuta.
Painting [Dibuho] pinaagi ni Michael Malm
Ang pagkatawo, kinabuhi, mga pagtulun-an, Pag-ula, ug Pagkabanhaw ni Jesukristo mao ang labing mahinungdanon sa tanan nga mga gasa sa Pasko. Ang Iyang ebanghelyo magdala og kalipay ngadto sa kalibotan. Ang inyong gugma sa Dios ug sa uban1 naghatag og kadasig sa pagpangutana sa inyong kaugalingon, “Unsaon nako nga makapaambit sa malipayong paagi niining gasa ngadto sa kalibotan?”
Pagpili og usa ka Menu
Nakasulay na ba kamo sa pag-adto sa usa ka restawran diin pipila sa mga pagkaon sa menu dili pamilyar? Niadtong 2018, ang akong asawa ug ako miadto sa usa ka restawran sa Osaka, Japan. Ang menu adunay daghang mga kapilian, kadaghanan niini mga dili pamilyar ug talagsaon kanamo. Usa ka tawo sa among grupo mipili og kalamares (nokos). Apan dili ko ganahan og kalamares, mao nga mipili ko og lain. Ang tanan mipili og lain gikan sa menu. Kaming tanan mitagamtam sa among pagkaon tungod kay ang matag usa namo mipili og usa ka pagkaon nga among nagustohan.
Ang pagpaambit sa gasa sa ebanghelyo mahimong mahisama sa pagkaon diha sa usa ka restawran. Usa ka dakong menu sa mga paagi nga magamit sa pagpaambit sa ebanghelyo o sa pagdapit sa uban sa pagbuhat og butang nga sa kataposan makapalig-on sa hugot nga pagtuo diha ni Jesukristo.
Walay usa nga kinahanglan mobuhat sa tanang butang.
Ang tanan kinsa andam makahimo og usa ka butang.
Walay usa nga kinahanglang mobuhat sa tanang butang nga sila dili mopili.
Dili kinahanglang mokaon og kalamares gawas kon kamo gusto niini. (Yuna pa diay, pagkahuman og sulay sa lamian kaayo nga Hinapon nga kalamares, nagustohan nako kini.) Makapili kamo sa pagdapit sa uban sa pagkat-on mahitungod sa ebanghelyo ni Jesukristo sa mga paagi nga komportable ug natural lang kaninyo, gamit ang inyong kaugalingong mga talento ug mga abilidad. Sa kadugayan mahimong makita ninyo nga ang mga butang nga komportable mapalapdan.
Ang Inyong Menu alang sa Pagpaambit
Busa, unsaon ninyo sa pagsugod? Paghimo og usa ka “menu” sa mga paagi nga kamo makapaambit sa ebanghelyo o mga imbitasyon nga inyong mapadangat. Kini kinahanglang magsugod gikan sa sayon (sama nako magkaon og French fries nga dunay ketchup, nga ganahan gyod nako) hangtod sa mahagiton (sama nako nga nagkaon og kalamares, nga dili ko ganahan sa sinugdanan).
Paghimo og inyong kaugalingong lista uban sa inyong pamilya, ward youth council, korum, o sa klase. Pagmamugnaon! Sulayi sa paghunahuna og 101 ka paagi nga kamo makapaambit o makadapit. Ipakita ang inyong menu diha sa inyong klase sa Young Women o korum sa Aaronic nga Pagkapari. Ang tanan makapili og usa o duha ka butang nga natural nga ilang buhaton. Maghisgot kon unsa ang nahitabo human ang matag tawo nakapili og kalihokan nga mahimong makapadasig. Ang pagbuhat sa inyong pagpili mao ang pagbuhat diha sa hugot nga pagtuo, ug ang Dios motabang kaninyo uban sa Iyang buhat.
Ako mihimo sa akong kaugalingong menu sa mga paagi sa pagpaambit sa gasa sa ebanghelyo. Human sa pagtan-aw sa akong menu, butangi og numero gikan sa kinasayonan hangtod sa kinalisoran nimong buhaton.
-
Sultihi ang usa ka kaila nga ikaw usa ka miyembro sa Ang Simbahan ni Jesukristo sa mga Santos sa Ulahing mga Adlaw.
