Fesili ma Tali

“E faapefea ona ou maua le lototele e mulimuli ai i uunaiga faaleagaga?”

“O le a afio mai le Agaga Paia ma o le a musuia oe i mea e mafai ona e faia mo isi tagata. Pe a e alu ma fai na mea, ua e i ai i le feau a le Alii, ma a e i ai i le feau a le Alii, ua e agavaa mo le meaalofa o le Agaga Paia.”

Peresitene Henry B. Eyring o le Au Peresitene Sili, i le “President Eyring 1990s,” Deseret News, Ape. 2, 2009, deseretnews.com.

Manatu Moni

“Ou te lagona le lototele e ala i le tatalo. Pe a ou tatalo i lo‘u Tama Faalelagi ma le manatu moni i lo’u loto, ou te iloa e i ai Lona Agaga e faatasi ma a‘u. E ala i Lona Alo Pele, ou te iloa o le a faamanuiaina a’u pe a ou mulimuli i uunaiga faaleagaga.”

Agbonavbare Bright I., 19, Nigeria

Anapogi ma Faatinoga

“Mo a’u, ia maua le lototele e mulimuli ai i musumusuga ou te maua, ou te tatalo ia iloa pe moni lava mai le Alii. Ona ou faia lea o se tautinoga e mulimuli i le faaaliga, faatasi ai ma le tele o tatalo ma anapogi.”

Obed M., 19, Malo Temokarasi o Congo

Lagonaina o le Olioli

“Pe a ou manaomia le lototele e faalogo ai i uunaiga, ou te mafaufau i le fiafia e maua ai e lo’u Tama Faalelagi. Ma pe a ou faalogo i uunaiga e auauna atu i isi, e sili atu lo’u fiafia ma maua se aso sili atu. O le i ai o le faatuatua i le Alii e fesoasoani ou te maua ai le lototele e mulimuli ai i uunaiga faaleagaga.”

Alyssa S., Iuta, ISA

Faalapotopotoga e Lagolagoina

“Afai e te siomia oe lava i tagata o e lagolagoina le faia o faaiuga lelei, o le a faigofie atu ona mulimuli i uunaiga. Faatuatua i le fuafuaga a le Alii. E finagalo o Ia i mea e sili ona lelei mo oe.”

Charlie R., Alberta, Kanata

O Le Faia o le Galuega a le Atua

“Ou te manatua o uunaiga faaleagaga e sau mai le Atua ma e na o mea lelei Na te tuuina mai ia i tatou e fai. Ua ia i tatou le mana e fesoasoani ai i isi ia o mai i le Atua—pe a tatou faatinoina uunaiga, o loo tatou faia le galuega a le Atua. E te le iloa lava le ituaiga o aafiaga o le a e maua pe afai e te faatinoina se uunaiga!”

Sara S., 17, Kalefonia, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

Aisea e taua ai tulaga faatonuina o le Ekalesia? E faapefea ona ou maua se molimau e uiga i ai?

Auina mai lau tali ma le ata a o le’i oo i le aso 15 o Ianuari, 2022.

Alu i le ftsoy. ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila. Pe imeli mai ia i matou i le [e-mail].

E ono faapupuuina ia tali mo le uumi po o le manino.