“Ayaw Kahadlok,ang Ginoo Nag-uban Kaninyo,” Alang sa Kalig-on sa mga Kabatan-onan, Hulyo 2022.
Kataposang Pulong
Ayaw Kahadlok—ang Ginoo Nag-uban Kaninyo
Gikan sa usa ka pakigpulong sa Oktubre 2018 nga kinatibuk-ang komperensiya.
Ang kahadlok dili bag-o. Sukad sa karaang panahon, ang kahadlok mipakunhod sa panglantaw sa mga anak sa Dios. Diha sa 2 Mga Hari, ang hari sa Syria mipadala og usa ka panon aron sa pagdakop ug pagpatay sa propeta nga si Eliseo.
“Sa dihang ang sulugoon ni Eliseo migawas sayo sa buntag, nakita niya ang kasundalohan nga naglibot sa siyudad. Ug nangutana ang sulugoon kang Eliseo, “Unsa may atong buhaton?” (2 Mga Hari 6:15).
Mao kadto ang kahadlok nga gisulti.
“Ug si [Eliseo] mitubag, Ayaw kahadlok: kay sila nga ania uban kanato labing daghan kay kanila nga anaa kanila.
“Ug si Eliseo nag-ampo, ug miingon, Ginoo, ako nagaampo kanimo, bukha ang iyang mga mata, aron siya makakita. Ug gibuka sa Ginoo ang mga mata niadtong batan-ong lalaki, ug siya nakakita: ug, ania karon, ang bukid napuno sa mga kabayo ug mga carro nga kalayo nanaglib[o]t kang Eliseo.”(2 Mga Hari 6:16–17).
Kita mahimong aduna o walay carro sa kalayo nga gipadala aron sa pagkuha sa atong mga kahadlok ug pagbuntog sa atong mga demonyo, apan ang leks[i]yon klaro. Ang Ginoo nag-uban kanato, naghunahuna kanato ug nanalangin kanato sa mga paagi nga Siya lamang ang makabuhat.
Kon kita aktibong mosalig sa Ginoo ug sa Iyang mga pamaagi, kon kita anaa apil sa Iyang buhat, dili kita mahadlok sa dagan sa kalibotan o mabalaka niini. Ang Ginoo nagtan-aw kanato, nag-amuma kanato, ug nag-uban kanato.