Atong Gasa sa Paglaom

Ni Eric B. Murdock

Mga Magasin sa Simbahan

Usa ka kasinatian sa propeta nagpakita kanato nga ang Dios makahatag kanato og paglaom kon atong tutokan si Jesukristo.

Nakasulay na ba kamo sukad og usa ka adlaw nga daw wala nay kataposan? Sigurado ko nga kamo motubag og, “Oo!” Kitang tanan makasinati og mga panahon diin ang mga butang dili mahitabo sama sa atong gilaoman. Nasunog ang inyong gipaig-paig nga pan sa pamahaw, gamay ra og kuha sa pasulit, o pagpakiglalis sa usa ka higala siguradong makapahimo sa adlaw nga dili maayo.

Apan aduna pay laing, mas lisod nga mga hagit. Kita mahimong mawad-an og minahal sa kinabuhi, masakit og grabe, o makita ang usa ka tawo nga kita nagpakabana nga mobiya sa Simbahan. Ang mga pagsulay nga sama niini mahimong sobra ra kaayo nga madala ug molungtad og lapas pa sa usa ka adlaw. Ug adunay daghan kaayong kalibotanon nga mga problema nga kita usahay mobati nga ang mga butang wala nay paglaom.

Apan ang kamatuoran mao nga, kita sa kanunay adunay rason nga molaom. Si Mormon miingon, “Ako moingon nganha kaninyo nga kamo magbaton og pagla[o]m pinaagi sa pag-ula ni Kristo” (Moroni 7:41). Tungod niini nga rason, si Presidente Russell M. Nelson miingon, “Dili igsapayan kon unsa ka despirado ang mga panghitabo, hinumdomi, kita kanunayng makabaton og paglaom. Kanunay!”¹

Pagkanindot nga panahon sa paghinumdom niini kay sa panahon sa Pasko, kon kita mosaulog sa pagkatawo sa “kahayag, kinabuhi, ug ang paglaum sa kalib[o]tan”?² Ang mga kasulatan puno sa mga istorya nga makapahinumdom kanato sa atong paglaom diha ni Jesukristo. Sa pagkatinuod, ang mga kasulatan nahisulat aron sa pagpamatuod kaniya aron nga kita “makaangkon og pagla[o]m” (Mga Taga-Roma 15:4).

Usa niining mga mensahe sa paglaom miabot kapin sa 100 ka tuig ang milabay. Miabot kini sa usa ka mangitngit nga panahon sa kasaysayan, ngadto sa usa ka propeta sa Dios kinsa miagi og mahagiton nga panahon sa iyang kinabuhi. Nagtudlo kini kanato nga kita makakaplag sa atong labing talagsaong paglaom sa Langitnong Amahan ug ni Jesukristo tungod sa ilang hingpit nga gugma alang kanato ug sa maulaon nga grasya sa Manluluwas.

Usa ka Panan-awon sa Kalibotan nga Nanginahanglan

Ang tuig 1918 usa ka malisod ug panahon sa pagsulay. Ang kalibotan anaa sa usa ka tibuok kalibotan nga pandemya—sama sa anaa kanato karon. Kadto nga pandemya, gumikan sa trangkaso, mikatap sa tibuok kalibotan ug mipatay og minilyon. Ang Unang Gubat sa Kalibotan miulbo usab niadtong 1914. Ang kabangis niana nga gubat misangpot sa dili matukib nga kalaglagan, kamatayon, ug kagol-anan.

1918 nga makasaysayanon nga litrato sa mga nars nga nagsul-ob og mask

makasaysayanon nga litrato gikan sa Unang Gubat sa Kalibotan

Sa pagsagubang niining tibuok kalibotan nga mga kalamidad, daghan ang naghunahuna: “Aduna ba kahay kinabuhi human sa kamatayon? Unsay mahitabo kon kita mamatay? Makita ba nako pag-usab ang akong mga minahal?”

Si Presidente Joseph F. Smith (1838–1918), ika-unom nga Presidente sa Simbahan, mibati usab og personal nga trahedya niadtong 1918. Ang iyang kinamagulangan nga anak, si Elder Hyrum Mack Smith, usa ka Apostol, namatay nga wala damha. Pipila ka bulan ang milabay, ang asawa ni Hyrum, si Ida, namatay, nagbilin og lima ka anak.³

Pamilyang Hyrum Mack Smith — Si Presidente Joseph F. Smith mibati og personal nga trahedya niadtong 1918. Ang iyang kinamagulangan nga anak nga lalaki, si Hyrum Mack Smith, namatay nga wala damha. Pipila ka bulan ang milabay, ang asawa ni Hyrum, si Ida, namatay, nagbilin og lima ka anak.

