“Ngaahi Himi Kilisimasi ʻi he funga ʻo e Māmaní,” Ki Hono Fakamālohia ʻo e Toʻu Tupú, Tīsema 2021.
Ngaahi Himi Kilisimasi ʻi he funga ʻo e Māmaní
ʻOku vahevahe ʻe ha toʻu tupu ʻe toko fā ʻa e ngaahi himi Kilisimasi ʻoku nau saiʻia taha aí.
ʻOku fakamanatua ʻa e Kilisimasí ʻi ha ngaahi founga kehekehe ʻi he funga ʻo e māmaní, pea ʻoku faʻa kehekehe foki mo e ngaahi himi Kilisimasí. Neongo pe ko e hā e ngaahi hiva ʻokú ke hivaʻí, ʻoku fakafehokotaki kitautolu ʻe he pōpoaki ʻo e ngaahi himi ko ʻení ʻiate kitautolu—pea kia Sīsū Kalaisi. Ko ha vakai ʻeni ki he lau ʻa ha toʻu tupu ʻe toko fā ʻi he funga ʻo e māmaní fekauʻaki mo e founga ʻoku tokoniʻi ai kinautolu ʻe heʻenau ngaahi himi Kilisimasí ke nau ʻunu ke ofi ange ki he Fakamoʻuí.
“Pō Mālū! Siʻi pō!”
ʻOku saiʻia ʻa Keiseni L., taʻu 14, mei ʻAokalani, Nuʻu Silá, ʻi he nonga ʻoku maʻu mei hono hivaʻi ʻo e ngaahi himi Kilisimasí. “Ko e taha ʻo e ngaahi himi ʻoku ou saiʻia taha aí ʻoku mau hivaʻi ʻi Nuʻu Silá ko e ʻPō Mālū.ʼ Naʻa mau ako ia ʻi homau fāmilí mo e Palaimelí, ʻi he lea faka-Haʻamoá, Maulí, Tonga, mo e ngaahi lea fakafonua kehe ʻo e Pasifikí. ʻOkú ne ʻomi ʻa e melinó ki ha kakai tokolahi mo talamai kiate au ko e pō naʻe ʻaloʻi ai ʻa Kalaisí naʻe Toputapu ia pea ko Ia hoku Fakamoʻuí.
“ʻOku tokoniʻi au ʻe he hiva Kilisimasí ke u manatuʻi ʻa e Fakamoʻuí. ʻI heʻeku fanongo ki he ngaahi himi Kilisimasí, ʻoku ou ongoʻi e Laumālié. ʻOkú ne tokoniʻi au ke u ongoʻi ʻoku ou toe ofi ange ki he Tamai Hēvaní mo Sīsū Kalaisi.”
“Fiefia ki Māmani, ka Haʻu ʻa e ʻEikí”
ʻOku maʻu ʻe Lumia S., taʻu 16, mei Monitanesi, Kouti ti ʻAivolií, ha nonga ʻi heʻene ʻiloʻi ʻe toe hāʻele mai ʻa Kalaisí. Ko e himi Kilisimasi ʻokú ne saiʻia taha aí ko e “Fiefia ki Māmani.” “ʻOkú ne ʻai maʻu pē ke u fiefia he ʻoku ou ʻilo ʻe toe hāʻele mai hotau Fakamoʻuí. Ko e laine ʻuluakí ʻoku ou saiʻia taha aí: ʻFiefia ki māmani, ka haʻu ʻa e ʻEikí.ʼ Ko ha meʻa fakafiemālie kiate au ke u ʻilo te Ne toe hāʻele mai ʻo fakaleleiʻi ʻa e māmaní mei hono ngaahi ʻulí.”
“Tutu ha Foʻi Teʻelango”
ʻOku saiʻia ʻa Mina H., taʻu 16, mei Vesilani, Noaué, ʻi he founga ʻoku ʻomi ai ʻe he ngaahi himi Kilisimasí ʻa e fiefiá.
“ʻOku lahi e ngaahi himi tukufakaholo ʻoku ou saiʻia ke hivaʻi lolotonga e Kilisimasí. Ko e taha ai ʻoku ui ko e ‘Deilig er jorden’ [‘Fakaʻofoʻofa Taha ʻEiki Sīsū’; ʻoku ʻiloa foki ko e ‘Beautiful Savior’ (vakai, Children’s Songbook, 62–63)]. ʻOku ʻomi ʻe he ngaahi himi tukufakaholó ʻa e fiefia mo e ngaahi ongo fakafiefia ʻo e Kilisimasí.
“ʻOku tohi lelei ʻaupito e ngaahi himi Kilisimasi tukufakaholo ko iá, ʻi ha founga ʻoku fuʻu fakapunake, pea mo fakafiefia foki. Ko e konga ʻoku ou saiʻia taha ai he foʻi hiva ‘Deilig er jorden’ ko e konga ko ia ʻoku pehē, ‘Melino ki māmaní. Fiefia e tangatá. ʻOku ʻaloʻi mai ha Fakamoʻui kiate kitautolu he ʻahó ni.ʼ”
“ʻOku Fakafiefia Moʻoni ʻa e Faʻahitaʻu Ko ʻEní”
ʻOku ongoʻi ʻe Sailosi C., 16, mei Paholo, Filipainí, ʻoku makehe ʻa e ngaahi himi Kilisimasí koeʻuhí ʻoku taha ai ʻetau fakakaukau ki he Fakamoʻuí. “ʻOku ʻomi ʻe he ngaahi himi Kilisimasí ʻa e fiefia mo fakamanatu ki he kakaí ʻa e ʻaloʻi ʻo Kalaisí. Ko e fakaleá ko ha konga lahi ia ʻo e ngaahi himi Kilisimasí koeʻuhí ʻoku nau fakamanatu mai kiate au ʻa Sīsū Kalaisi—ʻa ʻEne hoko ko ha faʻifaʻitakiʻanga maʻongoʻonga kiate kitautolú.”
Ko e himi Kilisimasi faka-Filipaini ʻe taha ʻoku saiʻia ai ʻa Sailosí ko e “Kasadya Ning Táknaa” [“ʻOku Fakafiefia Moʻoni ʻa e Faʻahitaʻu Ko ʻEní”]. ʻOkú ne pehē, “ʻOku hanga ʻe he hivá ni ʻo langaki hake e kakaí. ʻOku longomoʻui hono fasí ʻo ne fakatahatahaʻi ʻa e kakaí. Ka ne taʻeʻoua ʻa e ngaahi himi Kilisimasí, mahalo he ʻikai loko fakafiefia ʻa e Kilisimasí, pe longomoʻui. ʻOku mahuʻinga ʻa e ngaahi himi Kilisimasí kiate au.”