Ana Julia A.

17, São Paulo, Brazil

Imahe

batan-ong babaye

Litrato pinaagi ni Leonardo Conceição Motta

Nagpuyo ko sa kinadaghanan og tawo nga dapit sa akong nasod. Ganahan kong nagpuyo dinhi ug nagdiskobre og bag-o nga mga dapit uban sa akong pamilya. Nagpuyo ako uban sa akong mga ginikanan, akong manghod nga babaye, ug sa among iro, si Meghan. Ganahan ko nga ikauban sila. Kanunay kaming mangatawa ug mosulay sa pagbuhat og bag-o ug makapainteres nga mga butang. Mas ganahan kami sa pipila ka butang kay sa uban, apan kanunay namong mahinumdoman ang mga kasinatian.

Anaa na ako sa kataposang tuig sa pag-eskwela, ug nangandam na ko alang sa kataposang mga pasulit. Gikulbaan ko og gamay, apan nagsalig ko nga tabangan ko sa Ginoo latas niini.

Ganahan kong mosimba matag Dominggo. Adunay daghang batan-on sa akong ward, mao nga makalingaw ang mga kalihokan. Ang kabatan-onan sa akong palibot nagtabang kanako nga magpabiling lig-on sa ebanghelyo. Makasulti ko nga sila adunay dakong hugot nga pagtuo.

Nag-andam ko sa pagserbisyo og misyon. Gusto kong mopaambit sa ebanghelyo ngadto sa uban sama sa gibuhat sa mga misyonaryo sa akong pamilya. Nasayod ko nga mousab kini sa ilang mga kinabuhi ug sa akoa sa kahangtoran. Mapasalamaton ko nga nasayod nga mahimo akong makabaton og mahangtoron nga pamilya.