“Auala e Faamalosia ai Lou Aiga,” Mo Le Malosi o le Autalavou, Tes. 2021.
Sau, Mulimuli Mai ia te A’u
“O Le Aiga: O Se Folafolaga i le Lalolagi”
Auala e Faamalosia ai Lou Aiga
E mafai ona e faia se eseesega tele atu i lou aiga nai lo le mea e te ono mafaufauina.
Pe a oo mai i le fesoasoani e faamalosia lou aiga, o nisi nei o galuega e le tatau ona lagonaina le faigata tele: ia fiafia faatasi! O lenei taitaiga e sau sa’o lava mai le “O Le Aiga: O Se Folafolaga i le Lalolagi,” na tuuina mai e le Au Peresitene Sili ma le Aufono a Aposetolo e Toasefululua.
O le auai i “gaoioiga faafiafia tuufaatasi” o se aiga o loo lisiina o se tasi o eria e mafai ona faatumauina ai le malosi ma le manuia o lou aiga. E valu isi aitema i lena lava lisi e tasi, ae se’i o tatou nonofo i le lisi lenei mo sina taimi umi teisi atu.
O gaoioiga faafiafia tuufaatasi e aumaia ai i tatou ia vavalalata atili ma fesoasoani e toefuatai lo tatou malosi.
Sa iloa e uluai paionia o le Ekalesia se mea se tasi pe lua e uiga i le taua o gaoioiga e faapaleni ai se aso faigata. E masani ona faailogaina e aiga i musika ma siva e faagaeetia ai o latou agaga, e tusa lava pe i le mavae ai o se savaliga umi o le aso.
O se tasi lenei o tala puupuu a paionia e le mailoa e uiga i lenei faiga: “Po o le a lava le faigata o le malaga i le ao, pe a oo mai le pogipogi ma faatu ai le tolauapiga, o le taumafataga o le afiafi na aai ai, e galo lava le vaivai o le aso i se siva.”1
E i ai lau galuega o meaaoga: ia fiafia faatasi ma lou aiga! O le a se mea o loo e faatali i ai?
Ioe, o le folafolaga i le aiga o loo lisi atu ai isi aitema e fesoasoani i aiga. O le tasi e faapitoa lava le o faatasi ma gaoioiga faafiafia tuufaatasi: galue.
Galuega
Faatali, galue? Pe le o le faafeagai ea lena o le fiafia? Atonu e faaosoosoina se tasi e fesili, “E mafai faapefea e nei aafiaga uma e lua ona fesoasoani e faamalosia se aiga?”
Mafaufau i tipolo ma le suka. E le taitai ona talitutusa le tofo. Ae o le tuufaatasia i totonu o le vai, ona e maua lea o le vai tipolo.
I se saunoaga i le konafesi aoao e uiga i le taua o le galue malosi, sa ta‘ua ai e Elder D. Todd Christofferson o le Korama a Aposetolo e Toasefululua le ala e o faatasi ai nei mataupu faavae e lua.
“Ua uma ona ou talanoa atu i le viviiina o le galue, ua tatau foi la ona ou faaopoopo atu se upu agalelei mo taimi paganoa,” o lana tala lea. “E pei lava ona tuuina atu e se galuega faamaoni i le malolo lona suamalie, o faafiafiaga lelei o le uo ma o le soa tumau lea a le galue.”2
A aunoa ma le galue, tatou te le aai, olioli i malutaga, pe ausia soo se mea lava. O le galue foi e aumaia ai le faamoemoe i o tatou olaga e le mafai ona tatou maua i se isi lava ala. Na aoao mai Elder Neal A. Maxwell (1926–2004) o le Korama a Aposetolo e Toasefululua, “O le galue o se tulaga manaomia faaleagaga e tusa lava pe afai, mo nisi, o le galue e le o se mea e manaomia i le tamaoaiga.”3
O le galulue o se aiga e mafai ona faauigaina o le faamaeaina o feau, auauna atu i isi, po o le mauaina foi o tupe maua. Po o le a lava lona ituaiga, tou te vavalalata atili ai.
Sa soifua a’e Elder Dieter F. Uchtdorf o le Korama a Aposetolo e Toasefululua i se aiga ma se olaga toafimalie—seia oo ina amatalia le Taua Lona Lua a le Lalolagi. Ona aveesea lea o mea uma a lona aiga ma avea ma tagata sulufai.
Ae sa latou tutu faatasi! I le talanoa ai e uiga i lenei taimi, na saunoa ai Elder Uchtdorf (a o avea Peresitene Uchtdorf o le Au Peresitene Sili), “E oo mai i le asō, ua matua faagaeetia lava a’u i le ala na galulue ai lo‘u aiga ina ua leiloloa mea uma i le mavae ai o le Taua Lona II a le Lalolagi! Ou te manatua lo‘u tama … na galue i ni galuega faigata se tele. … Sa amata e lo’u tina se fale ta lavalava ma e le mafaitaulia itula sa faigaluega ai o ia i galuega faatauvaa mamafa. Sa ia faafaigaluegaina i ma’ua ma lo’u tuafafine i lana pisinisi. O le i ai o la’u uila na avea ai a’u ma kiliva e piki ma momoli tagamea. Sa manaia le lagona o le mafai ona fesoasoani i le aiga i se auala itiiti.4
O le galue malosi e aumaia ai faamanuiaga, faamalieina, ma, ioe, vavalalata o se aiga.
