“Nasayod Ako nga Makita Nako Siya Pag-usab,” Alang sa Kalig-on sa mga Kabatan-onan, Hulyo 2022.
Ang Tema ug Ako
Ang kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari
Nasayod Ako nga Makita Nako Siya Pag-usab
“Magpasarang ako aron makadawat sa mga panalangin sa templo ug sa malungtaron nga kalipay sa ebanghelyo.”
Nagtuo ako nga ang Ginoo mihatag kanato og mga pamilya aron makatabang kita sa pagpalig-on ug pagsuporta sa usag usa. Ang Ginoo mihatag usab kanato og mga pamilya aron dili kita mag-inusara. Apan sa dihang mitaliwan ang akong amahan, mibati ako nga nag-inusara gayod. Ako ug ang akong amahan suod, ug nawad-an ko sa iyang makanunayon nga ehemplo. Kini mabati nga daw ang tanan nakong mabuhat mao ang paghilak.
Apan usa ka gabii, mihukom ako nga mag-ampo. Sa akong kasingkasing nabati nako ang Espiritu nga nagsulti kanako nga wala ako nag-inusara. Nasayod ako sa plano sa kaluwasan. Tungod sa Pag-ula ni Jesukristo, akong makita pag-usab ang akong amahan. Ang kahibalo nga ang mga pamilya mahimong mag-uban sa hangtod importante kaayo kanako. Ug nasayod ako nga mahimo kaming mahangtoron nga pamilya tungod nasilyo ang akong mga ginikanan diha sa templo.
Sa dihang nag-12 anyos ko, nagplano ko nga motambong sa templo aron mohimo og mga bunyag alang sa mga patay sa unang higayon. Apan dayon nasira ang mga templo tungod sa pandemya. Nagpaabot gayod ko nga makasulod sa templo alang sa unang higayon aron makabati sa kalipay didto.
Sa dihang gisilyo ang akong igsoon nga lalaki ngadto sa iyang asawa, nagpabilin ako sa gawas sa templo. Apan bisan gikan sa gawas, nakabati ako og maanindot nga pagbati sulod sa akong kasingkasing. Mao nga mahanduraw nako kon unsa gayod ang mabati sa sulod. Ang akong pamilya misulti kanako nga ang templo mao ang usa ka dapit diin mahimo kitang magmaya sa hingpit nga plano nga giandam sa Dios alang kanato.
Nakat-onan usab nako gikan sa mga pagtulon-an sa mga propeta nga makahimo ako og sagrado nga mga pakigsaad diha sa templo. Ang matag pakigsaad nga atong himoon diha sa templo importante gayod kaayo. Nadawat nako ang akong rekomend sa templo, ug dili na ako makahulat sa paggamit niini. Ug nasayod ako nga usa ka adlaw kon isilyo na ako ngadto sa akong umaabot nga asawa, ako makabaton og akong kaugalingon nga mahangtoron nga pamilya.
Ang tagsulat nagpuyo sa Culiacan, Mexico.