“Faasoaina Atu o le Meaalofa o le Kerisimasi,” Mo le Malosi o le Autalavou, Tes. 2021.

Faasoaina Atu o le Meaalofa o le Kerisimasi

Alofa—Faasoa—Valaaulia

Saunia e Elder Dale G. Renlund

O Le Korama a Aposetolo e Toasefululua

Ata

Dale G. Renlund

O le faasoaina atu o le meaalofa o le talalelei a Iesu Keriso i auala masani ma faalenatura o se tasi lea o auala e mafai ona e auai ai i le galuega silisili i le lalolagi.

Ata

Nativity

Atavali na tusia e Michael Malm

O le soifua mai, soifuaga, aoaoga, Togiola, ma le Toetu o Iesu Keriso o le meaalofa aupito silisili lea o meaalofa uma o le Kerisimasi. O Lana talalelei e aumaia le olioli i le lalolagi. O lou alofa i le Atua ma isi ¹ ua maua ai le uunaiga e fesili ifo ia te oe lava, “E faapefea ona ou faasoa atu ma le olioli lenei meaalofa i le lalolagi?”

Filifili mai se Lisi Autu

Na e alu muamua i se faleaiga lea e maua ai nisi o meaai i luga o le lisi e le masani ai? I le 2018, sa ma o ai ma lo’u toalua i se faleaiga i Osaka, Iapani. Sa tele filifiliga i le lisi autu, o le tele lava e le masani ai ma e ese ia i ma’ua. Sa filifili e se tagata i la matou vaega le kalamari (squid). Ae ou te le’i fiafia i le kalamari, o lea sa ou filifilia ai se isi mea. E eseese mea na filifili e tagata uma mai le lisi autu. Sa matou fiafia uma lava i a matou meaai aua sa eseese uma a matou filifiliga e fua i mea na matou tosina i ai.

O le faasoaina atu o le meaalofa o le talalelei e mafai ona pei o le aai i se faleaiga. O loo maua se lisi tele o auala e faasoa atu ai le talalelei pe valaaulia ai isi e faia se mea e i’u ina fausia ai le faatuatua ia Iesu Keriso.

E le manaomia ona faia e se tasi mea uma.

O tagata uma ua i ai le manao e mafai ona faia se mea.

E leai se tasi e manaomia ona faia soo se mea latou te le filifilia.

E le manaomia ona e ai i le kalamari sei vagana ua e fiafia i ai. (Ma le isi, i le mae’a ai o le tofoina o kalamari sili ona lelei a Iapani, ua ou fiafia lava i ai.) E mafai ona e filifili e valaaulia isi e a’oa’o e uiga i le talalelei a Iesu Keriso i auala e toafimalie ma faigofie mo oe, e faaaoga ai au lava taleni ma tomai. I le aluga o taimi atonu e te iloa ai le faatupuina o le toafimalie i le faia o mea e tele.

O Lau Lisi Autu mo le Faasoaina Atu

O lea, e faapefea ona amata? Fai se “lisi autu” o auala e mafai ona e faasoa atu ai le talalelei po o valaaulia e mafai ona e tuuina atu. O nei mea e tatau ona amata mai le faigofie (e pei o a‘u e ’aiina pateta falai i le sosi, lea ou te fiafia lava i ai) i le luitauina (e pei o a‘u o loo ’aiina le kalamari, lea ou te le’i fiafia muamua i ai).

Fatu lau lisi ma lou aiga, aufono a le autalavou a le uarota, korama, po o le vasega. Ia e fatufatuai! Taumafai e mafaufau i ni auala se 101 e mafai ona e faasoa atu pe valaaulia ai. Faaali lau lisi autu i lau vasega a Tamaitai Talavou po o le korama a le Perisitua Arona. E mafai e tagata uma ona filifili se mea se tasi pe lua e masani ona latou faia. O le talanoaina o le mea na tupu pe a uma ona faia e tagata taitasi a latou gaoioiga filifilia o le a manaia. O le faatinoina o lau filifiliga o le faatinoina lea i le faatuatua, ma o le a fesoasoani le Atua ia te oe i Lana galuega.

