“Ko ha Kilisimasi Makehe ʻi ʻAmelika Saute,” Ki Hono Fakamālohia ʻo e Toʻu Tupú, Tīsema 2021.
Ko ha Kilisimasi Makehe ʻi ʻAmelika Saute
Ko e hā ha meʻaʻofa te ne lava ʻo faitāpuekina ha konitinēniti kakato?
Palesiteni Reinhold Stoof, Palesiteni ʻo e Misiona South American; ko hono uaifi ko ʻElá; ʻEletā Rey L. Pratt ʻo e Kau Fitungofulú; mo ʻEletā Melivini J. Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ʻAmelika Saute.
ʻI hono ʻaloʻi ʻo Sīsū Kalaisi he taʻu ʻe 2,000 tupu kuohilí, naʻe foaki mai ai ʻe heʻetau Tamai Hēvaní ki he māmaní ʻa e meʻaʻofa maʻongoʻonga taha naʻe faifai ange peá ne maʻú. Naʻe foaki fakalongolongo ʻa e meʻaʻofa ko ʻení. Ko e tokosiʻi pē naʻa nau ʻilo ki aí. ‘Oku aʻu ki he ʻahó ni, ʻoku ʻikai ʻiloʻi ʻe he tokolahi ʻa e founga ʻoku faitāpuekina ai ʻenau moʻuí ʻe he meʻaʻofa ʻa hotau Fakamoʻuí.
ʻI he meimei taʻu ʻe 100 kuohilí, ʻi he ʻAho Kilisimasí, naʻe foaki ai ha meʻaʻofa makehe ʻe taha ki ha konitinēniti kakato. Ko e tokolahi tahá naʻe ʻikai ke nau ʻilo ʻa e meʻaʻofa ko ʻení. Naʻe foaki fakalongolongo pē ia, ʻo ʻikai tala ki he kakaí, ʻikai ha ngaahi fakamatala ʻi he mītia fakasōsialé, pea ʻikai ha ngaahi fanongonongo he ongoongó. Ka, ko e meʻa naʻe hoko ʻi he ʻAho Kilisimasi ko ʻení ʻe tokoni ia ke maʻu ʻe ha kakai ʻe lauimiliona ʻa e meʻaʻofa taupotu taha ʻa e Tamai Hēvaní ko Hono ʻAló.
Ko ha Lotu ʻi he Kilisimasí
ʻI he taʻu ʻe hivangofulu mā ono kuohilí, ʻi Tīsema 1925, naʻe tūʻuta ai ha kau taki ʻe toko tolu ʻo e Siasí ʻi Puenosi ʻAealesi, ʻĀsenitina. Naʻe feʻunga mo ha ʻaho ʻe 34 ʻenau fononga mei Sōleki Siti, ʻIutā ki Puenosi ʻAealesi, ʻĀsenitina, ʻi he lēlué mo e vaká. ʻI he taimi ko iá, naʻe tokosiʻi pē ʻa e kāingalotú ʻi ʻAmelika Saute kotoa. Ka naʻe teuteuʻi ʻe he ʻEikí ha hala ke ʻi ai ha kahaʻu lelei ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ʻAmelika Saute.
Naʻe fekauʻi atu ʻa ʻEletā Melivini J. Pālati, ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, mo ha ongo taki kehe ʻo e Siasí, ko ʻEletā Lei L. Palaiti mo Luloni S. Uele, ki ʻĀsenitina ʻi ha fatongia makehe. Naʻe fekauʻi atu kinaua ʻe he palōfitá, ko Palesiteni Hiipa J. Kalānité, ke na fakatapui kotoa ʻa e konitinēniti ʻo ʻAmelika Sauté ki hono malangaʻi ʻo e ongoongoleleí.
