“Pagserbisyo uban sa Tibuok Ninyong Kasingkasing ug sa Malipayong Paagi,” Alang sa Kalig-on sa mga Kabatan-onan, Hulyo 2022.
Pagserbisyo uban sa Tibuok Ninyong Kasingkasing ug sa Malipayong Paagi
Sa dihang mitumaw ang kahigayonan sa pagserbisyo diha sa Food Bank of Mexico, tulo ka batan-ong babaye (lakip sa akong kaugalingon), usa ka batan-ong lalaki gikan sa among grupo sa kabatan-onan, ug lain pang 10 ang mihukom sa pag-apil.
Sa sinugdanan, wala koy ideya kon unsay among buhaton. Apan sa wala madugay ang mga tawo diha sa pundohanan og pagkaon [food bank] mipasabot nga among ilain ang mapan-os ug dili mapan-os nga mga pagkaon ngadto sa mga grocery bag aron makahimo og mga putos sa pagkaon alang sa mga tawo nga nanginahanglan. Ang among grupo mibahin sa mga buluhaton, dayon nagsugod kami sa pagputos. Paspas kaming mitrabaho isip usa ka team ug mihimo og sobra sa 500 ka grocery bag!
Gikan niini nga kasinatian nakat-onan nako nga bisan kon wala kitay daghan nga mga kabtangan sa atong kaugalingon, makatabang gihapon kita sa uban kinsa adunay mas menos pa. Sa ginagmay nga paagi, kitang tanan makatabang sa nagkalainlaing paagi. Nasayod ako nga kita mapanalanginan kon kita moserbisyo.
Ganahan kaayo ko nga moserbisyo diha sa food bank. Kon hatagan ko og kahigayonan sa pagbuhat niana pag-usab, siyempre buhaton nako! Nindot kaayo nga makaserbisyo sa uban. Kon kamo adunay kahigayonan sa pagserbisyo, buhata kini! Ug buhata kini uban sa tibuok ninyong kasingkasing ug sa malipayong paagi.
Ang tagsulat nagpuyo sa Siyudad sa Mexico, Mexico.