Lea Fakaʻosí

Ko ha Kilisimasi Mahuʻingamālie Ange

Fai ʻe ʻEletā Ulisses Soares

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei he Fakataha Lotu Faka-Kilisimasi ʻa e Kau Palesitenisī ʻUluakí ʻi he 2019.

Ngaahi tā fakatātā ʻa Mallory Clinger

ʻI heʻetau fakamanatua e ʻaloʻi ʻo e Fakamoʻuí ʻi he taimi fakafiefia ko ʻeni ʻo e taʻú, ʻoku hangē ʻoku fakafonu hotau laumālié ʻe he ʻofa taʻefakangatangata hokohoko ʻa e ʻOtuá ʻo lahi ange mo tokoni ke tafoki hotau lotó ki hotau fāmilí, kaungāmeʻá, mo e kaungāʻapí. ʻOku tokoni ia ke tau ongoʻingofua ange ʻa kinautolu ʻoku ongoʻi tuenoá, taʻelatá, pe fie maʻu ʻa e fakafiemālié mo e melinó.

Ko e moʻui ʻa e Fakamoʻuí ko e sīpinga haohaoa ia ʻo e ʻofá mo e failelei ki he kakaí. Naʻá Ne faʻa fakangaloʻi maʻu pē Ia koeʻuhí ko e niʻihi kehé. Naʻe hā ʻEne ngāue taʻesiokitá ʻi he meʻa kotoa naʻá Ne fakahoko ʻi Heʻene moʻuí pea naʻe ʻikai fakangatangata ia ki ha faʻahitaʻu pe ʻaho mālōlō pau.

ʻI heʻetau fakatafoki hotau lotó ki tuʻa ʻo hangē ko ia naʻe fai ʻe he Fakamoʻuí, ʻoku ou palōmesi atu te tau lava ʻo aʻusia lelei ange ʻa e ʻuhinga ʻo e Kilisimasí mo maʻu ha ngaahi faingamālie taʻefakangatangata ke foaki fakalongolongo mo angaʻofa ki he kakai ʻoku nau fie maʻu kitautolú. ʻE tokoni ʻeni ke tau ʻiloʻi lelei ange ai ʻa e Fakamoʻuí mo maʻu ʻiate kitautolu ʻa e ʻofa, nonga, mo e mālohi kuo fakafoʻou te tau lava ʻo ongoʻi mo vahevahe mo e niʻihi kehé.

ʻI heʻetau fekumi ki he Fakamoʻuí ʻi he meʻa kotoa ʻoku tau faí, ʻe ʻikai ngata pē ʻi he hoko ʻa e Kilisimasí ko ha foʻi ʻaho pe faʻahitaʻú, ka ʻe hoko ia ko ha tūkunga ʻo e lotó mo e fakakaukaú, pea te ke maʻu maʻu pē ʻa e fiefia mo e ʻofa ʻoku ongoʻi ʻi he Kilisimasí.

1. ʻOku ʻuhinga e taulōfuʻú ko e “meʻa lahi ʻaupito.”

2. Ko e faileleí ko ha ongoʻi angaʻofa, fakakaumeʻa, pe fie tokoni ia ki ha taha kehe.

3. ʻOku ʻuhinga e taʻesiokitá ke loto-fiemālie ke tokoniʻi ha taha kehe neongo kapau ʻoku ʻikai faingofua.

4. ʻOku ʻuhinga e tūkunga ʻo e lotó mo e fakakaukaú “ki he anga ʻetau ongoʻí mo e fakakaukaú.”