Dali, Sunod Kanako

2 Mga Hari 5

Ang Ubang Talagsaong Butang

Ni David A. Edwards

Mga Magasin sa Simbahan

Makita nga ang gamay ug yano nga mga butang mao ang mahinungdanon.

Ibutang nato nga ikaw adunay usa ka problema sa kahimsog nga dili na mamaayo. Adunay mosulti nimo mahitungod sa usa ka tawo nga makaayo kanimo. Nagpuyo siya sa layo, apan misulat ka niya ug dayon mihimo sa pagbiyahe aron nga ikaw makigkita kaniya ug makadungog kon unsa ang iyang isulti.

Sa dihang miabot ka sa iyang panimalay, ang iyang kaabag migawas ug miingon nga ang iyang agalon nagsulti nga paadtoon ka sa duol nga sapa aron maligo.

Ang kaabag mitalikod, ug dayon ikaw mibiya nga mibati og kasagmuyo. Naghunahuna ka nga, “mianhi ko sa ingon niini kalayo alang lang niana?”

Mga Gilaoman

Mao kini ang nahitabo kang Naaman. Siya usa ka kapitan nga taga Syria—usa ka respetado nga tawo nga adunay dakong responsibilidad. Apan siya adunay sanla, usa ka makahahadlok nga sakit sa panit.

Bisan og siya dili usa ka Israelihanon, nakadungog siya mahitungod ni propeta Eliseo tungod sa usa ka batan-ong sulugoon nga babaye kinsa gikan sa Israel. Si Naaman mituo sa iyang pagpamatuod mahitungod ni Eliseo ug sa Dios sa Israel. Busa miadto siya aron sa pagpakigkita kang Eliseo. Sa dihang miabot si Naaman sa panimalay ni Eliseo, si Eliseo mipadala og usa ka mensahero, kinsa misulti ni Naaman sa pagkaligo didto sa suba sa Jordan og kapito kahigayon aron mamaayo.

Naminaw si Naaman ngadto sa sulugoon

Mga paghulagway pinaagi ni Corey Egbert

Nasuko si Naaman. Naghunahuna siya nga iyang ikahimamat si Eliseo ug nga si Eliseo mobutang sa iyang kamot diha sa dapit sa nasakit nga panit, ug motawag gikan sa Dios, ug sa milagrosong paagi moayo niini. Naghunahuna pa gani siya nga adunay mas maayo pa nga mga suba didto sa iyang gipuy-an nga siya mahimong maligo.

Si Naaman nagbaton og mga pagdahom. Siya nagdahom nga si Eliseo mogawas ug motan-aw kaniya. Kini mahimong tungod kay si Naaman adunay ingon ka taas kaayo nga posisyon ug naanad sa pagdawat og usa ka piho nga pagtahod. Siya usab nagdahom og dugang milagroso o dalaygon nga solusyon ngadto sa iyang problema kay sa nahatag kaniya. Tingali tungod kini sa mga istorya nga iyang nadungog mahitungod ni Eliseo. Mao nga ang iyang kasinatian nakapahimo niya nga mobati og gamay’ng kasuko.

Pagpaubos

Apan ang istorya bahin ni Naaman wala motapos diha. Usa sa iyang mga sulugoon mitanyag kaniya og pipila ka maalamon nga tambag:

“Sir nganong dili man nimo tumanon ang sugo sa propeta aron mamaayo ka sa imong sakit?” (2 Mga Hari 5:13).

Nakaamgo si Naaman nga husto ang sulugoon. Kon ang propeta mohangyo kaniya sa pagbuhat og dagkong butang, buhaton niya kini. Busa nganong dili mobuhat sa yano nga mga butang? Siya mipaubos sa iyang kaugalingon. Siya mipaunlod og kapito ka higayon didto sa suba sa Jordan ug sa kataposan naayo.

Si Naaman nga naligo sa Jordan

Gagmay ug Yano nga mga Butang

Usahay ang Ginoo mahimong mohangyo og usa ka tawo sa pagbuhat og “ubang talagsaong butang.” Apan dili ingon ana sa kasagaran molihok ang Ginoo. Sa kasagaran nga higayon Siya mogamit og “gagmay ug yano nga mga butang” aron sa pagpahinabo sa “dagko nga mga butang” sa atong mga kinabuhi (Alma 37:6).

Usahay ang atong mga gilaoman o ang atong garbo mahimong makapahunahuna kanato nga ang paagi sa Ginoo yano ra kaayo o gamay ra kaayo aron nga angayan sa atong panahon (tan-awa sa 1 Nephi 17:40–41). Apan ang Ginoo makatabang kanato sa pagbuntog niini nga mga pagbati ug mopaubos sa atong mga kaugalingon. Siya nahigugma kanato ug gusto nga mopanalangin ug motabang kanato nga mamahimong sama Kaniya (tan-awa sa Moises 1:39).

Ania ang pipila ka ehemplo sa gamay ug yano nga mga butang nga gihangyo sa Ginoo nga atong buhaton aron mas mapaduol kita ngadto Kaniya ug madawat ang Iyang mga panalangin.

• Mag-ampo ug mobasa sa mga kasulatan sa matag adlaw (tan-awa sa 2 Nephi 32:3, 9).

• Kon kamo makasala, paghinulsol (tan-awa sa Doktrina ug mga Pagkigsaad 1:31–32).

• Motambong sa simbahan ug moambit sa sakramento sa matag semana (tan-awa sa Moroni 6:5–6).

• Bayad sa ikapulo (tan-awa sa Malaquias 3:8–10).

• Mosunod sa Pulong sa Kaalam (tan-awa sa Doktrina ug mga Pakigsaad 89).

• Magmatinuoron (tan-awa sa Doktrina ug mga Pakigsaad 51:9).

• Magmabination (tan-awa sa Mga Taga-Efeso 4:32).

• Moserbisyo sa uban (tan-awa sa Mateo 25:34–40).

Tingali makahunahuna pa kamo og daghan pa.

Busa, kon kamo makasugat og butang nga gamay ug yano, hatagi og pagtagad. Kini mahimong usa ka sumbanan diha sa Alang sa Kalig-on sa mga Kabatan-onan nga booklet, ang uban tambag diha sa usa ka pakigpulong sa komperensiya, o butang nga gihangyo sa inyong bishop nga inyong buhaton. Bisan unsa man kini, hinumdomi si Naaman, ug buhata lang kini. Mahimong gamay ra kini, apan ang mga panalangin niini mahimong dako.