Upu Faaiu

O Se Kerisimasi e Sili Atu ona Anoa

Saunia e Elder Ulisses Soares

O Le Korama a Aposetolo e Toasefululua

Mai le 2019 First Presidency Christmas Devotional.

Ata na tusia e Mallory Clinger

A o tatou faamanatuina le soifua mai o le Faaola i lenei taimi fiafia o le tausaga, o le alofa faifai pea ma le le gata o le Atua e foliga mai e faatumulia atili ai o tatou agaga ma fesoasoani ia i tatou e liliu atu o tatou loto i o tatou aiga, uo, ma tuaoi. E fesoasoani tatou te nofouta atili ai ia i latou atonu o loo lagonaina le tuuesea, tuuatoatasi, po o e o loo manaomia le faamafanafanaga ma le filemu.

O le soifuaga o le Faaola o se faataitaiga atoatoa o le alofa ma le agalelei i tagata. E faagalo lava e Ia o Ia lava e fai ma sui o isi tagata. O Ana galuega le manatu faapito na faailoa mai i mea uma na Ia faia i aso uma o Lona soifuaga ma sa le tapulaa i se vaitau faapitoa po o se aso malolo.

A o tatou liliu atu o tatou loto i isi e pei ona sa faia e le Faaola, ou te folafola atu e mafai ona tatou maua atili le uiga o le Kerisimasi ma maua avanoa e le faatapulaaina e tuuina atu ai i tatou lava ma le filemu ma le agalelei i tagata o loo manaomia i tatou. O le a fesoasoani lenei mea ia i tatou e iloa atili ai le Faaola ma maua ai mo i tatou lava le alofa, filemu, ma le malosi faafouina lea e mafai ona tatou lagonaina ma faasoa atu i isi.

A o tatou saili atu mo le Faaola i mea uma tatou te faia, o le a le avea le Kerisimasi e tau na o se aso po o se vaitau ae o le a avea ma se tulaga o le loto ma le mafaufau, ma o le olioli ma le alofa e lagonaina i le Kerisimasi o le a latalata mai pea e le aunoa.

1. O le tele o lona uiga “i se aofaiga tele.”

2. O le agalelei o le agaalofa, faauo, po o se lagona e fesoasoani i se isi tagata.

3. O le le manatu faapito o lona uiga ia naunau e fesoasoani i se isi tagata e tusa lava pe le faigofie.

4. O se tulaga o le loto ma le mafaufau o lona uiga “o le ala tatou te lagona ma mafaufau ai.”