Founga ʻEmau Fakafiefiaʻi e Kilisimasí

ʻOku ʻi ai ha ongoongolelei mo e Fakamoʻui pē ʻe taha. Ka ʻoku tau fakamanatua Hono ʻaloʻí ʻi ha ngaahi founga kehekehe ʻi he funga ʻo e māmaní.

ʻOkú ke saiʻia nai he lue ʻeveʻeva ʻi he ʻulu paini kuo ʻufiʻufi ʻe he sinoú ʻi Tīsema ʻo e taʻu takitaha? Fēfē nai ʻa e ʻeveʻeva ʻi he lalo pāmé lolotonga e ulo vevela ʻa e laʻaá? ʻOkú ke tutu nai ha ngaahi teʻelango ʻi he ngaahi uike ʻe 4 kimuʻa he ʻaho Kilisimasí (Advent)? Ngaohi mo vahevahe ʻa e fanga kiʻi fakaneifua tukufakaholó? Kai tunu ʻi he matātahí?

ʻOku fakamatalaʻi ʻe ha toʻu tupu tokosiʻi mei he funga ʻo e māmaní ʻa e founga ʻenau fakafiefiaʻi e Kilisimasí. Pea ʻoku nau fakamatalaʻi e founga naʻe kiʻi kehe ai e taʻu kuo ʻosí lolotonga e mahaki fakaʻauha COVID-19.

ʻInitonēsia

Sakata, ʻInitonēsia

“Ko e Kilisimasi ʻi ʻInitonēsiá ʻoku ʻikai ko ha Kilisimasi hinehina ia, pea ʻoku ʻikai momoko. ʻIkai ngata aí, neongo ʻoku ʻi ai ha ngaahi teuteu Kilisimasi tōtōholo heni ʻi he ngaahi falekoloa lalahí, falekaí, pe ngaahi hōtelé, ka ko e tokolahi taha ʻo e kakai ʻi hení ʻoku ʻikai ke nau fakafiefiaʻi e Kilisimasí.

“Ka ʻoku kei fakafiefiaʻi pē ia ʻe hoku fāmilí ʻi he lelei taha te mau lavá. ʻOku ou saiʻia he kai kūkisí mo e inu koko velá, fakatau mai e ngaahi meʻa teuteu Kilisimasi foʻoú, mo hono teuteuʻi e fuʻu ʻakau Kilisimasí.

“Ko e Kilisimasi he taʻu kuo ʻosí ko au pē mo ʻeku ongomātuʻá mo hoku tuongaʻané. Naʻe ʻikai ke u lava ʻo feʻiloaki mo hoku kāinga kehé ʻo hangē ko ʻeku ngaahi faʻētangatá, mehikitangá, niʻihi ʻoku ou tokoua ʻakí, mo ʻeku ngaahi kuí koeʻuhí ko e COVID-19. Naʻe ongo fakataʻelata mo tuenoa koeʻuhí he naʻa mau faʻa fakataha.

“Neongo e ngaahi tūkunga ne mau ʻi aí, ka naʻe ʻikai taʻofi ai kimautolu mei heʻemau manatuʻi e ʻuhinga ʻo e ʻaho Kilisimasí, ʻa ia ko e ʻaloʻi ʻo hotau Fakamoʻui ko Sīsū Kalaisí. ʻI heʻemau fakafiefiaʻi e Kilisimasí, ne mau lava ʻo kai ha meʻatokoni ifo mo tui ha vala lelei. Naʻá ku monūʻia ke maʻu ha meʻaʻofa, pea ne u maʻu ha ngaahi pōpoaki Kilisimasi fakamāfana he ʻinitanetí mei he kakai fakaʻofoʻofa ʻoku mau feohí. Ko ha ngaahi tāpuaki fakaʻofoʻofa ʻeni, pea naʻe lava ke u nofotaha ʻia Kalaisi ʻi heʻeku manatuʻi ke houngaʻia ʻi he meʻa kotoa pē.”

ʻApikale S., taʻu 14, Sakata, ʻInitonēsia

Siamane

Miuniki, Siamane

“ʻOku kamata ʻemau Kilisimasí ʻi he ʻaho 1 ʻo Tīsemá. ʻOku teuteuʻi kotoa e falé. ʻOku angamaheni ʻaki ke fakaava e ngaahi māketi Kilisimasi he ngaahi kolo lalahí ʻi he fakaʻosinga ʻo e ʻuluaki uike ʻo e Kilisimasí (ʻAloʻi ʻo Sīsū Kalaisí).

“ʻOku kamata fakaava ʻe he tokotaha kotoa pē ʻa e matapā ʻi heʻenau tohi māhina Advent ʻi he ʻaho ʻuluaki ʻo Tīsemá.

