“Ang Templo ug ang Inyong Mahangtoron nga Panaw,” Alang sa Kalig-on sa mga Kabatan-onan, Hulyo 2022.
Ang Templo ug Ang Inyong Mahangtoron nga Panaw
Pagkabulahan nato nga nagiyahan diha sa balay sa Ginoo.
Gilitratohan ni Noel Maglaque
Kamo anaa sa usa ka panaw. Nagsugod kini sa dugay nang panahon ang milabay sa dihang kamo nagpuyo uban sa Langitnong Amahan isip espiritu Niyang mga anak nga lalaki o babaye. Karon kamo anaa dinhi sa yuta uban sa inyong espiritu nga nagpuyo diha sa usa ka pisikal nga lawas aron makakat-on sa tanan nga gikinahanglan aron usa ka adlaw makabalik ngadto sa Langitnong Amahan ug mamahimong takos sa tanan nga mga panalangin nga Siya anaa alang sa Iyang mga anak. Ang pipila sa labing talagsaong mga butang nga inyong makat-onan niining mahangtoron nga panaw anaa diha sa mga templo sa Ang Simbahan ni Jesukristo sa mga Santos sa Ulahing mga Adlaw.
Mga Templo sa tibuok Kalibotan
Sa dihang natawo ako niadtong 1928, adunay pito lamang ka templo. Karon kita aduna nay maanindot nga mga templo nga nagkatag sa tibuok kalibotan. Ug aduna pay dugang! Ang mga templo makahatag og kalipay ug ang gahom nga atong gikinahanglan alang sa atong mahangtoron nga panaw.
Walay laing mga gambalay [building] sa yuta—gani bisan ang labing matahom nga mga gambalay—ang nagbaton sa unsa ang anaa sa mga templo. Ang Manluluwas misulti ni Pedro nga siya mahatagan og gahom ug awtoridad aron nga “bisan unsay imong pagabugkoson dinhi sa yuta, didto sa langit pagailhon kini nga binugkos” (Mateo 16:19). Bug-at kana nga pamahayag! Ang mga templo gipahinungod ug gi-set apart pinaagi sa gahom sa pagkapari isip usa ka dapit sa pagpahigayon og sagradong mga ordinansa. Kini nga mga ordinansa moepekto sa isig ka habig sa tabil.
Ang Kalipay sa Mahangtoron nga mga Pamilya
Ang akong asawa, si Barbara, namatay hapit upat ka tuig na ang milabay. Apan tungod kay kami misulod sa balay sa Ginoo ug nasilyo isip bana ug asawa pinaagi sa gahom sa pagkapari, kami gibugkos nga makauban sa among pito ka anak, 43 ka apo, ug kapin sa 100 ka apo sa tuhod, hangtod sa kahangtoran. Pagkanindot nga butang ang templo! Ang kalipay mipuno sa akong kasingkasing tungod kay ang akong pamilya mahimong magkauban hangtod sa kahangtoran. Ug ang inyong pamilya mahimo usab.
Kon kamo maanaa na sa akong pangedaron, kamo dili na kaayo interesado sa pagbaton og daghang kwarta o pagdrayb og mahalon nga sakyanan. Ang labing bililhon nga butang sa inyong kinabuhi mao ang inyong pamilya—dili lang ang inyong pamilya apan ang inyo usab nga pamilya sa kahangtoran.
Ang Gahom sa Gipahiuli nga Kamatuoran
Kamo nasayod kon si kinsa kamo—usa ka anak nga lalaki o anak nga babaye sa Dios nga may potensiyal nga walay kinutoban. Kamo nasayod kon diin kamo gikan, nganong ania kamo dinhi, ug unsa ang anaa sa unahan sa kalibotan nga moabot.
Ako nahingangha nga kining mga kamatuoran miabot isip ang dalaygon nga resulta sa usa ka batang lalaki kinsa miluhod ug nag-ampo diha sa usa ka kakahoyan. Ang Amahan ug ang Anak mipakita ngadto ni Joseph Smith ug, sa hinay-hinay, ang mga panalangin sa ebanghelyo gipahiuli.
Ako adunay lig-on nga pagbati sa paghatag og pasalamat alang ni Joseph Smith. Ang atong gipahiuli nga panabot sa plano sa Dios, ang labing mahinungdanon nga tahas sa Pag-ula ni Jesukristo, ug ang mahangtoron nga kamahinungdanon sa mga pamilya ug mga templo nagsugod tanan diha kaniya. Kami magpadayon sa pagtukod og mga templo ug mopahibalo og mga bag-o samtang ang talagsaon, nagpadayon nga mensahe sa Pagpahiuli mokatap sa yuta.
