Mga Pangutana ug Mga Tubag

“Unsaon nako sa pagdesisyon kon kini mao na ba ang labing maayong panahon sa pagserbisyo og misyon?”

“Hapit na sa 40 ka tuig ang milabay samtang ako namalandong sa hagit sa misyon, ako mibati [og] pagkadili gay[o]d angayan ug pagkadili andam. Akong nahinumdoman nga nag-ampo, ‘Langitnong Amahan, unsaon man nako sa pagserbisyo sa misyon nga ang akong nahibaloan gamay ra man kaayo?’ Ako mituo sa Simbahan, apan akong gibati nga ang akong espirituhanong kahibalo limitado kaayo. Samtang ako nag-ampo, ang pagbati miab[o]t: ‘ Ikaw wala masayod sa tanan, apan ikaw igo nga nasayod!’ Kana nga binalik nga kasigurohan nakahatag kanako og kadasig sa paghimo sa sunod nga lakang ngadto sa natad sa misyon.”

Elder Neil L. Andersen sa Korum sa Napulog Duha ka Apostoles, Okt. 2008 nga kinatibuk-ang komperensiya ( Liahona, Nob. 2008, 13).

Ang Ginoo Moandam og Paagi

“Ang Langitnong Amahan adunay buluhaton alang sa matag usa kanato. Kon atong basahon ang Iyang mga pulong, ug ang mga pulong sa Iyang pinili nga mga sulugoon, kita masaligon nga masayod unsa ang Iyang gusto nga atong buhaton. Kita nasayod nga ang Ginoo moandam og usa ka paagi alang kanato aron matuman ang mga butang nga Iyang gusto nga atong buhaton (tan-awa sa 1 Nephi 3:7). Siya kanunayng anaa alang kanato kon kita maningkamot sa pagsunod sa Iyang mga sugo.”

Manuela O., 15, Ghana

Kamo Mahimong Dili Gayod Mobati nga 100% nga Andam

“Ako usa ka propesyonal nga surfer, ug ako usa kanang ihikling aron masinati ang tinuod nga kalipay nga moabot gikan sa pagserbisyo og usa ka misyon. Mihulat ako hangtod akong nabati nga andam nako nga moadto, ug ako napanalanginan tungod niini. Usa kini ka desisyon tali kanimo ug sa imong Amahan sa Langit. Kamo mahimong dili gayod mobati nga 100% nga andam na. Ang pagsumiter sa inyong papeles sa misyon nagkinahanglan kanunay sa hugot nga pagtuo, apan angay lang kini.”

Jordan C., 22, California, USA

Ang Ginoo Moandam ug Mopalig-on Kaninyo

“Makapangutana kamo kanunay sa Ginoo diha sa pag-ampo. Ang Ginoo mopalig-on niadtong kinsa Iyang tawagon nga mamahimong mga misyonaryo. Sa dihang namatay ang akong papa, nahupay ko pinaagi sa akong pagpamatuod sa plano sa kaluwasan. Apan adunay daghang tawo niining kalibotan kinsa wala pa gihapon nasayod mahitungod sa plano sa Langitnong Amahan. Ako nasayod nga ang Ginoo nag-andam og mga tawo alang nako nga matudloan.”

Felipe F., 17, Brazil

Isulat ang Espirituwal nga mga Pag-aghat

“Sa dihang nag-ampo ko mahitungod sa pagserbisyo og misyon, akong gisulat ang mga pag-aghat nga akong nadawat gikan sa mga pakigpulong, musika, o mga higala. Sa dihang mibati ko nga nawad-an og kadasig samtang nag-andam alang sa akong misyon, akong balikan ug basahon ang mga butang nga gisulti sa Espiritu kanako. Akong gisumiter ang akong mga papeles ug misalig sa Ginoo. Kon kamo mopadayon inubanan sa hugot nga pagtuo, wala kamo masayod kon unsaon niini paglihok, apan inyong mabatyagan ang kamot sa Dios diha sa inyong paghimo og desisyon!”

Bryanna M., 19, Oregon, USA

Dawata ang Inyong Patriyarkal nga Panalangin

“Sukad ako nakadawat sa akong patriyarkal nga panalangin, akong nahibaloan nga ako kinahanglan nga mopaambit sa ebanghelyo. Ako nag-andam alang sa usa ka misyon pinaagi sa pagpaambit sa ebanghelyo sa akong mga higala. Bisan kon akong gibati nga ang pagserbisyo og full-time nga misyon dili husto alang kanako kon ako mas tigulang na, ako nasayod gihapon nga ako makapaambit sa ebanghelyo sa tibuok nakong kinabuhi.”

Elise D., 14, Florida, USA

Pangutana sa Ginoo ug sa Uban

“Tingali 14 anyos lang ko, apan namalandong ako niini nga pangutana sa akong kaugalingon. Kon moabot na ang panahon alang kanako sa pagdesisyon kon kanus-a ko dapat moserbisyo, mag-ampo ako sa Ginoo sa pagtabang kanako nga makakaplag sa akong tubag. Makig-istorya usab ako sa mga tawo kinsa suod kaayo nako, lakip sa akong pamilya, bishop, ug mga higala.”

Jordan V., 14, Nevada, USA

Ang Ginoo Mohatag Kaninyo og Tubag

“Kanunay ako nga nagtinguha sa pagserbisyo og misyon, apan ako nasayod nga dili kini sayon nga desisyon. Kon kita makugihon nga magtinguha sa pagtuon sa mga kasulatan ug kanunayng mag-ampo sa Langitnong Amahan, Ako nasayod nga Siya mogiya kanato. Salig sa Ginoo. Siya mosulti kaninyo sa husto nga panahon alang kaninyo sa pagserbisyo og misyon. Padayon sa pagpangita og tubag, ug kamo makadawat niini ug mobati nga andam na.”

Nicolle R., 14, Brazil

Pangandam sa Espirituwal, Mental, ug Pisikal nga Paagi

“Sinsero nga mag-ampo ug mamalandong sa mga kasulatan mahitungod sa inyong desisyon. Mahimong bukas ngadto sa unsay mahimong ihunghong o isulti sa Espiritu kaninyo. Ug sa kasamtangan, makatambong kamo sa tanang miting sa sakramento, seminary, mga klase sa Sunday school, ug mga klase sa Young Women o sa mga miting sa korum sa Aaronic nga Pagkapari. Makaandam usab kamo sa mental ug pisikal nga paagi.”

Addison H., 14, Utah, USA

Ang mga tubag gituyo alang sa pagtabang ug sa panglantaw, dili isip opisyal nga mga pamahayag sa doktrina sa Simbahan.

Unsay Inyong Hunahuna?

“Unsaon nako nga mahimong usa ka ehemplo ngadto sa mga sakop sa akong pamilya kon sila nanglimbasog sa pagsunod sa mga pagtulon-an ni Jesukristo?”

Ipadala ang imong tubag ug litrato sa dili pa ang Agosto 15, 2022.

I-email kanamo sa [e-mail]. O Adto sa ftsoy.ChurchofJesusChrist.org ug i-klik ang “Submit Your Work.” Sign in gamit ang inyong Account sa Simbahan ug dayon pilia ang “Alang sa Kalig-on sa mga Kabatan-onan” ubos sa “Choose Magazine [Pagpili og Magasin].” I-klik ang “Add File [Magdugang og File]” aron makapili sa inyong file ug mga litrato, ug dayon i-klik ang “Submit [Isumiter]” aron ma-upload ug mapadala ngari kanamo ang inyong file.

Ang mga tubag tingali i-edit alang sa gitas-on o sa pagklaro.