ʻI he pongipongi Kilisimasí, naʻe lue atu ʻa ʻEletā Pālati mo hono kaungā fonongá ki ha vao ʻakau uilou lōngonoa ʻi Puenosi ʻAealesi. Naʻa nau hivaʻi ha ngaahi himi mo lau mei he Tohi ʻa Molomoná. Naʻe fakahoko leva ʻe ʻEletā Pālati ha lotu. ʻI he malumalu ʻo e fakahinohino ʻa e Palesiteni ʻo e Siasí pea fakafou ʻi he mafai fakaeʻaposetolo naʻá ne maʻú, naʻe pehē ʻe ʻEletā Pālati, “ʻOku ou fakahū e kií, toʻo e loká, pea fakaava e matapā ki hono malangaʻi ʻo e ongoongoleleí ʻi he ngaahi puleʻanga kotoa ko ʻeni ʻo ʻAmelika Sauté.”1
Naʻe kole foki ʻe ʻEletā Pālati ha tāpuaki maʻá e kau taki ʻo e ngaahi puleʻanga ʻi ʻAmelika Sauté ke nau angaʻofa ki he Siasí mo fakaʻatā ke malangaʻi ʻa e ongoongoleleí ʻi honau ngaahi fonuá kae lava ke maʻu ʻe he tokotaha kotoa pē ʻa e fakamoʻuí.
Ko ha Talaʻofa Fakaepalōfita
Hili e pongipongi Kilisimasi ko iá, naʻe fakaʻaongaʻi ʻe ʻEletā Pālati mo hono kaungā fonongá ʻa e māhina ʻe valu hono hokó ke nau fononga ʻi he ngaahi hala ʻo Puenosi ʻAealesí ʻo vahevahe ʻa e pōpoaki ʻo hono Fakafoki Mai ʻo e ongoongoleleí. Naʻe siʻisiʻi pē ʻa e naunau fakafaiako ʻi he lea faka-Sipeiní he taimi ko iá, ka naʻa nau fai honau lelei tahá pea laka atu ki muʻa ʻi he tui. Naʻe iku ʻenau ngaahi ngāué ki ha ului pē ʻe taha he taimi ko iá.
Kimuʻa siʻi pē pea mavahe ʻa ʻEletā Pālati mei ʻĀsenitiná, naʻá ne pehē ʻe tupulaki māmālie ʻa e Siasí, “ʻo hangē pē ko e tupu māmālie ʻa e fuʻu ʻoké mei ha tengaʻi ʻeikoní.” Ka naʻá ne palōmesi ʻe kau ha lauiafe ki he Siasí pea ʻe hokosia ʻa e ʻaho ʻe hoko ai ʻa e kakai ʻi ʻAmelika Sauté “ko ha mālohinga ʻi he Siasí.”2
‘Oku Hoko Atu ‘a e Meʻaʻofá
Ko e meimei taʻu ʻeni ʻe 100 talu mei he ʻaho ko iá pea kuo tali e lotu ʻa ʻEletā Pālatí—pea ʻe hokohoko atu hono talí—ʻi ha ngaahi founga fakaofo.
Kuo ʻi he Siasí he ʻahó ni ʻi ʻAmelika Saute ha:
-
kāingalotu ʻe 4,178,375
-
ngaahi misiona ʻe 97
-
temipale ʻe 21 (mo e 14 naʻe fanongonongo pe lolotonga langa)
Ko ha meʻaʻofa fakaʻofoʻofa moʻoni ʻa e ongoongolelei ʻo Sīsū Kalaisí! Pea hangē ko ʻEletā Pālati mo hono kaungā fonongá, ʻoku ʻi ai hotau fatongia mo e faingamālie ke vahevahe ʻa e meʻaʻofa mahuʻingá ni mo e niʻihi kehé. Manatuʻi ʻa e meʻaʻofa mahuʻingá ni ʻi he Kilisimasi ko ʻení, pea feinga ke vahevahe ia. Neongo pe ko e fē feituʻu ʻokú ke ʻi aí, ʻoku lahi e ngaahi faingamālie ke vahevahe ʻa e ongoongoleleí mo e kakai ʻoku mou feohí. ʻI hoʻo fai iá, te ke lava ʻo fai ho fatongiá ke tokoniʻi e ongoongolelei ʻo Sīsū Kalaisí ke aʻu ki he māmaní kotoa.