O Se Agelu i Seevae Lanumoli

Saunia e Emma Stanford

Mekasini a le Ekalesia

O le a se mea e mafai ona ofo atu e se agelu i ona seevae auleaga i le Alii?

tala o le agelu i le Soifua Mai o Iesu

Ata na tusia e Dean MacAdam

O a’u o se tasi o na tagata e fiafia i le taumalulu. Ae ou te le fiafia i le lagonaina o le malulu.

Sa le lelei mo a’u ina ua tuufaatasia e la’u siteki se toe faatinoga o le soifua mai o le Faaola. I fafo. I le po. I le taimi o le Kerisimasi aupito sili ona malulu i le tele o tausaga. I Kanata. Sa ou faatinoina le vaega a se agelu i lenei tala o le Soifua Mai o Iesu, ma o le mea e lelei sa mafai ona natia e lo‘u ofu talaloa mafiafia lo’u ofuvae mafanafana, totinilima, ma sikafu.

Ae e leai se mea, e oo lava i le ofu talaloa mafiafia, na mafai ona faamafanafanaina o‘u vae. Sa ave a‘u e lo’u tina e faatau ni seevae mafiafia, ma sa ma faatauina mai ni seevae e sili ona mafanafana sa mafai ona ma mauaina: o se pea seevae lanumoli e lanumumu manoa. O nei seevae soloatoa sa foliga mai o le a latou sao mai i se malaga i Antartica—ma i lenei taumalulu faifai pea, sa ou manaomia ai lena mea. Ae sa ou lagona le pei o se agelu i le tala o le Soifua Mai o le Faaola e 17-tausaga le matua e sili ona ulagia. O le a lea ituaiga avefeau faalelagi e seeina ni seevae lanumoli?

O Se Agelu Faalumaina

O le po o la matou faataitaiga faaiu o laei, sa ou savali atu ai i fafo i le tulaga ma taumafai e toso i lalo lo‘u ofu talaloa e ufiufi ai o’u seevae. E ui i a’u faatinoga, na onoono mai lava i fafo mai a’u teuga faaagelu mafiafia.

O le mea e laki ai, sa ma tutu ma isi agelu i tua o se tulaga na tau leiloa mo le tele o le taimi o le faaaliga, o lona uiga e leai se tasi na mafai ona vaai i o‘u seevae.

Ae sa i ai se vaega i le faaiuga ina ua o mai uma tagata o le tala o le Soifua Mai o Iesu—leoleo mamoe, fitafita Roma, Au Makoi, tagata o le aai, ma agelu—mai itu uma o le falefaafiafia i fafo e tootutuli i luma o le Faaola.

O le vaega lenei o le faaaliga sa tatau ona avea o se taimi filemu mo le aofia ma sa tuu atu i tagata o le ekalesia e toe manatunatu i le soifua mai o le Faaola. Ae mo po muamua e lua, sa ou fefe tele i ai. Pau le mea na mafai ona ou mafaufau i ai o le auala e tatau ona ou tootuli ai i luma o le motu o tagata, ma o le a mafai ona latou vaai i o‘u seevae lanumoli auleaga. I lena taimi, o le avea ai ma se agelu na lagonaina le sili atu o le maasiasi nai lo le paia.

O Le Alii o le Filemu

I le po lona tolu, sa ou faatalitali i tua o le tulaga ma isi agelu uma, ma sa faafuasei ona ou lagonaina le fiafia e faasoa atu lenei vaaiga mulimuli o le Soifua Mai o le Faaola i le aofia. O le uiga o la’u tala, o le vaega taua lea—o le a vaaia e le aofia agelu o omai mai itu uma e tootutuli i luma o le pepe o le Faaola. E maoae faapefea lena mea?

Na galo atoa ia a’u o’u seevae a’o faitauina e le faamatala upu le Isaia 9:6, le faailo lea mo a’u: “Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le Filemu.”

A o ou savali atu i fafo, na pauu ese isi mea uma. Sa ou lagonaina e pei a’u o se tasi o agelu faalelagi— tagata mamana ma faamamaluina o e sa i ai i le soifua mai o Keriso.

Sa matou tootutuli ma isi agelu i tafatafa o fitafita ma tuu lima faamafanafana i luga o tau’au o leoleo mamoe. Sa matou faaalia uma lava lo matou lotomaualalo, migao, ma le alofa mo lenei pepe fou. Ma sa ou lagonaina—le alofa e le i’u na i ai i lo‘u Faaola mo tagata o le aai, o le ’au ao lafoga, ma a’u. Sa ou iloaina lenei Tamaitiiti—ma le togiola na Ia aumaia—o le meaalofa aupito sili lea ona taua ua maua e le lalolagi.

Molimauina o Iesu Keriso

Ina ua ou savali atu i le tulaga i le aluga o isi faatinoga, ou te le’i lagonaina le pei o se teineitiiti i se toniga mafiafia ma ni seevae lanumoli. O a’u o se vaega o le “auaunaga a agelu” o loo molimau mai e uiga i le Faaola (Moronae 7:25), e oo lava i o‘u lava ala itiiti. Ou te le’i toe popole pe iloa mai e le aofia o’u seevae—aua afai e iloa mai o’u seevae lanumoli, o lona uiga sa ou tootuli i luma o lo’u Faaola.