“O Se Kerisimasi Faapitoa i Amerika i Saute,” Mo le Malosi o le Autalavou, Tes. 2021.

O Se Kerisimasi Faapitoa i Amerika i Saute

Saunia e Eric B. Murdock

Mekasini a le Ekalesia

O le a se meaalofa e mafai ona faamanuiaina ai se konetineta atoa?

Peresitene Reinhold Stoof, Peresitene o le Misiona a Amerika i Saute; lana avā, o Ella; Elder Rey L. Pratt o le Fitugafulu; ma Elder Melvin J. Ballard o le Korama a Aposetolo e Toasefululua i Amerika i Saute.

Faatasi ai ma le soifua mai o Iesu Keriso i le silia ma le 2,000 tausaga talu ai, na tuuina mai ai e lo tatou Tama Faalelagi i le lalolagi le meaalofa sili atu nai lo mea uma tatou te maua. Sa tuuina atu lenei meaalofa ma le filemu. E toaitiiti na iloaina. E oo lava i aso nei, e toatele e le o iloa pe faapefea ona faamanuiaina o latou olaga e le meaalofa o lo tatou Faaola.

Ata

Fanau Mai o Iesu

Toeitiiti atoa le 100 tausaga talu ai, i le Aso Kerisimasi, sa tuuina atu ai se isi meaalofa faapitoa i se konetineta atoa. O le toatele sa le’i iloaina lenei meaalofa. Sa tuuina atu ma le filemu, e aunoa ma se faailoaina, leai ni faasalalauga i luga o ala o faasalalauga faaagafesootai, ma e leai ni faalauiloa a ala o fesootaiga. Ae, o le mea na tupu i lenei Aso Kerisimasi o le a fesoasoani i le faitau miliona o tagata e maua le meaalofa tupito a le Tama Faalelagi o Lona Alo.

O Se Tatalo o le Kerisimasi

I le Ivasefulu-ono tausaga talu ai, ia Tesema 1925, na taunuu ai ni taitai se to’atolu o le Ekalesia i Buenos Aires, Argentina. E 34 aso na latou malaga ai mai le Aai o Sate Leki, Iuta, i Buenos Aires, Argentina, e ala i nofoaafi ma vaa. I lena taimi, sa na o ni nai tagata o le ekalesia i Amerika i Saute atoa. Ae sa saunia e le Alii se ala mo Le Ekalesia a Iesu Keriso o le Au Paia o Aso e Gata Ai ina ia maua se lumanai manuia i Amerika i Saute.

O Elder Melvin J. Ballard, o se sui o le Korama a Aposetolo e Toasefululua, ma isi taitai e toalua o le Ekalesia, o Elder Rey L. Pratt ma Rulon S. Wells, na auina atu i Argentina i se tofiga faapitoa. Na auina atu i latou e Heber J. Grant, le perofeta, e faapaia le konetineta atoa o Amerika i Saute mo le talaiga o le talalelei.

I le taeao o le Kerisimasi, sa savavali atu ai Elder Ballard ma ana soa i se togalaau filemu i Buenos Aires. Sa latou usuina viiga ma faitau mai le Tusi a Mamona. Ona faia lea e Elder Ballard o se tatalo. I lalo o le taitaiga a le Peresitene o le Ekalesia ma e ala i le pule faaaposetolo sa ia umia, na saunoa ai Elder Ballard, “Ou te fuliina le ki, tatala, ma susue le faitotoa mo le taliaina o le talalelei i nei malo uma o Amerika i Saute.”¹

Sa talosagaina foi e Elder Ballard se faamanuiaga i taitai o malo i Amerika i Saute ina ia agalelei i le Ekalesia ma faatagaina le talalelei ina ia talai atu i o latou atunuu ina ia mafai ona oo mai le faaolataga i tagata uma.

O Se Folafolaga Faaperofeta

Ina ua mavae lena taeao o le Kerisimasi, sa faaalu e Elder Ballard ma ana soa le isi valu masina na sosoo ai e savavali ai i auala o Buenos Aires ma faasoa atu le sāvali o le Toefuataiga o le talalelei. Sa itiiti ni mea faafaiaoga i le faaSipaniolo i lena taimi, ae sa latou taumafai i le mea sili latou te mafaia ma agai i luma ma le faatuatua. O a latou taumafaiga na taunuu i le na o le toatasi na liliu mai i lena taimi.

I le toeitiiti tuua Argentina, na saunoa Elder Ballard o le a faasolo malie ona tuputupu a’e le Ekalesia, “e pei lava ona tuputupu a’e lemu se aluna mai se akone.” Ae sa ia folafola atu e faitau afe o le a auai i le Ekalesia ma o le a oo mai le aso o le a “avea ai tagata i Amerika i Saute ma malosiaga i le Ekalesia.”²

Ua Faaauau Pea le Meaalofa

Ua toeitiiti atoa le 100 tausaga talu mai lena aso ma ua tali mai le tatalo a Elder Ballard—ma o le a faaauau pea ona taliina—i ni auala ofoofogia.

I le taimi nei o le Ekalesia i lenei atunuu ua i ai le:

4,178,375 tagata auai
97 misiona
21 malumalu (faatasi ai ma le 14 ua faasilasilaina pe o loo fausiaina)

Ma’eu le meaalofa matagofie o le talalelei a Iesu Keriso! Ma e pei foi o Elder Ballard ma ana soa, ua ia i tatou se tiutetauave ma le avanoa e faasoa atu ai lenei meaalofa taua i isi. I lenei Kerisimasi, manatua lenei meaalofa taua, ma taumafai e faasoa atu. Po o fea lava o e i ai, e tele lava avanoa e faasoa atu ai le talalelei i tagata o siomia oe. O le faia o lena mea, e mafai ai ona e faia lau vaega e fesoasoani ai i le talalelei a Iesu Keriso e oo atu i le lalolagi atoa.