“Giunsa Namo Pagsaulog ang Pasko,” Alang sa Kalig-on sa mga Kabatan-onan, Dis. 2021.
Giunsa Namo Pagsaulog ang Pasko
Adunay usa ka ebanghelyo ug usa ka Manluluwas. Apan sa tibuok kalibotan, gisaulog nato ang Iyang pagkatawo sa daghang nagkalain-lain nga mga paagi.
Ganahan ba mo maglakaw latas sa aguho nga mga kahoy [pine trees] nga natabonan og niyebe matag Disyembre? Unsa kaha kon magsuroy-suroy ilawom sa mga kahoy nga palma samtang init kaayo ang adlaw? Magpasiga ba kamo og mga kandila alang sa Pag-abot [Advent]? Mohimo ug mopakigbahin og tradisyonal nga mga pagkaon? Magsugba sa may baybayon?
Pipila ka mga batan-on gikan sa tibuok kalibotan naghulagway kon giunsa nila pagsaulog ang Pasko. Ug ilang gihulagway kon sa unsang paagi ang mga butang medyo lahi sa miaging tuig atol sa COVID-19 nga pandemya.
Indonesia
Jakarta, Indonesia
“Ang Pasko sa Indonesia dili gayod usa ka puti nga Pasko, ug kini dili tugnaw. Usab, bisan og tingali adunay pipila ka dekorasyon sa Pasko sa nagkalain-laing mga dapit diha sa mga mall, mga cafe, o mga hotel, ang kadaghanan sa mga tawo dinhi dili magsaulog og Pasko.
“Bisan pa niana, ang akong pamilya magsaulog kutob sa among mahimo. Ganahan ko mokaon og mga biskwit ug moinom og init nga sikwate, mamalit og bag-ong mga dekorasyon sa Pasko, ug moadorno sa Christmas tree.
“Sa miaging Pasko kauban nako ang akong mga ginikanan ug ang akong igsoong lalaki lamang. Wala nako mahimamat ang akong ubang mga paryente sama sa akong mga uyoan, iyaan, ig-agaw, ug apohan tungod sa COVID-19. Daw kini mingaw ug haw-ang tungod kay kasagaran magtapok kami.
“Bisan pa man sa among mga kahimtang, kini wala makapugong kanamo sa paghinumdom sa kahulogan sa adlaw sa Pasko, nga mao ang pagkatawo sa atong Manluluwas, si Jesukristo. Sa tibuok namong pagsaulog sa Pasko, nakakaon kami og lamian nga pagkaon ug nakasul-ob og nindot nga sinina. Swerte lang ako nga nakadawat og gasa, ug nakadawat ako og daghang mabination ug mahigalaon nga virtual nga mga panimbaya sa Pasko gikan sa nindot nga mga tawo sa akong palibot. Talagsaon kini nga mga panalangin, ug nakatutok gihapon ako kang Kristo samtang akong gihinumdoman nga magmapasalamaton sa tanang butang.”
Abigail S., 14, Jakarta, Indonesia
Germany
Munich, Germany
“Magsugod ang Pasko alang kanamo sa Disyembre 1. Giadornohan ang tibuok balay. Ang mga merkado sa Pasko kasagaran mangabli sa siyudad sa kataposan sa semana sa una nga Pag-abot.
“Ang tanan magsugod sa pag-abli sa mga pultahan sa ilang mga kalendaryo sa Pag-abot sa unang adlaw sa Disyembre.
“Sa Disyembre 6, ang tradisyon nag-ingon nga si St. Nicholas moabot. Magdala siya og mga liso nga makaon, prutas, ug tsokolate. Pun-on niya ang mga botas nga gilimpyohan ug gipagawas sa mga bata sa miaging gabii. Sa Bisperas sa Pasko, Disyembre 24, magkauban namong saulogon ang Pasko ug dawaton ang among mga gasa.
“Dagkotan namo ang kandila sa Pag-abot matag Dominggo sa Disyembre, ug manganta kami og mga awit sa Pasko, mangaon og gingerbread, ug mangnom og juice. Kon panahon na aron mangabli sa among mga gasa, una kinahanglan kaming mangita og aslom nga pipino diha sa Christmas tree. Bisan kinsa kadtong makakita sa pipino maoy unang makaabli sa ilang gasa.
“Atol sa COVID-19 nga pandemya, ang among pamilya misaulog sa mga Dominggo sa Pag-abot pinaagi sa mga video chat aron mobati kami nga mas suod sa usag usa.
“Sirado ang tanang mga merkado sa Pasko, ug wala kami tugoti nga mag-party sa eskwelahan. Hinuon, nalingaw ra kami sa panahon sa Pasko tungod kay kami adunay mas daghang panahon nga magluto og dungan og mga biskwit. Sa among mga eskwelahan, mamutos kami og mga gasa alang sa mga bata nga nanginahanglan didto sa ubang mga nasod.
“Matag tuig manan-aw kami og mga salida sa pagkatawo ni Jesukristo.
“Matag hapon sa Dominggo sa Pag-abot, manganta kami mahitungod ni Jesukristo. Nagpahimutang kami og belen sa Pagkatawo ni Jesukristo sa among sala nga nagpahinumdom kanamo matag adlaw sa atong Manunubos.”
Samara, Saliha, ug Sarai S., Bavaria, Germany
India
“Niining miagi nga tuig ang Pasko espesyal kaayo kanako. Kini lahi kaayo kaysa sa nangaging mga Pasko. Karong tuiga miapil ako sa pagtabang sa daghang mga tawo atol sa pandemya.
“Bisan og dili kami makasimba o makaapil sa pipila sa among normal nga mga kalihokan sa Pasko, ang pagtabang sa uban makapabayaw gihapon ug mipabati kanako sa hingpit nga kalipay sa Pasko. Ang akong pamilya nagbinayloay og mga gasa sa usag usa. Nagluto usab kami og lamian nga pagkaon ug gidalit kini ngadto sa daghan sa among mga higala sa laing mga tinuohan.
“Makugihon nakong gibuhat ang Dan-agi ang Kalibotan nga inisyatibo ug miserbisyo sa mga tawo. Ang pagbuhat sa ingon nakahatag kanako og kalinaw ug dako nga kalipay. Nasayod ako nga ang Langitnong Amahan nahigugma kanako ug sa tanan sa Iyang mga anak. Nasayod ako nga si Jesukristo mianhi sa kalibotan aron sa paghigugma ug sa pagluwas kanato.”
Ruthwik V., 14, Bengaluru, India