“Na Kaukauwa eda Vakatoka me Loloma Soli Wale,” Me iSakisaki ni iTabagone, Jiulai 2022.

Veivuke ni Bula

Na Kaukauwa Eda Vakatoka me Loloma Soli Wale

Mai vei Steven J. Lund

Peresitedi Raraba ni Cauravou

iVakatakilakila

Steven J. Lund

Na loloma soliwale ni Kalou e rawa ni vukei keda, se cava ga na bolebole eda sotava.

iVakatakilakila

goneyalewa

iTaba mai na Getty Images

Au a tiko ena nona veibulu e dua na lewe ni tabanalevu e liu ka a mate ena kukuna ni oti e dua na gauna balavu ni nona sagasaga me vorata na rarawa ka vu mai na mate ni vakasama. E a kavoro na yaloqu ni‘u tagicaka vata kei ira na nona itokani kei na matavuvale na nona yali.

Na lomaocaoca kei na veibolebole tale eso ni vakasama e rawa ni rabailevu ka dredre vei ira na tamata era sotava tiko kei ira kece era lomani ira. Na itukutuku vinaka ni kosipeli sa ikoya ni sa solia na Karisito na inuinui kei na veivuke mai na Nona isolisoli ni loloma soliwale.

E dua na vuli me baleti ira e 600 na itabagone qasecake ena Brigham Young Univesiti e vakaraitaka ni o ira era kila na loloma soliwale i Jisu Karisito e tu sara e ra na nodra ivakatagedege ni lomaocaoca, nuiqawaqawa, bula ni sasaga me uasivi ena veika kece ga, kei na madua.¹ Na cava era kila na itabagone oqo me baleta na loloma soli wale ka vakavuna me vakayaco veisau levu ki na nodra bula?

E Lomani Keda Vakatawayalani na Kalou

Ena vuli oqo, eso na tamata era vakabauta ni Kalou kei Jisu Karisito e rau na lomani ira ka vukei ira walega kevaka era sa uasivi sara. O ira na tamata oqo era bula dredre vakalevu cake mai vei ira tale eso era kila ni o Rau na Kalou kei Jisu Karisito e tawayalani na Nodrau lomani ira ka Rau dau tu vakavoleka tu ga ena vukudra.

Ena vosa Vakavalagi, na vosa loloma soliwale e levu tu na kena ibalebale. E rawa ni kena ibalebale na maqosa, yalovinaka, se veidokai. Ena vosa vaka-Iperiu, e kena ibalebale na tokona se lomavinaka e soli ena yalololoma. E rairai oqo na ivakamacala ni vuna era vakayagataka kina na vakabauta Vakarisito na vosa loloma soli wale ena vuqa na veisenijiuri me vakamacalataka na loloma soliwale ni Kalou, lomavinaka, kei na loloma.

E Gadreva na Kalou me Vukei Keda

O ira na Yalododonu Edaidai era kila ni loloma soliwale e levu cake mai na dua walega na ivakarau ni Kalou. E vakamacalataka talega na Loloma Soliwale na sala e veimaliwai kina kei keda o Koya ni da saga me da vakataki Koya (raica na Moronai 10:32). E vakamacalataka o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada ena gauna oya, ni loloma soliwale sa ikoya “na veivuke vakalou kei na solisoli ni kaukauwa eda tubu mai kina vaka tamata cala ka yalani eda tu kina ena gauna oqo ki na tamata bula vakacerecerei.”²

Ena vuli a tukuni taumada, o ira na itabagone era a raica na Kalou kei Karisito ni Rau sa tuvakarau, lomasoli, ka rawa ni vukei ira, e lailai sara na bolebole ni nodra ituvaki ni bula ni vakasama mai vei ira era nanuma ni ra sa tu vakataki ira.

Ena Sotavi Keda na Kalou ena Vanua Eda Tu Kina

Sa rui levu na tamata era nanuma ni veivuke ni Kalou e sega ni se ganiti ira baleta ni ra sa sega ni rawata. Ia na ka dina, na loloma soliwale e isolisoli. E sega ni dodonu mo bunotaka e dua na isolisoli. O na gadreva ga mo digitaka mo ciqoma.

Ena vakadidike oya, e lailai sara na dredre ni bula ni vakasama vei ira era kila ni vukei keda na Kalou ena vanua cava ga eda tiko kina ka veitalia na cava na veika eda sa cakava. E vakavuvulitaka o Elder D. Todd Christofferson ena Kuoramu ni iApositolo Le Tinikarua, “E sega ni gadrevi me da rawata eso na ivakatagedegede lalai ni rawaka se caka vinaka me qai veivuke mai kina na Kalou—na veivuke vakalou sa rawa ni noda ena vei auwa ni veisiga, veitalia na vanua eda tiko kina ena salatu ni talairawarawa.”³

Ena veibulu nei noqu itokani, au vakavinavinakataka na kaukauwa ni ivakadinadina era a wasei me baleta na inuinui kei na veivakabulai sa vakarautaki tu ena vuku ni Veisorovaki i Jisu Karisito. Sa dina sara, o Karisito sa iwali ni leqa kecega ka ivurevure ni reki dina.