Ang gipahiuli nga mga kamatuoran, ilabi na ang mga kamatuoran nga atong makat-onan pinaagi sa mga ordinansa sa templo, nagbutang sa kinabuhi ngadto sa panglantaw ug maghatag kanato og gahom sa pagtabang kanato sa atong mahangtoron nga panaw.
Himoa ang Templo nga Kabahin sa Inyong Kinabuhi
Kini tingali mahimong lisod alang kaninyo nga hunahunaon nga ang butang nga inyong buhaton karon makahimo og dakong kalainan sa mga katuigan gikan karon o gani human niining kinabuhia. Apan hinumdomi ang mahangtoron nga panaw nga kamo anaa. Kon kamo gibunyagan ug nakompirmahan, kamo naghimo og importanting mga lakang niining panaw.
Kamo makatabang niadtong kinsa nangamatay na nga makapadayon sa unahan sa ilang panaw pinaagi sa pagpahigayon og mga bunyag ug mga pagkompirmar alang kanila diha sa templo. Ako kining gihimo sa makadaghang higayon sa dihang ako anaa pa sa inyong pangedaron. Ako nakahinumdom nga usa ka higayon ako gibunyagan alang sa kapin sa 60 ka tawo. Magpusnga-pusnga ko taliwala sa mga pagbunyag!
Kon kamo makahigayon nga makaadto sa templo, buhata kini! Moadto sa makadaghan kutob sa mahimo. Palihog ayaw tutoki og maayo ang dili kaayo importanting mga butang nga mokuha og dako sa inyong panahon ug mobalda kaninyo gikan sa unsay tinuod ug mahangtoron. Bisan kon kamo nagpuyo og layo gikan sa usa ka templo, tutoki ug andama ang inyong kaugalingon karon og mahimong takos sa pagsulod sa templo.
Pagpangandam Karon alang sa Inyong mga Panalangin sa Templo
Usa sa unang mga ordinansa sa templo nga inyong madawat alang sa inyong kaugalingon mao ang pagtuga. Mao kini ang usa ka gasa sa gahom sa pagkapari nga magamit sa tanang mga anak sa Dios. Kita mogamit niining gahom pinaagi sa pagdawat sa mga ordinansa ug pagtuman sa mga pakigsaad nga kita mohimo diha sa templo sa matag adlaw sa atong kinabuhi.
Kamo makapangandam alang sa inyong pagtuga ug sa uban pa nga mga ordinansa sa templo pinaagi sa pagpamalandong, pag-ampo, ug pagkat-on mahitungod sa templo. Kon ang inyong mga ginikanan o mga apohan nakaadto na sa templo, pakig-istorya kanila mahitungod sa mahimayaong panalangin niini. Ang inyong bishop ug ubang mga lider motabang usab kaninyo. Manghinaot usab ko nga kamo makakaplag og maayong mga higala nga mosuporta kaninyo. Kamo mahimong magmapasalamaton kon moabot ang panahon alang kaninyo nga motambong sa templo ug kamo andam na sa pagdawat sa tanan nga kahibulongan nga mga saad ug mga panalangin nga gitinguha sa Ginoo nga ihatag diha kaninyo.
Si Kristo Nagtudlo sa Iyang mga Disipulo, ni Justin Kunz
Ang Panaw Nagpadayon
Ang katuyoan niining kinabuhi mao ang pag-andam sa atong mga kaugalingon alang sa sunod. Ang dakong plano sa Langitnong Amahan dili matapos diha sa kamatayon, tungod kay ang inyong espiritu dili gayod mamatay. Mopadayon kini ngadto sa kalibotan sa mga espiritu aron magpadayon sa pagkat-on, pagserbisyo, ug paghulat sa Pagkabanhaw. Dayon mangluhod ang tanang tuhod ug manumpa ang tanang dila nga si Jesus mao ang Kristo (tan-awa sa Isaias 45:23). Tungod sa Iyang Pag-ula ug Pagkabanhaw, ang atong mga lawas ug mga espiritu maghiusa, ug ang atong panaw mopadayon ngadto sa kahangtoran. Pagkamahimayaon nga panalangin nga anaa alang kanatong tanan!
Kon ang tanan matuman na, ang tanang butang sa mahangtoron nga sangpotanan ug kamahinungdanon gitutok diha sa kinabuhi ug misyon ni Jesukristo. Ang inyong kahibalo ug hugot nga pagtuo diha Kaniya motubo samtang kamo moserbisyo diha sa templo. Inyong mabati ang Iyang walay kinutoban nga gugma alang kaninyo ug masinati ang kalipay ug espirituwal nga gahom sa tibuok ninyong kinabuhi.