Si Presidente Smith namatyan og mga minahal sa kinabuhi sa una. Singko anyos pa lang siya sa dihang ang iyang amahan, si Hyrum Smith, ug ang iyang uyoan, ang Propeta nga si Joseph Smith, gipatay didto sa Bilanggoan sa Carthage. Ang iyang inahan, si Mary Fielding Smith, namatay sa dihang siya nag-edad pa og 13. Si Presidente Smith nawad-an usab sa iyang asawa, si Sarah, ug 13 ka anak.⁴

Apan kining mga kamatayon niadtong 1918 nakahatag og bag-ong pagbangotan. Nangita og kahupayan gikan sa iyang kasubo, midangop si Presidente Smith ngadto sa pagtuon sa kasulatan ug pag-ampo. Samtang nagbasa siya gikan sa Bag-ong Tugon ug namalandong sa Pag-ula ni Jesukristo (tan-awa sa Doktrina ug mga Pakigsaad 138: 1–3), siya adunay usa ka panan-awon sa kalibotan sa espiritu. Nakita niya ang matarong nga mga espiritu nga naglantaw sa unahan nga may paglaom sa ilang kaluwasan gikan sa kamatayon (tan-awa sa Doktrina ug mga Pakigsaad 138:11–15). Nakakita usab siya sa Manluluwas nga nagtudlo sa ebanghelyo niadtong anaa sa kalibotan sa espiritu taliwala sa panahon sa Iyang kamatayon ug sa Pagkabanhaw (tan-awa sa Doktrina ug mga Pakigsaad 138:19). Ug siya nakasaksi sa Manluluwas nga nagpadala og matarong nga mga sulugoon aron sa pagtudlo niadtong wala nakahigayon sa pagpaminaw sa ebanghelyo niining kinabuhia.

Kini nga panan-awon miabot sa dihang ang kalibotan anaa sa tuman nga panginahanglan sa paglaom. Si Presidente M. Russell Ballard, Akting nga Presidente sa Korum sa Napulog Duha ka Apostoles, nagtudlo nga kining panan-awon “mipadayag sa mas hingpit sa kahiladman ug kalapdon sa plano sa Langitnong Amahan alang sa Iyang mga anak ug sa makatubos nga gugma ni Kristo ug walay makatupong nga gahom sa Iyang Pag-ula.”⁵

Malaumon nga mga Kamatuoran

Ang mga espiritu nga nakita ni Presidente Smith diha sa panan-awon maisip sa pagkabulag sa ilang mga espiritu gikan sa ilang mga lawas diha sa kamatayon “ingon sa usa ka ulipon” (Doktrina ug mga Pakigsaad 138:50). Ang panan-awon ni Presidente Smith nagsiguro kanato nga kining “pagkaulipon” dili permanente. Pinaagi sa Manluluwas, kita adunay paglaom nga usa ka adlaw kita mabanhaw ug “makadawat og usa ka kahingpitan sa kalipay” (Doktrina ug mga Pakigsaad 138:17).

Kini nga panan-awon usab naghatag kanato og kasiguroan nga ang Langitnong Amahan ug si Jesukristo nag-andam og agianan alang sa matag kalag nga makabaton og kahigayonan nga makadawat sa celestial nga himaya ug walay kataposan nga kalipay uban Kanila. Tinuod kini bisan alang niadtong kinsa nagpuyo ug “namatay nga walay kahibalo [sa] ebanghelyo, kinsa unta makadawat niini” (Doktrina ug mga Pakigsaad 137:7).

Kita dili kinahanglan mopaabot hangtod sa sunod nga kinabuhi aron makabaton og paglaom. Makabati kita og paglaom karon kon kita mobutang sa atong hugot nga pagtuo ug pagsalig diha ni Jesukristo. Ang paglaom mao ang gasa sa Espiritu (tan-awa sa Moroni 8:26), ug kini moabot ngari kanato tungod sa Pag-ula ni Kristo.

Usa ka Espesyal nga Paagi nga Mobati og Paglaom

Sa dihang si Presidente Smith namalandong sa ebanghelyo ug sa Pag-ula sa Manluluwas, siya nakadawat og pagpadayag nga nakahatag og kahupayan ug paglaom ngadto kaniya ug sa nahasol nga kalibotan. Ang pagpamalandong labaw pa sa paghunahuna. Nagpasabot kini sa paghinutok og lawom kabahin sa usa ka butang—ug kini makatabang kaninyo nga mobati og dugang nga paglaom. Paggahin og panahon niining Pasko sa pagpamalandong kabahin sa Manluluwas.

batan-ong babaye nga nagbasa sa mga kasulatan

Hunahunaa kon unsay ipasabot sa Iyang pagkatawo, kinabuhi, mga pagtulun-an, ug Pag-ula alang kanimo. Kini makapabukas sa imong kasingkasing ug tugotan ang Espiritu Santo sa “[p]agsulti og kalinaw nganha sa imong hunahuna” (tan-awa sa Doktrina ug mga Pakigsaad 6:23). Kini mopanalangin sa imong kinabuhi og kahayag ug paglaom nga bisan kon ang kinabuhi lisod.

Kami moawhag kaninyo nga “mopadayon uban ang pagkamakanunayon kang Kristo, magbaton sa usa ka hingpit nga kahayag sa pagla[o]m, ug usa ka gugma sa Dios ug sa tanan nga mga tawo.” Ug kon kamo “mopadayon sa unahan, magbusog sa pulong ni Kristo, ug molahutay hangt[o]d sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:20).