“Pagpangandam alang sa Dubai Temple,” Alang sa Kalig-on sa mga Kabatan-onan, Hulyo 2022.
Pagpangandam alang sa Dubai Temple
Ang kabatan-onan sa Dubai ug Qatar nagpaambit sa ilang gugma sa templo ug sa ilang kahinam mahitungod sa usa ka templo nga tukoron duol nila.
Mga litrato ni Saajan pinaagi ni Carla Nacario
Pipila lang kana ka yano nga mga pulong, apan kini mousab sa inyong kinabuhi kon ipamulong sa propeta sa Dios. Atol sa kinatibuk-ang komperensiya, ang mga miyembro sa Simbahan sa tibuok kalibotan mahinamon nga maminaw sa mga pahibalo sa bag-ong mga templo. Ug alang nila ni Sajaan ug Gwen, sa dihang gipamulong ni Presidente Russell M. Nelson ang mga pulong, “Dubai, United Arab Emirates,” sa Abril 2020 nga kinatibuk-ang komperensiya, kining duha ka batan-on nasayod nga dili gayod mahimong susama pa ang ilang mga kinabuhi.1
Himamata si Saajan gikan sa Dubai
Ang dose anyos nga si Saajan wala pa gayod makakita og templo sa personal.
“Ang akong mama kanunayng adunay tumong sa pag-adto sa templo,” miingon si Saajan. “Ang iyang gugma alang sa templo makatakod. Karon ang akong tumong sa kinabuhi mao ang pagbisita sa templo.”
Natawo si Saajan sa India, apan sa dihang nadiborsyo ang iyang mga ginikanan, mibalhin siya uban sa iyang mama ngadto sa United Arab Emirates. “Kugihan gayod kaayo motrabaho ang akong mama. Sama siya sa usa ka superhero alang kanako. Bisan atol sa malisod nga mga panahon, dili siya moundang.”
Ang mama ug lola ni Saajan mipasakop sa Simbahan sa India pipila ka tuig sa wala pa siya matawo. Gibasa nila ang Basahon ni Mormon ug nasayod nga kini usa ka tubag sa ilang mga pag-ampo. Midako si Saajan nga nagsimba uban sa iyang mama, ug siya bag-ohay lang nabunyagan human naghulat sa pagtugot sa iyang amahan.
“Ang pagpabunyag mao ang usa sa labing maayo nga mga pagpili nga akong nahimo sukad,” miingon siya. “Ug sa dihang nadawat nako ang gasa sa Espiritu Santo, gibati nako nga mainiton kaayo ug malipayon sa sulod.”
Karon si Saajan nag-apod-apod sa sakramento alang sa iyang ward ug nangandam nga mosulod sa templo. Nadawat niya ang iyang rekomend sa templo, ug dili na siya makahulat nga mosulod sa Dubai United Arab Emirates Temple inig-mahuman na kini.
“Sa dihang nadungog nako nga ilang gipahibalo ang templo, personal nakong gibati nga kini alang kanako,” miingon si Saajan. “Tubag kini sa among mga pag-ampo. Nahingangha ko tungod kay gitukod nila kini sa dapit gayod kon hain kami nagpuyo! Makasakay ko og tren direkta paingon ngadto sa templo ug makanunayong makaadto kon gusto nako. Mahinamon usab ako alang sa Bengaluru India Temple nga mahimong mabisita sa akong mga apohan.”
Mahinamon si Saajan alang sa iyang mga apohan nga maanaa ang Bengaluru India Temple duol kanila.
Gusto ni Saajan nga mohimo sa buhat sa templo alang usab sa iyang ubang mga katigulangan.
“Giandam nako ang akong kaugalingon aron mahimo akong takos nga mosulod sa templo. Gusto nakong buhaton ang unsay akong mahimo sa pagtabang sa tanan nakong mga katigulangan. Aduna akoy makapahinam gayod nga oportunidad sa pagserbisyo sa Ginoo ug sa pagbuhat sa mga butang nga may kalabotan sa gingharian sa Dios.”
Himamata si Gwen gikan sa Qatar
Mga litrato ni Gwen pinaagi ni Christina Smith ug sa maayong kabubut-on sa iyang pamilya
Sa unang 18 ka tuig sa iyang kinabuhi, nakapuyo si Gwen sa lima ka nagkalainlaing nasod: Scotland, Angola, England, Kazakhstan, ug Qatar. Ang trabaho sa iyang papa midala kanila sa tibuok kalibotan, apan sa labing bag-o, ngadto sa Middle East.
