“Usa ka Anghel nga nagsul-ob og Kahil nga mga Botas,” Alang sa Kalig-on sa mga Kabatan-onan, Dis. 2021.
Usa ka Anghel nga nagsul-ob og Kahil nga mga Botas
Unsa kaha ang ikatanyag ngadto sa Ginoo sa usa ka anghel nga nagsul-ob og maot nga mga botas?
Paghulagway pinaagi ni Dean MacAdam
Usa ako niadtong mga tawo nga ganahan sa tingtugnaw. Apan sa pagkatinuod dili ko ganahan nga mobati nga gitugnaw.
Wala lang koy swerte nga ang akong stake mipahigayon og pagdrama-drama sa pagkatawo sa Manluluwas. Sa gawas. Sa gabii. Atol sa kinatugnawan nga Pasko sulod sa katuigan. Sa Canada. Ang akong papel mao ang usa ka anghel niining istorya sa Pagkatawo ni Jesukristo, mao nga maayo na lang nga ang akong bukad nga kupo makatago sa akong tingtugnaw nga karsones, mga guwantes, ug mga bandana.
Apan walay bisan unsa, dili gani ang bukad nga kupo, ang makapabiling init sa akong mga tiil. Gikuyog ko sa akong mama aron mamalit og mas baga nga mga botas, ug gipalit namo ang labing mainiton nga tan-awon nga parisan sa sapatos nga among makita: usa ka parisan sa kahil nga mga botas nga adunay pula nga mga liston. Kini nga mga botas ingon og makalahutay kini og panaw sa Antarctic—ug niining kinagrabehan nga tingtugnaw, gikinahanglan nako kana. Apan gibati nako nga ako ang labing kataw-anan sukad nga 17 anyos nga anghel sa Pagkatawo ni Jesukristo. Unsa nga matang sa langitnon nga sinugo ang magsul-ob og kahil nga mga botas?
Usa ka Naulaw nga Anghel
Sa gabii sa among kataposang praktis nga magsul-ob og sinina sa drama, miadto ko sa entablado nga misulay sa pagbira paubos sa akong kupo aron sa pagtabon sa akong mga botas. Bisan unsay akong gibuhat, mogimaw gihapon kini sa akong bukad nga anghel nga sinina.
Swerte lang, ang ubang mga anghel ug ako nagbarog nga nakatago ang tunga sa luyo sa usa ka backdrop alang sa dakong panahon sa pasundayag, nga nagpasabot nga walay makakita sa akong sapatos.
Apan dihay usa ka bahin sa kataposan nga ang tanan nga mga karakter sa istorya sa Pagkatawo ni Jesukristo—mga magbalantay sa karnero, mga sundalo nga Romano, mga Mago, mga tawo sa lungsod, ug mga anghel—mosulod gikan sa matag habig sa panggawas nga teyatro aron moluhod sa atubangan sa Manluluwas.
Kini nga bahin sa pasundayag gilaoman nga mahimong usa ka malinawon nga gutlo alang sa mga nanan-aw ug sa mga sakop sa drama aron sa pagpamalandong sa pagkatawo sa Manluluwas. Apan sulod sa unang duha ka gabii, nahadlok ako niini. Ang tanan nakong mahunahunaan mao ang unsaon nako pagluhod diha gayod atubangan sa pundok sa mga tawo, ug nga sila makakita sa akong maot, hayag nga kahil nga mga botas. Niana nga higayon, ang pagkahimong anghel mas makauulaw kay sa balaan.
Ang Prinsipe sa Kalinaw
Sa ikatulo nga gabii, naghulat ako sa luyo sa entablado kuyog ang tanang uban nga mga anghel, ug kalit lang akong nagmahinamon sa pagpakigbahin niining kataposang talan-awon sa Pagkatawo ni Jesukristo ngadto sa mga nanan-aw. Oo, kini usa ka importante nga higayon—ang mga nanan-aw makakita og mga anghel nga mosulod sa tanang habig aron moluhod sa atubangan sa bata nga Manluluwas. Unsa kana kanindot?
Nakalimot ko sa tanan mahitungod sa akong mga botas samtang gibasa sa tigsaysay ang Isaias 9:6, nga mao ang akong sinyas: “Natawo alang kanato ang usa ka bata; gihatag kanato ang usa ka anak nga lalaki, ug siya ang magmando sa tanan ug nganlan siyag “Maalamong Magtatambag,” “Dios nga Gamhanan,” “Amahan Hangtod sa Kahangtoran,” “Prinsipe sa Pakigdait.”
Samtang migawas ko, nawala ang akong tanan nga kabalaka. Gibati nako nga sama sa usa sa langitnong mga anghel—kadtong gamhanan, nahimaya nga mga binuhat nga didto sa pagkatawo ni Kristo.
Ang ubang mga anghel ug ako miluhod tupad sa mga sundalo ug mibutang og makapahupay nga mga kamot diha sa mga abaga sa mga magbalantay sa karnero. Kaming tanan nagpakita sa among pagpaubos, balaang pagtahod, ug gugma alang niining gamay nga bag-ong natawo nga bata. Ug nabati nako kini—ang walay kinutoban nga gugma nga aduna ang akong Manluluwas alang sa mga tawo sa lungsod, sa mga tigkolekta og buhis, ug kanako. Nasayod ako nga kini nga Bata—ug ang katubsanan nga Iyang gidala—mao ang labing importanting gasa nga nadawat sukad sa yuta.
Pagpamatuod kang Kristo
Sa dihang migawas ko sa entablado atol sa sunod nga mga pasundayag, wala ako mobati nga ingon og usa lang ka batang babaye nga nagsul-ob og bukad nga sinina ug kahil nga mga botas. Kabahin ako sa “pagpangalagad sa mga anghel” nga nagpamatuod sa Manluluwas (Moroni 7:25), bisan sa akong kaugalingong gamay nga paagi. Wala na ako magpakabana kon ang mga nanan-aw makakita sa akong mga sapatos—tungod kay kon makita ang akong kahil nga mga botas, nagpasabot kini nga ako nagluhod atubangan sa akong Manluluwas.