“O La Tatou Meaalofa o le Faamoemoe,” Mo Le Malosi o le Autalavou, Tes. 2021.
Sau, Mulimuli Mai ia te A’u
O La Tatou Meaalofa o le Faamoemoe
Mataupu Faavae ma Feagaiga 137–38
O le aafiaga a se perofeta ua faaali mai ai ia i tatou e mafai e le Atua ona tuuina mai ia i tatou le faamoemoe pe a tatou taulai atu ia Iesu Keriso.
Faauta i le Tamai Mamoe a le Atua, saunia e Walter Rane
Pe na i ai se aso na foliga mai o le a le muta lava? Ou te mautinoa e mafai ona e tali atu, “Ioe!” Tatou te oo uma lava i aso e le ogatusa ai mea ma mea tatou te faamoemoe i ai. O le susunuina o lau toast i le taumafataga o le taeao, le lelei le faia o se suega, po o le fefinauai ma se uo e mautinoa lava e mafai ona faaleagaina ai se aso.
Ae e i ai foi isi luitau e sili atu ona faigata. Atonu o le a maliu se tasi e pele ia i tatou, maua i se gasegase tuga, pe vaai atu i se tasi tatou te alolofa i ai ua tuua le Ekalesia. O tofotofoga faapenei e mafai ona lagona le mamafa naua o le taulimaina ma e mafai ona umi atu nai lo se aso. Ma e tele naua faafitauli o le lalolagi lea atonu tatou te lagonaina i nisi taimi o mea e leai se faamoemoe.
Ae o le mea moni, e i ai lava a tatou mafuaaga e faamoemoe ai. Na fetalai Mamona, “Ou te fai atu ia te outou, tou te faamoemoe, e ala i le togiola a Keriso” (Moronae 7:41). Ona o lenei mafuaaga, na saunoa ai Russell M. Nelson, “E tusa lava po o le a le foliga faigata mai, manatua, e mafai lava ona tatou maua le faamoemoe. I taimi uma!”1
E leai lava se taimi sili atu e manatua ai lenei mea nai lo le Kerisimasi, pe a tatou faamanatuina le fanau mai o “le malamalama, le ola, ma le faamoemoe o le lalolagi”?2 Ua faatumulia tusitusiga paia i tala e faamanatu mai ai ia i tatou lo tatou faamoemoe ia Iesu Keriso. O le mea moni, na tusia tusitusiga paia e molimau ia te Ia ina ia tatou “maua le faamoemoe” (Roma 15:4).
O se tasi o nei savali o le faamoemoe na oo mai i le silia ma le 100 tausaga talu ai. Na oo mai i se taimi pogisa i le talafaasolopito, i se perofeta a le Atua o le sa feagai ma se taimi faigata i lona olaga. Ua a’oa’o mai ai i tatou e mafai ona tatou maua lo tatou faamoemoega silisili i le Tama Faalelagi ma Iesu Keriso ona o lo La alolofa atoatoa mo i tatou ma le alofa tunoa togiola o le Faaola.
O Se Faaaliga Vaaia mo se Lalolagi e Manaomia le Fesoasoani
O le tausaga 1918 o se taimi fita ma faigata. Sa aafia le lalolagi i se faama‘i oti i le lalolagi atoa—e pei lava ona tatou i ai. O lena faama‘i oti, na afua mai i le fulū, na pepesi solo i le lalolagi ma maliliu ai le faitau miliona. O le Taua Muamua a le Lalolagi lea foi na amata talu mai le 1914. O le ogaoga o lena taua na mafua ai faatafunaga e le’i mafaufauina, oti, ma le faanoanoa.
Ata pue mai le Getty Images
I le feagai ai ma nei mala i le lalolagi atoa, e toatele na taumanatunatu: “Pe o i ai ea se olaga pe a mavae le oti? O le a le mea e tupu pe a tatou oti? Pe o le a ou toe vaai ea i e pele ia te a’u?”
Sa lagonaina foi e Iosefa F. Samita (1838–1918), le Peresitene lona ono o le Ekalesia, pagatia patino i le 1918. O lona atalii matua, o Elder Hyrum Mack Samita, o se Aposetolo, na faafuasei lona maliu. I ni nai masina mulimuli ane, na maliu ai le faletua o Ailama, o Aita, ma tuua ai se fanau e toalima.3
Sa lagonaina e Iosefa F. Samita le pagatia patino i le 1918. O lona atalii matua, o Ailama Mack Samita, na maliu faafuasei. I ni nai masina mulimuli ane, na maliu ai le faletua o Ailama, o Aita, ma tuua ai se fanau e toalima.
