“Kiʻi Taimi Fiefiá,” Ki Hono Fakamālohia ʻo e To‘u Tupú, Tīsema 2021.
Kiʻi Taimi Fiefiá
ʻEkitivitī ʻi he Ngaahi Tefito ʻo e Tuí
Ngaahi tā fakatātā ʻa Josh Talbot
Ko e vaʻinga ko ʻení ko ha founga lelei ia ke tokoni ke manatuʻi ʻa e Ngaahi Tefito ʻo e Tuí. Ko e tuifio totonu foki ia ʻo e feʻauʻauhi fakakaumeʻá, fakafiefiá, mo e kakatá.
Ko hono moʻoní, kapau te ke ikuna, te ke maʻu ʻe koe e totonu ke ke pōlepole ai ʻi he toenga hoʻo moʻuí. Pe ʻoua kuo aʻu ki hoʻo ʻekitivitī hoko ʻa e toʻu tupú pe fāmilí.
Ko e founga ʻeni ke vaʻinga aí.
-
Vahevahe hoʻo kulupú ki ha timi ʻe ua pe lahi ange.
-
Fokotuʻu ha faʻahinga kato ʻi he kelekelé ki he timi takitaha. ʻE sai pē ha poulu, kapa veve, pea ko ha foʻi luo kuo keli he kelekelé.
-
Tā ha foʻi laine ʻi he kelekelé ʻo mamaʻo feʻunga mei he ʻū kató ke kiʻi faingataʻa.
-
ʻOange ki he timi takitaha ha fanga kiʻi meʻa iiki kuo ʻosi fakafikefika ʻe 13 ke tolo ki he kató. Ko e faingofua tahá ko ha ʻū laʻipepa te nau lava ʻo tohi ai ha mataʻifika pea nusinusiʻi ke faʻu ha foʻi pulu. Pe ko ha fanga foʻi maka pe vaʻakau. Tohi, tā, pe vali pē ʻa e fika 1 ki he 13 ʻi he ngaahi meʻa ko iá.
-
ʻAi ke lau ʻe ha taha ha fanga kiʻi tokoni mei ha taha ʻo e Ngaahi Tefito ʻo e Tuí. ʻI he fakakaukau pē ʻa e timí ʻoku nau ʻiloʻi ʻa e Tefito ʻo e Tui ʻoku ʻuhinga ki aí, te nau feinga ke tolo ʻa e meʻa ʻoku tohi ai e fika ko iá ki he kató. Kapau ʻe hala ʻenau toló, kuo pau ke nau lele ʻo toʻo mai ia pea foki ki he lainé kimuʻa pea nau toe feinga ke tolo.
-
Ko ʻene hū pē e tolo ʻa ha timi, kiʻi taʻofi e vaʻingá.
-
Kapau naʻe tonu hono ʻiloʻi ʻe he timi ko iá ʻa e Tefito ʻo e Tuí, te nau lau maʻuloto fakataha ia pea maʻu ha poini ai. Kapau naʻe hala, ʻe mole ʻa e poiní meiate kinautolu pea hoko atu e takaí.
-
Taufetongi ʻi hono fetongitongi e kau mēmipa ʻo e timí ʻoku feinga ke tolo fakahū ki he kató. Te ke lava foki ʻo feinga ke ʻunuakiʻi ʻa e kató ke ofi ange pe mamaʻo ange mei he lainé (ʻai ke mamaʻo tatau ki he timi takitaha) ke liliu e tuʻunga faingataʻá.
-
Ko e mālohí ʻa e fuofua timi ke aʻu ʻo poini ʻe 13!
Vakai ki he Fuʻu ʻAkaú
ʻOku lahi e ngaahi meʻa teuteu ʻi he fuʻu ʻakau ko ʻení, ka ko e ua pē ʻoku tataú. Kumi ʻa e ongo meʻa teuteu ʻoku tataú, pea kumi ha vaʻakau ʻa e tauhisipí, sipi ʻe ua, foʻi lupe, fetuʻu ʻe nima, mo e foʻi teʻelango ʻe nima.
Fanga Kiʻi Talanoa Fakakatá
Naʻe ʻikai teitei fokotuʻu ʻe Père Noël ha fakangatangata ki he lahi ʻo e sū te ne fakafonu ʻaki e fanga kiʻi meʻa leleí mo e meʻaʻofá!
Josh Talbot
Lutolofi! Ko e hā naʻá ku talaatu fekauʻaki mo e text lolotonga e puná?
Arie Van De Graaff