“ʻOku pehē ʻe he tukufakaholó ʻoku haʻu ʻa Seni Nikolasi ʻi he ʻaho 6 ʻo Tīsemá. ʻOkú ne ʻomi e nati, fuaʻiʻakau, mo e sokoleti. ʻOkú ne fakafonu e puti kuo ʻosi fakamaʻa ʻe he fānaú pea fokotuʻu ʻi he pō kimuʻá. ʻI he Efiafi kimuʻa he ʻaho Kilisimasí, ko e ʻaho 24 ʻo Tīsemá, ʻoku mau fakafiefiaʻi fakataha e Kilisimasí mo maʻu ʻemau ngaahi meʻaʻofá.

“ʻOku mau tutu e teʻelango Advent ʻi he Sāpate kotoa pē ʻi Tīsemá, mo hivaʻi ha ngaahi hiva Kilisimasi, kai mā sinisā, mo inu melie. ʻI he hokosia e taimi ke fakaava ai ʻemau ngaahi meʻaʻofá, kuo pau ke mau tomuʻa kumi ha pikolo mahi ʻi he fuʻu ʻakau Kilisimasí. Ko hai pē te ne maʻu e pikoló te ne ʻuluaki fakaava ʻene meʻaʻofá.

“Lolotonga e mahaki fakaʻauha COVID-19, naʻe fakafiefiaʻi ʻe homau fāmilí ʻa e Ngaahi Sāpate Advent ʻi ha ngaahi fepōtalanoaʻaki vitiō koeʻuhí ke mau ongoʻi vāofi ange.

“Naʻe tāpuni kotoa e ngaahi māketi Kilisimasí, pea naʻe ʻikai ngofua ke fai ha paati fakafiefia ʻi he akó. Ka neongo ia, ne mau lava ʻo fiefia ʻi he faʻahitaʻu Kilisimasí koeʻuhí he naʻa mau maʻu ha taimi lahi ange ke taʻo kūkisi fakataha. ʻOku mau kofu ha ngaahi meʻaʻofa ʻi homau ʻapiakó, maʻá e fānau faingataʻaʻia ʻi he ngaahi fonua kehé.

“ʻOku mau mamata he taʻu kotoa he ngaahi faiva ki he ʻaloʻi ʻo Sīsū Kalaisí.

“Ko e hoʻatā Sāpate Advent kotoa pē, ʻoku mau hiva fekauʻaki mo Sīsū Kalaisi. ʻOku mau fokotuʻu ha fakatātā ʻo e ʻAloʻí ʻi homau loto falé ke fakamanatu fakaʻaho mai homau Huhuʻí.”

Samala, Saliha, mo Sēlai S., Pavalia, Siamane

ʻInitia

“Naʻe makehe ʻaupito kiate au ʻa e Kilisimasi ʻo e taʻu kuo ʻosí. Naʻe kehe ʻaupito ia mei he ngaahi Kilisimasi he kuohilí. Naʻá ku kau he taʻú ni ʻi hono tokoniʻi ha kakai tokolahi lolotonga e mahaki fakaʻauhá.

“Neongo naʻe ʻikai ke mau lava ʻo ʻalu ki he lotú pe kau ʻi he niʻihi ʻo ʻemau ngaahi ʻekitivitī Kilisimasi angamahení, ka naʻe kei langaki moʻui pē hono tokoniʻi e niʻihi kehé peá u ongoʻi ai e fiefia ʻo e Kilisimasí. Naʻe fakafetongi meʻaʻofa hoku fāmilí. Naʻa mau ngaohi foki mo ha meʻatokoni ifo pea foaki ia ki homau ngaahi kaungāmeʻa tokolahi ʻi he ngaahi tui fakalotu kehé.

“Naʻá ku ngāue faivelenga ʻi he polokalama Fakamaama e Māmaní mo tokoniʻi e kakaí. Naʻá ku maʻu ʻa e nonga mo e fiefia lahi ʻi hono fakahoko iá. ʻOku ou ʻilo ʻoku ʻofa ʻa e Tamai Hēvaní ʻiate au pea mo e kotoa ʻEne fānaú. ʻOku ou ʻilo naʻe hāʻele mai ʻa Sīsū Kalaisi ki māmani ke ʻofa mo fakamoʻui kitautolu.”

Lutiuiki V., taʻu 14, Pengalulu, ʻInitia

ʻOkú ke Fakafiefiaʻi Fēfē Nai?

Tatau ai pē pe ko e fē feituʻu ʻi māmani ʻokú ke nofo aí, ʻoku hoko ʻa e Kilisimasí ko ha taimi ke fakafiefiaʻi ai ʻa e meʻaʻofa maʻongoʻonga taha kuo foaki maí. Fēfē nai koe? ʻOkú ke fakafiefiaʻi fēfē nai mo ho fāmilí ʻa e Kilisimasí mo manatua e ʻaloʻi ʻo Sīsū Kalaisí? ‘Ave hoʻo ʻū taá mo e ngaahi talanoá ki he [e-mail].