Sa iai foi nisi e pele ia Peresitene Samita na maliliu muamua. E na o le lima ona tausaga ae maliu fasia lona tama, o Ailama Samita, ma le uso o lona tama, o Iosefa Samita, i le Falepuipui o Carthage. Sa maliu lona tina, o Maria Fielding Samita, a o 13 ona tausaga. Na maliu foi le toalua o Peresitene Samita, o Sara, ma le fanau e toa 13.4
Ae o nei maliu i le 1918 na aumaia ai le faanoanoa fou. O le sailia o le faamafanafanaga mai lona faanoanoa, na liliu atu ai Peresitene Samita i le suesueina o tusitusiga paia ma le tatalo. A o ia faitau mai le Feagaiga Fou ma mafaufau loloto i le Togiola a Iesu Keriso (tagai Mataupu Faavae ma Feagaiga 138:1–3), sa ia maua se faaaliga o le lalolagi o agaga. Sa ia vaaia agaga amiotonu o e sa tulimatai atu ma le faamoemoe i lo latou laveaiga mai le oti (tagai Mataupu Faavae ma Feagaiga 138:11–15). Sa ia vaai foi i le Faaola o folafola atu le talalelei ia i latou i le lalolagi o agaga i le va o le taimi o Lona maliu ma le Toetu (tagai Mataupu Faavae ma Feagaiga 138:19). Ma sa ia molimauina le auina atu e le Faaola o auauna amiotonu e a’oa’o i latou o e sa le’i maua le avanoa e faalogo ai i le talalelei i lenei olaga.
Na oo mai lenei faaaliga vaaia ina ua matua manaomia e le lalolagi le faamoemoe. Na a’oa’o mai Peresitene M. Russell Ballard, o le Sui Peresitene o le Korama a Aposetolo e Toasefululua e faapea o lenei faaaliga vaaia “ua faaalia atili le loloto ma le lautele atoatoa o le fuafuaga a le Tama Faalelagi mo Lana fanau ma le alofa faaola o Keriso ma le mana le mafaatusalia o Lana Togiola.”5
Upumoni Faamoemoeina
O agaga na vaai i ai Peresitene Samita i le faaaliga na vaaia ai le tuueseeseina o o latou agaga mai o latou tino i le oti “o se pologa” (Mataupu Faavae ma Feagaiga 138:50). O le faaaliga a Peresitene Samita ua faamautinoa mai ai ia i tatou o lenei “pologa” e le tumau. E ala mai i le Faaola, ua tatou maua ai le faamoemoe o le a i ai se aso o le a tatou toetutu ai ma “maua se atoatoaga o le olioli” (Mataupu Faavae ma Feagaiga 138:17).
O lenei faaaliga ua faamautinoa mai ai foi ia i tatou ua saunia e le Tama Faalelagi ma Iesu Keriso le ala mo tagata uma ina ia maua le avanoa e maua ai le mamalu selesitila ma le fiafia e faavavau faatasi ma i La’ua. E moni lenei mea e oo lava ia i latou o e sa ola ma “maliliu e aunoa ma se malamalama e uiga i [le] talalelei, o e semanu latou te taliaina” (Mataupu Faavae ma Feagaiga 137:7).
Tatou te le tau faatali seia oo i le isi olaga ina ia maua le faamoemoe. E mafai ona tatou lagonaina le faamoemoe i le taimi nei a o tatou tuu atu lo tatou faatuatua ma le faalagolago ia Iesu Keriso. O le faamoemoe o se meaalofa a le Agaga (tagai Moronae 8:26), ma e oo mai ia i tatou ona o le Togiola a Keriso.
O Se Auala Faapitoa e Lagona ai le Faamoemoe
Ina ua mafaufau loloto Peresitene Samita i le talalelei ma le Togiola a le Faaola, sa ia maua se faaaliga na aumaia ai le mafanafana ma le faamoemoe ia te ia ma i se lalolagi faigata. O le mafaufau loloto e sili atu nai lo na o le mafaufau. O lona uiga o le manatunatu loloto i se mea—ma e mafai ona fesoasoani ia te oe e lagona atili ai le faamoemoe. Tuu ese sina taimi i lenei Kerisimasi e mafaufau loloto ai i le Faaola.
Mafaufau po o le a le uiga o Lona soifua mai, soifuaga, aoaoga, ma le Togiola mo oe. O lenei mea e mafai ona tatala ai lou loto ma faatagaina ai le Agaga Paia e “tautala atu le filemu i lou mafaufau” (tagai Mataupu Faavae ma Feagaiga 6:23). E mafai ona faamanuiaina ai lou olaga i le malamalama ma le faamoemoe e tusa lava pe faigata le olaga.
Ua uunaia i tatou ia “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma.” Ma afai tatou te “fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31: 20).