Ang mga magulang nga mga igsoon ni Gwen milain na og puyo tanan, mao nga nagpuyo siya sa Qatar uban ang iyang mama ug papa. Usa sa iyang paborito nga mga kasinatian mao ang pagbiyahe uban ang kabatan-onan sa iyang ward alang sa usa ka pagbiyahe sa templo ngadto sa Kiev Ukraine Temple. Walay templo sa duol, mao nga ang mga Santos sa Middle East kinahanglang mosakay og eroplano aron sa pagbisita sa mga templo sa ubang mga nasod.
“Mahinamon kaayo ko alang sa among biyahe, ug gusto nakong magdala og mga ngalan sa pamilya,” miingon siya. “Kada adlaw mangita ko og mga ngalan sa pamilya sa akong phone samtang nagpaingon ngadto ug gikan sa eskwelahan. Nakakita ko og mga 200 ka ngalan. Mao nga mibati ako nga andam na nga moadto!”
Apan dihay usa ka gamay nga problema nga dili siya mahimong makapangandam.
Usa ka tibuok kalibotan nga pandemya.
Ang eroplanong gisakyan ni Gwen mitugpa sa Ukraine sa Marso sa 2020—sa dihang nagsugod sila sa pagkadungog og dugang mahitungod sa pagkatap sa COVID-19 nga kagaw. Uban sa tabang sa langit, nakaabot sila ngadto sa templo ug nakapahigayon sa mga bunyag alang sa mga ngalan sa pamilya nga giandam ni Gwen.
“Dihay milagro human sa milagro human sa milagro,” miingon siya. “Sa among pagbiyahe sa sakyanan paingon sa templo, nabalaka ako mahitungod sa pandemya. Apan diha sa templo mibati gayod ako og dakong kalinaw ug kahupay. Ug nakasakay kami og eroplano pabalik sa Qatar sa wala pa gayod gisirad-an ang mga utlanan.”
Apan ang mama ni Gwen, kinsa mibisita sa usa sa mga igsoon ni Gwen didto sa Estados Unidos sa Amerika, wala makabalik sa Qatar. Gi-quarantine si Gwen ug ang iyang amahan sa balay sa dihang ang iyang amahan nagkasakit og COVID. “Taodtaod siyang nasakit og grabe ug dili kaayo siya makalihok,” miingon si Gwen. “Gibati gayod nako nga nag-inusara. Wala pa ang akong mama, ug dili ko kahibalo unsaon sa pagluto og daghang pagkaon gawas sa grilled cheese sandwich.”
Apan si Gwen adunay espesyal nga kasinatian samtang nagpahigayon og pagsimba sa panimalay uban sa iyang papa.
“Mabati nga daw ang mga tawo kansang mga ngalan among gidala ngadto sa templo nag-uban kanako ug sa akong papa,” miingon siya. “Wala na ako mibati nga nag-inusara. Emosyonal kaayo kadto nga kasinatian. Dako kaayo nga panalangin ang pagbisita sa templo sa wala pa ang pandemya.”
Ang Dubai United Arab Emirates Temple gipahibalo usa lang ka bulan human sa iyang pagbiyahe sa templo ngadto sa Ukraine. Nagmahinamon si Gwen! Ug nasayod siya kon unsa kini ka mahinungdanon ngadto sa katawhan sa iyang dapit.
“Nasayod ko nga adunay mga tawo sa akong dapit kinsa dili na makabayad og pagbiyahe sa eroplano paingon ngadto sa laing templo sa Europe. Naghulat na sila nga masilyo isip mahangtoron nga mga pamilya. Nagpakita kini kanako nga nahitabo gayod ang pagpundok. Giandam namo ang agianan alang sa pagbalik og usab ni Kristo.”
Mga Panalangin sa Templo
Usa ka butang nga komon nila ni Gwen ug Saajan mao nga ang templo nagpanalangin na sa ilang mga kinabuhi. Si Presidente Nelson miingon, “Ang mga templo mao ang kinatas-ang bahin sa Pagpahiuli sa kahingpitan sa ebanghelyo ni Jesukristo. Sa kaayo ug kamanggihatagon sa Dios, mas gipaduol Niya ang mga panalangin sa templo ngadto sa Iyang mga anak bisan asa.”2