“Ang Makahingangha nga Gahom sa Pagpasalamat,” Alang sa Kalig-on sa mga Kabatan-onan, Hulyo 2022.
Ang Makahingangha nga Gahom sa Pagpasalamat
Dili lang kay nindot ang mahimong mapasalamaton—makapausab kini sa inyong kinabuhi.
Si Presidente Russell M. Nelson miingon, “Ang pag-ihap sa atong mga panalangin mas maayo kaayo kay sa pag-ihap og usab sa atong mga problema. … [Ang pagpasalamat] maghatag kanato og mas dakong panglantaw bahin sa katuyoan mismo ug kalipay sa kinabuhi.”1
Tinuod kini! Ang pagkamapasalamaton makahatag og daghang panalangin. Ang pagpasalamat makatabang kaninyo nga mahimong mas malipayon ug mas piskay, mopalambo sa kalidad sa inyong hinanok nga pagkatulog, ug motabang kaninyo nga mahimong mas positibo ug maluloy-on ngadto sa uban. Kon magkadako ang inyong kamapasalamaton, mas maayo kamo nga makasagubang sa mga hagit sa kinabuhi. Sa kataposan, ang pagkamapasalamaton mas makapaduol kaninyo ngadto sa Dios, kinsa mao ang tighatag sa tanang maayong butang (tan-awa sa Santiago 1:17).
Alang ni Ester Carneiro Ponciano gikan sa Brazil, ang paglista sa mga butang nga siya mapasalamaton nakapalipay kaniya ug nakatabang niya nga makabaton og kalig-on ug kaisog sa malisod nga mga panahon.
Ang Lista sa Pasalamatan ni Ester
1 Ang Ebanghelyo
Paghulagway pinaagi ni Emily Davis
Samtang ako nagtuon sa mga kasulatan, nag-ampo sa matag adlaw, nagtambong sa seminary, ug nagtambong sa simbahan, ako mibati nga nadasig nga mas maningkamot pa. Ang ebanghelyo naghatag og paglaom nga ang mga mas maayong panahon umaabot. Tinuod gayod kini nga nakahatag og mahangtoron nga kalipay.
2 Ang Akong Pamilya
Ako adunay unom ka tawo sa akong pamilya, mao nga ang among balay kanunayng puno! Kami mogahin og panahon nga mag-uban sa pagdula og mga board game, manglakaw sa gawas, magluto, ug magtuon sa Dali, Sunod Kanako. Ang akong pamilya mao ang akong luwas nga kapahulayan. Uban kanila ako mahimo gayod nga magpakaako. Dili kami hingpit, apan kami malipayon kaayo. Ako mapasalamaton nga adunay mga tawo nga akong kanunayng masaligan.
3 Mga Higala
Bisan ang pandemya dili makabulag sa akong tinuod nga mga panaghigalaay. Kon kami dili magkauban, makapangita gihapon kami og mga paagi nga makauban ang usag usa. Ganahan kami nga magkinataw-anay ug manganta. Ganahan ko makigkuyog sa akong mga higala. Ako mapasalamaton kanila.
4 Ehersisyo
Kaganina lang, ang pag-ehersisyo wala unta sa akong lista sa pasalamat. Dili ko ganahan mahitungod sa pag-ehersisyo. Dayon nisulay ako nga magbisikleta ug nasuta nga ganahan diay ko niini! Kon magbisikleta ko, mobati ko og kalipay. Mobati ko nga ang kalibotan sa akong palibot daw usa ka mas maayo nga dapit. Makahatag kini kanako og panahon sa paghunahuna, motan-aw sa kinaiyahan, ug mobati sa gugma sa Langitnong Amahan. Kon ako mabalaka o maguol, makatabang kini nako nga mokalma. Kon magbisikleta ako, makakita ko og liboan ka rason nga malipay ug magmapasalamaton.
5 Musika
Ang musika makahatag kanako og hilabihan ka dakong kalipay. Ang akong kalibotan lahi ra kaayo kon walay musika. Ganahan ko mokanta ug maminaw sa musika sukad pa sa bata pa kaayo ko. Ang musika adunay gahom sa pagbayaw kanato, ug kini makapahimo kanato nga mobati og kalinaw. Ganahan gyod ko maminaw sa mga musika sa kabatan-onan gikan sa Simbahan.
Ang Pagpasalamat Maghatag og Tinuod nga Kalipay
Samtang ako motan-aw sa akong kinabuhi inubanan sa pagpasalamat, akong makita kon sa unsang paagi nga ang Ginoo anaa sa akong kinabuhi sa tanang higayon, bisan unsa pa tingali kalisod sa mga panghitabo. Akong naamgohan nga ang pinakayanong mga butang makahatag kanato og kinadak-ang kalipay. Kon motan-aw ka sa palibot ug makita unsa gayod ang importante, kamo makakita usab og tinuod nga kalipay.
Unsa Ang Imong Gipasalamatan?
Ang kataw-anan mahitungod sa paghimo og lista sa pagpasalamat mao nga sa higayon nga inyong masugdan, lisod nang mahunong. Sulayi kini! Paggahin og panahon sa pagsulat sa inyong kaugalingon nga lista sa pagpasalamat. Paghunahuna og mga paagi nga inyong mapahayag ang inyong pagpasalamat ngadto sa Langitnong Amahan ug sa uban alang niini nga mga gasa. Tingali inyong masuta nga kon mas daghan ang inyong masulat, mas magkadaghan ang mga butang nga inyong mahunahunaan nga inyong pasalamatan!