Faaopoopoina o le Malosi i Lou Aiga
Ioe, e na o le lua na o uiga paia e iva mai le folafolaga i le aiga. A o tatou vaavaai puupuu atu i le isi fitu, mafaufau e tusi i lalo se tasi pe lua o mea e iva e te manatu e mafai ona e galue ai, mo le taimi nei, e fesoasoani e faamalosia ai lou aiga.
_____________________________________________________________________________________________________________
Faatuatua
I le talalelei, i le pito i luga o le lisi—o le uluai mataupu faavae o le talalelei—o le “faatuatua i le Alii o Iesu Keriso” (Mataupu Faavae o le Faatuatua 1:4).
O le tele o le ola o lou aiga i le talalelei a Iesu Keriso, o le tele foi lea o lou mauaina o le fesoasoaniga a le lagi i totonu o lou aiga. E moni lenei mea e tusa lava pe na o oe le tagata o loo ola i le talalelei i lou aiga. O le malamalama o Keriso e faia ai se eseesega mamana ia i latou o e e fesootai i ai.
Fai lau vaega e aumai ai le faatuatua faaopoopo i lou aiga.
Tatalo
O le tatalo faatasi o se aiga e mautinoa lava le aumaia vavalalata atili—aemaise lava pe a e tatalo mo tagata o lou aiga. Na aoao mai Elder David A. Bednar o le Korama a Aposetolo e Toasefululua, “Pe mata e faapena foi i o tatou taitoalua, o fanau, ma isi tagata o le aiga … ona lagonaina le mana o a tatou tatalo i le Tama mo o latou manaoga ma naunauga patino?”5
Mo se faataitaiga, e sili atu ona faigata le tumau i le ita i lou uso mo se mea na tupu i le amataga o lena aso pe a ia tatalo leotele i le taimi o tatalo faaleaiga ina ia manuia lau suega o loo loma i le aoga.
O le tatalo mo tagata taitoatasi o le aiga i igoa e mafai ai ona e mafaufau e uiga i tagata taitoatasi ma ona manaoga. Latou te iloa foi o loo e mafaufau ia i latou.
Faamagaloga, Faaaloalo, ma le Alofa
O nei uiga e tolu e masani ona galulue faatasi. O se vaega o le taulimaina o le tasi ma le isi i le alofa ma le faaaloalo o le naunau lea e faamagalo e le tasi le isi. A tatou faamagalo atu ma faamagaloina, o le a tuputupu a’e le faaaloalo ma le alofa tatou te lagonaina i le tasi ma le isi.
Na aoao mai Peresitene M. Russell Ballard, o le Sui Peresitene o le Korama a Aposetolo e Toasefululua, “E leai se mea e sili atu ona fesootai i le fiafia—e le gata ia i tatou ma a tatou fanau—nai lo le lelei ona tatou alolofa ma fegalegaleai i totonu o le aiga.”6
Taulima e le tasi le isi ma sina agalelei teisi atu. Ia faateleina le alofa, faaitiitia le ita.
Agaalofa
O le faaalia o le agaalofa i isi tagata o le aiga o lona uiga o le manao e fesoasoani e aveese nisi o a latou avega ma fesoasoani ia i latou i a latou tauiviga.
O Iesu o lo tatou faataitaiga atoatoa mo le faaalia o le agaalofa. Ua na o se tasi lenei o le tele o faataitaiga i tusitusiga paia.
Ina ua savali ese Iesu mai Ieriko, sa valaau atu ni alii tauaso se toalua ia te Ia i tafatafa o le auala. Sa taumafai le motu o tagata e faafilemu nei alii, ma fai mai e tatau ona “ia la faalologo” (Mataio 20:31).
O pei ea i tatou ma o tatou aiga o lena motu o tagata? O nisi taimi e faigofie ai ona faate‘aese se tagata o loo fesili mai mo se fesoasoani. “E le o le taimi nei!” o nisi taimi tatou te fia fai atu ai.
Ae sa faaali mai e Iesu ia i tatou se auala sili atu. Ina ua valaau atu alii tauaso e toalua i le leotele uma mo Ia, sa fesili Iesu, “Se a se mea lua te mananao i ai ou te faia mo oulua?” (Mataio 20:32).
Sa la talosagaina ina ia faamaloloina lo la’ua tauaso. “Ona mutimuti vale ai lea o le alofa o Iesu, ua pa’i atu i o la mata; ona vaai loa ai lea o la mata, ona la mulimuli mai ai lea ia te ia” (Mataio 20:33–34).
O le agaalofa e le faigofie i taimi uma, ae e atagia ai le alofa o le Atua i taimi uma.
O Le Mana o Oe
I le iuga, atonu e faaosoosoina oe e mafaufau, “Ae ua na o a’u o se tagata e toatasi. O lea le tele e mafai ona ou fesoasoani ai?” O le tali o le, e tele lava! Tuu le folafolaga i le aiga i le suega.
E aoga ia te oe ma lou aiga le taumafaiga.