“Auala Matou te Faamanatuina ai le Kerisimasi,” Mo Le Malosi o le Autalavou, Tes. 2021.

Auala Matou te Faamanatuina ai le Kerisimasi

E tasi le talalelei ma tasi le Faaola. Ae i le lalolagi atoa, tatou te faamanatuina Lona soifua mai i le tele o auala eseese.

E te fiafia e savali i laau paina e ufitia i le kiona i Tesema taitasi? Ae a le savavali i lalo o niu i le vevela tele o le la? E te tutuina ni moligao mo le Fanau mai o le Faaola? Gaosia ma faasoa atu ni meaai masani? Faia se BBQ i le matafaga?

Ua faamatala mai e ni nai talavou mai le salafa o le lalolagi le auala latou te faamanatuina ai le Kerisimasi. Ma ua latou faamatalaina le ala na ese ai le tausaga ua tuanai i le taimi o le faama‘i pipisi o le KOVITI-19.

Indonesia

“O le Kerisimasi i Indonesia e mautinoa lava e le o se Kerisimasi pa’epa’e, ma e le malulu. Ma le isi, e ui atonu o loo i ai ni teuga o le Kerisimasi ii ma o i faleoloa tetele, faleaiga, po o faletalimalo, o le toatele o tagata iinei e le faamanatuina le Kerisimasi.

“Ae, e faamanatuina pea e lo‘u aiga i le mea sili matou te mafaia. Ou te fiafia e ai kuki ma inu ti sukalati vevela, faatau mai ni mea teuteu fou o le Kerisimasi, ma teuteu le laau Kerisimasi.

“O le Kerisimasi ua te‘a sa na o matou ma o’u matua ma lo‘u tuagane. Sa le mafai ona ou feiloai atu i isi tagata o lo’u aiga e pei o uso o tina ma tama, tausoga, ma matua matutua ona o le KOVITI-19. Sa lagonaina le tuuatoatasi ma le gaogao aua e masani lava ona matou potopoto faatasi.

“E ui lava i tulaga sa matou i ai, ae sa le’i taofia ai i matou mai le manatuaina o le uiga o le aso Kerisimasi, o le soifua mai lea o lo tatou Faaola, o Iesu Keriso. I le taimi atoa o le matou faamanatuina o le Kerisimasi, sa mafai ona matou aai i meaai mananaia ma fai ni lavalava mananaia. Sa ou laki na maua se meaalofa, ma sa ou maua le tele o faafeiloaiga mafanafana faatekinolosi o le Kerisimasi mai tagata matagofie na siomia a’u. O ni faamanuiaga matagofie nei, ma sa mafai ona ou tumau i le taulai atu ia Keriso a o o’u manatua ia lotofaafetai mo mea uma.”

Ata
tamaitai talavou

Abigail S., 14, Jakarta, Indonesia

Siamani

“Mo i matou e amata le Kerisimasi i le aso 1 o Tesema. E teuteuina le fale atoa. O maketi o le Kerisimasi e masani ona tatalaina i aai i le faaiuga o le uluai vaiaso o le Fanau Mai.

“E amata tatala e tagata uma faitotoa i a latou kalena o le Fanau Mai i le aso muamua o Tesema.

Ata
o seevae

“I le aso 6 o Tesema, na fai mai talatuu e oo mai ai St. Nicholas. Na te aumaia pinati eseese, fualaau aina, ma sukalati. Na te faatumuina seevae soloatoa na faamamaina e tamaiti ma tapena i le po na muamua atu. I le Vaeluaga o le Kerisimasi, 24 Tesema, matou te faamanatuina faatasi ai le Kerisimasi ma maua a matou meaalofa.

Ata
mea teuteu ua mamanuina e pei o se piko (pickle)

“Matou te tutuina le moligao o le Fanau Mai i Aso Sa uma ia Tesema, ma e matou te usuina pese o le Kerisimasi, aai i le falaoa, ma inu vai suamalie. A oo mai le taimi e tatala ai a matou meaalofa, e muamua ona matou sueina se piko oona i le laau Kerisimasi. Po o ai lava e maua le piko e tatala muamua la latou meaalofa.

“I le taimi o le faama‘i pipisi o le KOVITI-19, sa faamanatuina ai e lo matou aiga ia Aso Sa o le Fanau Mai i talanoaga faavitio ina ia mafai ai ona matou lagona le vavalalata faatasi.

“Sa tapunia uma maketi o le Kerisimasi, ma sa le faatagaina i matou e fai ni pati i le aoga. Peitai, sa mafai ona matou fiafia i le vaitau o le Kerisimasi aua sa tele atu le taimi matou te tao faatasi ai kuki. I la matou a’oga, matou te afifi ai meaalofa mo tamaiti lē tagolima i isi atunuu.

“O tausaga uma matou te matamata ai i vitio o le soifua mai o Iesu Keriso.

“O aoauli uma o Aso Sa o le Fanau Mai, matou te usuina ai le pese e uiga ia Iesu Keriso. Matou te faatulagaina se Soifua Mai o Iesu i lo matou potu malolo lea e faamanatu mai ai ia i matou i aso taitasi lo tatou Togiola.”

Ata
tuagane/tuafafine

Samara, Saliha, ma Sarai S., Bavaria, Siamani

Initia

Ata

alii talavou i talaane o le laau Kerisimasi

“O le Kerisimasi i le tausaga na te‘a nei sa matua faapitoa lava ia te a’u. Sa matuai ese lava mai Kerisimasi ua mavae. O le tausaga lenei sa ou punouai ai e fesoasoani i le toatele o tagata i le taimi o le faama‘i pipisi.

“E ui ina sa le mafai ona matou auai i le lotu pe auai i nisi o a matou gaoioiga masani o le Kerisimasi, ae o le fesoasoani i isi sa faagaeetia pea ma ou lagonaina ai le olioli o le Kerisimasi. Sa fesuiai e lo‘u aiga meaalofa i le tasi ma le isi. Sa matou gaosia foi ni meaai mananaia ma auauna atu i le toatele o a matou uo o isi talitonuga.

“Sa ou avea le Faamalamalama le Lalolagi ma le filiga ma auauna atu i tagata. O le faia o lena mea na aumaia ai ia te a’u le filemu ma le fiafia maoae. Ua ou iloa e alofa le Tama Faalelagi ia te a’u, ma Ana fanau uma. Ou te iloa na afio mai Iesu Keriso i lenei lalolagi ia alofa ma laveai i tatou.”

Ruthwik V., 14, Bengaluru, Initia