“Viiga o le Kerisimasi i le salafa o le Lalolagi,” Mo Le Malosi o le Autalavou, Tes. 2021.
Viiga o Le Kerisimasi i le salafa o le Lalolagi
Ua faasoa mai e ni talavou se toafa a latou viiga o le Kerisimasi e sili ona fiafia i ai.
O le Kerisimasi e faamanatuina i auala eseese i le salafa o le kelope, ma o viiga o le Kerisimasi e tele lava ina eseese foi. Ae po o a lava pese e te usuina, o savali o nei viiga e fesootai ai i tatou i le tasi ma le isi—ma ia Iesu Keriso. O se vaaiga lenei i tala a ni talavou se toafa i le salafa o le lalolagi e uiga i le ala e fesoasoani ai a latou viiga o le Kerisimasi ia i latou e faalatalata atili atu ai i le Faaola.
“Po Filemu! Po Paia!”
Kasen L., 14, mai Aukilani, Niu Sila, e fiafia i le filemu lea e sau mai le usuina o viiga o le Kerisimasi. “O se tasi o viiga e sili ona ou fiafia i ai o loo matou usuina i Niu Sila o le ‘Po Filemu.’ I le avea ai o se aiga ma i le Peraimeri, sa matou aoaoina ai i gagana Samoa, Maori, Toga, ma isi gagana o le Pasefika. E aumaia le filemu i le toatele o tagata ma ta‘u mai ia te a’u o le po na soifua mai ai Keriso e Paia ma o Ia o lo’u Faaola.
“O musika o le Kerisimasi e fesoasoani ou te manatua ai le Faaola. Pe a ou faalogo i viiga o le Kerisimasi, ou te lagonaina le Agaga. E fesoasoani ou te lagona ai ua tasi le laasaga ua ou latalata atili atu ai i le Tama Faalelagi ma Iesu Keriso.”
“Le Lalolagi ia Fiafia, Lou Tupu ia talia”
O Lumiere S., 16, mai Montagnes, Côte d’Ivoire, e mauaina le filemu i le iloaina o le a toe afio mai Keriso. O lana viiga o le Kerisimasi e sili ona fiafia i ai o le “Le Lalolagi ia Fiafia.” “Ou te lagona ai le fiafia i taimi uma ona ou te iloa o le a toe afio mai lo tatou Faaola. E sili ona ou fiafia i le laina muamua: ‘Le lalolagi ia fiafia, lou Tupu ia talia.’ O se toomaga mo a’u le iloa o le a Ia toe afio mai ma toe faaleleia le lalolagi mai ona eleelea.”
“Faaola se Moliga’o”
Mina H., 16, mai Vestland, Nouei, e fiafia i le auala e aumaia ai e viiga o le Kerisimasi le olioli.
“E tele a’u viiga masani ou te fiafia e pese ai i le taimi o le Kerisimasi. O se tasi o i latou ua ta‘ua o le ’Deilig er jorden’ [‘Fairest Lord Jesus’; ua lauiloa foi o le ‘Faaola Matagofie’ (tagai Tusipese a Tamaiti, 62–63)]. O viiga masani e na ona aumaia ai le olioli ma lagona fiafia o le Kerisimasi.
“O na viiga masani o le Kerisimasi ua matua lelei lava ona tusia, i se ala faafatusolo, faapea foi ma le olioli. O le vaega e sili ona ou fiafia i ai o le pese ‘Deilig er jorden’ o le taimi lea e fai mai ai, ‘Filemu i le lalolagi. Tagata, olioli. O le asō ua fanau mai ai le Faaola ia i tatou.’”
“E Maeu Le Fiafia o Lenei Vaitau”
O Jairus C., 16, mai Bohol, Filipaina, ua lagonaina le taua o viiga o le Kerisimasi ona latou te tuufaatasia o tatou mafaufauga i le Faaola. “O viiga o le Kerisimasi e aumaia ai le olioli ma le manatuaina o le soifua mai o Keriso i tagata. O upu o se vaega tele o viiga o le Kerisimasi aua latou te faamanatu mai ia te a’u ia Iesu Keriso—le auala e avea ai o Ia ma se faaa’oa’o sili ia i tatou.”
O se tasi o viiga faaFilipaina masani o le Kerisimasi e fiafia i ai Jairus o le “Kasadya Ning Táknaa” [“E ma’eu le Fiafia o lenei Vaitau”]. “O lenei pese e faagaeetia ai tagata,” o lana tala lea. “E i ai lona pa’o ola, lea e aumaia faatasi ai tagata. A aunoa ma viiga o le Kerisimasi, atonu o le a le fiafia le Kerisimasi, pe le fiafia po o le faagaeetiaina. E taua viiga o le Kerisimasi ia te a’u.”