Sa ou faia la‘u lava lisi autu o auala e faasoa atu ai le meaalofa o le talalelei. I le mae’a ai ona tilotilo i la‘u lisi autu, faanumera aitema mai mea e sili ona faigofie i mea e sili ona faigata mo oe.

Ta’u atu i se tasi e te masani lelei i ai o oe o se tagata o Le Ekalesia a Iesu Keriso o le Au Paia o Aso e Gata Ai.
Faatatau i le Ekalesia o “la‘u Ekalesia.”
Talanoa i se faifeautalai e le o se tagatanuu moni i lau gagana mo le tolu minute ma fesoasoani i le faaleoga po o le kalama.
Lipoti sa’o atu au gaoioiga a le Ekalesia ma au paaga. Pe a fesiligia “Na a mai lau faaiuga o le vaiaso?” aua le na o le fai atu, “Lelei.” Nai lo lena, ia fai atu, “Sa ou taitaia se talanoaga ma se vaega o tamaitai talavou i le Aso Sa i la‘u Ekalesia. Sa matou talanoa e uiga ia Iesu Keriso, ma sa matuai ou fiafia ai lava i le faaiuga o le vaiaso.” Po o le, “Sa ou alu i la‘u lotu ma na lagiina e le aufaipese se musika sili ona matagofie. Sa ou hamuina i le taimi atoa.”
Ta’u atu i faifeautalai, “Ou te fiafia e auai atu i le isi sauniga o le papatisoga.”
Valaaulia se uo e matamata i se vitio a le Ekalesia i luga o lau telefoni.
Auai i Lima Fesoasoani.
A’oa’o igoa o tagata i lau uarota.
Faafeiloai atu i se tagata e te le iloa i le Lotu; fai atu iai, “Talofa, o lo‘u igoa o _____. Afio Maia.”
Valaaulia se tasi e feiloai atu i faifeautalai.
Ataata atu i se tasi i le lotu.
Valaaulia se uo e sue se tuaa i luga o le FamilySearch.
Pe a fesiligia, “E te talitonu i le Atua?” nai lo le faapea atu, “Ioe,” fai atu, “Ou te faatuatuaina o Ia ona o mea ua ou a’oa’oina i la‘u Ekalesia.”

O Lou Taimi Lenei

Fatu sau oe lava lisi autu e mafai ona aofia ai nisi o mea lava e tasi—ae e tatau ona umi atu lau lisi! O lau lisi autu e ono aofia ai se tusiga i luga o lau faitotoa o ala o faasalalauga faaagafesootai, valaauliaina o se uo i se gaoioiga o le Kerisimasi, po o le faasino atu o se tasi i le saite mo le faalauiloa o le Faamalamalama le Lalolagi. i le Kerisimasi.²

Ata

tamaitai talavou o loo tusitusi

E oo lava i le faia o mea faigofie i lau lisi autu e mafai ona i ai ni aafiaga taua i lou olaga ma i olaga o isi. Auā foi, “o mea iti e tutupu mai ai mea tetele.”³ E le manaomia e le Alii oe ina ia iai le poto masani pe agavaa i le faasoaina atu ma le valaauliaina. Pau le mea e manaomia e le Alii o lou “loto ma se mafaufau malie.”⁴

Faasoa atu le Meaalofa

O le faasoaina atu o le talalelei ma le valaauliaina o isi e faatino i le faatuatua e tatau ona avea ma mea masani ma faalenatura. Sa valaaulia oe e Peresitene Russell M. Nelson e avea ma se vaega o le autau talavou a le Alii.⁵ O le faasoaina atu o le meaalofa o le talalelei i lenei auala o se tasi lea o auala e mafai ona e auai ai i le galuega silisili i le lalolagi. Ma ia manatua, na folafola mai e Peresitene Nelson: “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava.”⁶

E mafai ona avea oe ma se vaega o le alofa i isi, faasoa atu se savali e uiga ia Iesu Keriso ma Lana Ekalesia, ma valaaulia isi e a’oa’o atili e uiga i le talalelei. O le a faia e le Atua Lana galuega; O le a Ia faanatinatiina le galuega i Lana lava taimi, ma o le a Ia faaaogaina i latou uma o e naunau e faataunuuina, e oo lava—aemaise lava—oe.⁷