Ngaahi Fehuʻi mo e Talí

“ʻE lava fēfē nai ke u maʻu ʻa e loto-toʻa ke muimui fakatatau ki he ngaahi ueʻi fakalaumālié?”

“ʻE hāʻele mai ʻa e Laumālie Māʻoniʻoní pea te ke ongoʻi ha ngaahi ueʻi fekauʻaki mo ha ngaahi meʻa te ke lava ʻo fakahoko maʻá ha kakai kehe. ʻI hoʻo ʻalu ʻo fakahoko e ngaahi meʻa ko iá, ʻokú ke fakahoko ai e ngāue ʻa e ʻEikí, pea ko e taimi ʻokú ke fakahoko ai e ngāue ʻa e ʻEikí, ʻokú ke taau ai mo e meʻa-foaki ʻo e Laumālie Māʻoniʻoní.”

Palesiteni Henry B. Eyring ʻo e Kau Palesitenisī ʻUluakí, ʻi he “President Eyring 1990s,” Deseret News, Apr. 2, 2009, deseretnews.com.

Loto-Moʻoní

“ʻOku ou ongoʻi loto-toʻa ʻi he lotú. ʻI he taimi ʻoku ou lotu ai ki heʻeku Tamai Hēvaní ʻi he loto-moʻoní, ʻoku ou ʻilo ʻoku ʻiate au ʻa Hono Laumālié. ʻOku ou ʻiloʻi ʻe tāpuekina au ʻo fakafou ʻi Hono ʻAlo ʻOfaʻangá, ʻi he taimi te u muimui ai ki he ngaahi ueʻi fakalaumālié.”

ʻAkipanapale Palaiti I., 19, Naisīlia

ʻAukaí mo e Ngāué

“Ke u maʻu ʻa e loto-toʻa ke muimui ki he ueʻi fakalaumālie ʻoku ou maʻú, ʻoku ou lotua ke ʻiloʻi pe ko e ʻomi moʻoni ia mei he ʻEikí. ʻOku ou fakahoko leva ha tukupā ke muimui ʻi he fakahaá, fakataha mo ha lotu mo e ʻaukai lahi.”

ʻŌpeti M., 19, Lepupelika Fakatemokalati ʻo Kongokoú

Ongoʻi Fiefiá

“ʻI he taimi ʻoku ou fie maʻu ai ʻa e loto-toʻa ke fanongo ki he ngaahi ueʻi fakalaumālié, ʻoku ou fakakaukau ki he fiefia ʻeku Tamai Hēvaní. Pea ʻi heʻeku fakafanongo ki he ngaahi ueʻi ke tokoniʻi e niʻihi kehé, ʻoku ou ongoʻi fiefia ange mo maʻu ha ʻaho lelei. ʻOku tokoniʻi au ʻe he tui ki he ʻEikí ke u loto-toʻa ke muimui ki he ngaahi ueʻi fakalaumālié.”

ʻAlisa S., ʻIutā, USA

Kulupu Poupoú

“Kapau ʻokú ke feohi mo ha kakai ʻoku nau poupouʻi hono fakahoko e fili ʻoku leleí, ʻe faingofua ange ke ke muimui ki he ngaahi ueʻí. Falala ki he palani ʻa e ʻEikí. ʻOkú Ne finangalo ki he lelei tahá maʻau.”

Siale R., ʻAlapeta, Kānata

Ko e Fakahoko e Ngāue ʻa e ʻOtuá

“ʻOku ou manatuʻi ʻoku maʻu e ngaahi ueʻi fakalaumālié mei he ʻOtuá pea ʻokú Ne ʻomi pē ha ngaahi meʻa lelei ke tau fakahoko. ʻOku tau maʻu ʻa e mālohi ke tokoniʻi e niʻihi kehé ke nau haʻu ki he ʻOtuá—ʻi heʻetau ngāue fakatatau ki he ngaahi ueʻí, ʻoku tau fakahoko ai e ngāue ʻa e ʻOtuá. He ʻikai te ke teitei ʻilo ʻa e faʻahinga lelei te ke maʻu ʻo kapau te ke ngāueʻi ha ueʻi fakalaumālie!”

Sela S., 17, Kalefōnia, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi fakaʻōfisiale ʻo ha tokāteline ʻo e Siasí.

Ko e Hā Hoʻo Fakakaukaú?

Ko e hā ʻoku mahuʻinga ai e ngaahi tuʻunga moʻui ʻo e Siasí? Te u maʻu fēfē nai ha fakamoʻoni kiate kinautolu?

ʻOmi hoʻo talí mo e laʻitaá kimuʻa he ʻaho 15 ʻo Sānuali 2022.

ʻAlu ki he ftsoy.ChurchofJesusChrist.org pea lomiʻi ʻi he “Submit Your Work.” Hū ʻaki hoʻo ʻAkauni ʻi he Siasí pea fili leva ʻa e “Ki Hono Fakamālohia ʻo e Toʻu Tupú” ʻi lalo ʻi he “Choose Magazine.” Lomiʻi ʻi he “Add File” ke fili hoʻo failé mo e ʻū taá, pea lomiʻi ʻi he “Submit” ke upload mo ʻomi kiate kimautolu hoʻo failé. Pe ʻīmeili mai kiate kimautolu ʻi he [e-mail].

ʻE lava ke liliu ʻa e ngaahi talí koeʻuhí ke lōloa feʻunga pe mahino.