-
Tawagon ang Simbahan isip “akong Simbahan.”
-
Pakig-istorya sa misyonaryo nga dili usa ka lumad nga makapamulong sa imong pinulongan sulod sa tulo ka minutos ug motabang sa paglitok o sa grammar.
-
Tukma nga moreport sa inyong mga kalihokan uban sa mga kaila. Kon pangutan-on “Kumusta ang imong tapos sa semana?” ayaw pagsulti og, “Maayo.” Hinoon sulti og, “Mipasiugda ko og usa ka hilisgotan sa grupo sa batan-ong babaye sa Dominggo diha sa akong Simbahan. Naghisgot kami mahitungod ni Jesukristo, ug kini nakapahimo nako nga malipayon kaayo sa tibuok tapos sa semana.” O, “Miadto ko sa akong simbahan ug ang choir mikanta og labing nindot nga kanta. Ako kining gilaylay [humming] sa tibuok adlaw.”
-
Sultihi ang mga misyonaryo nga, “Malipayon ko nga moadto sa sunod nga tulumanon sa bunyag.”
-
Dapita ang usa ka higala sa pagtan-aw og video sa Simbahan diha sa inyong cell phone.
-
Moapil sa Matinabangon nga mga Kamot [Helping Hands].
-
Pagkat-on sa pag-ila sa mga ngalan sa sakop sa inyong ward.
-
Motimbaya og usa ka tawo nga wala ninyo mailhi diha sa Simbahan; ingon og, “Hi, ako si _ _ _ _. Gihangop ka namo.”
-
Dapita ang usa ka tawo nga mahimamat sa mga misyonaryo.
-
Mopahiyom sa usa ka tawo diha sa simbahan.
-
Pagdapit og usa ka higala sa pagpangita og katigulangan sa FamilySearch.
-
Kon pangutan-on, “Motuo ka ba sa Dios?” imbis nga moingon og, “Oo,” ingna nga, “Ako mosalig Kaniya tungod sa akong nakat-onan diha sa akong Simbahan.”
Karon Imo nang Turno
Paghimo og imong kaugalingong menu nga maglakip sa pipila sa samang mga butang—apan imo ang mas taas! Inyong menu mahimong maglakip sa pag-post diha sa inyong account sa social media, magdapit og usa ka higala ngadto sa usa ka kalihokan sa Pasko, o idirekta ang usa ka tawo ngadto sa site alang sa Dan-agi ang Kalibotan kampanya sa Pasko.2
Bisan ang pagbuhat og mas sayon nga mga butang diha sa inyong menu makahimo og halandumon nga mga epekto sa inyong kinabuhi ug sa kinabuhi sa uban. Total, “gikan sa gagmay nga mga butang magagikan ang mga dagko.”3 Ang Ginoo wala nagkinahanglan nga kamo mahimong sinati o hanas sa pagpaambit ug pagdapit. Ang Ginoo nagkinahanglan sa inyong “kasingkasing ug andam nga hunahuna.”4
Ipaambit ang Gasa
Ang pagpaambit sa ebanghelyo ug pagdapit sa uban sa pagbuhat diha sa hugot nga pagtuo kinahanglan normal ug natural. Si Presidente Russell M. Nelson midapit kaninyo nga mahimong kabahin sa batan-ong batalyon sa Ginoo.5 Ang pagpaambit sa gasa sa ebanghelyo niini nga paagiha mao ang usa sa mga paagi nga kamo makaapil diha sa talagsaong buhat dinhi sa yuta. Ug hinumdumi, si Presidente Nelson namahayag: “Bisan kanus-a nga mobuhat kamo og bisan unsa makatabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel. Ingon lang niana ka yano.”6
Kamo mahimong kabahin sa paghigugma sa uban, pagpakigbahin og mensahe mahitungod ni Jesukristo ug sa Iyang Simbahan, ug pagdapit sa uban nga makat-on pa mahitungod sa ebanghelyo. Ang Dios mobuhat sa Iyang buluhaton; Siya mopadali sa buhat sa Iyang kaugalingong panahon, ug Siya mogamit sa tanan kinsa andam sa pagtuman niini, gani—ug ilabi na—kamo.7