“Na Valetabu kei na Nomu iLakolako Tawamudu,” Me iSakisaki ni iTabagone, Jiulai 2022.
Na Valetabu kei na Nomu iLakolako Tawamudu
Eda sa kalougata dina ni da tuberi ena vale ni Turaga.
iTaba mai vei Noel Maglaque
O lako tiko ena dua na ilakolako. A tekivu ena dua na gauna balavu sa oti ni o a bula voli kei na Tamada Vakalomalagi me vaka e dua na Luvena tagane se yalewa vakayalo. Ena gauna oqo o sa mai tiko e vuravura ka vakavaletaki na yalomu ena yagomu mo vulica kina na veika taucoko e gadrevi me rawa ni o lesu tale ki vua na Tamada Vakalomalagi ka kilikili kaya mo ciqoma na veivakalougatataki kece sara e sa vakarautaka tu o Koya vei ira na Luvena. Eso na ka cecere o na vulica ena ilakolako tawamudu oqo era tiko ena valetabu ni Lotu i Jisu Karisito ni Yalododonu Edaidai.
Valetabu ena Veiyasai Vuravura
Ena gauna au a sucu kina ena 1928, a vitu voli ga na valetabu. Ia oqo esa tu na valetabu vakasakiti ena veiyasai vuravura. Ka na levu cake sara! Na valetabu e kauta mai na reki kei na kaukauwa eda gadreva ena noda ilakolako tawamudu.
E sega tale na veivale e vuravura—na vale totoka duadua mada ga—e tu kina na veika era tu ena valetabu. A kaya na iVakabula vei Pita ni na soli vua na kaukauwa kei na lewa, me rawa kina ni “na vauci mai lomalagi na ka kecega ko na vauca e vuravura” (Maciu 16:19). Oqori e dua na itukutuku levu! Era sa vakatabui ka vakatikori na valetabu ena kaukauwa ni matabete me vanua e vakayacori kina na veicakacaka tabu vakalotu. Na cakacaka vakalotu oqo era mana ena yasa ruarua ni ilati.
Na Rekitaki ni Matavuvale Tawamudu
A takali yani na watiqu o Barbara ena voleka ni va na yabaki sa oti. Ia, baleta ni keirau curuma yani na vale ni Turaga ka keirau vauci vakaveiwatini ena kaukauwa ni matabete, keirau sa vauci vata kina kei iratou na vitu na luvei keirau, 43 na makubui keirau, ka sivia e 100 na makubui keirau vakarua, me tawamudu. Sa dua na ka vakasakiti na valetabu! E vakasinaiti na yaloqu ena reki baleta ni ratou na tiko vata me tawamudu na noqu matavuvale. Ka rawa talega ni vakakina na nomu matavuvale.
Ni o sa yacova na noqu yabaki ni bula, o na sega soti ni malele ki na levu ni ilavo se na draivataki ni dua na motoka totoka. Na ka talei duadua ga ena nomu bula sa ikoya na nomu matavuvale—sega walega ni nomu matavuvale eke ia na nomu matavuvale talega ena veigauna tawamudu.
Na Kaukauwa ni Dina Vakalesuimai
O sa kila o cei o iko—e dua na luvena tagane se yalewa na Kalou ka sega ni yalani na nomu gugumatua. O kila na vanua o lako mai kina, na vuna o mai tiko kina eke, kei na veika sa tu mai liu ena vuravura sa bera mai.
Au kurabui ni a yaco mai na dina oqo me isau vakasakiti ni nona a la‘i tekiduru ka masu ena dua na veikau e dua na gonetagane lailai. E rau a rairai mai na Tamana kei na Luvena vei Josefa Simici ka, qai yaco mai ena ikalawa lalai, na veivakalougatataki ni kosipeli.
Au dau vakavinavinaka vakalevu me baleti Josefa Simici. Na noda kila vakalesui mai ni ituvatuva ni Kalou, na itakele ni itavi ni Veisorovaki i Jisu Karisito, kei na bibi tawamudu ni matavuvale kei na valetabu era a tekivu mai vei koya. Eda na tara tikoga na veivaletabu ka kacivaka na kena tara na ka vovou, ni sa kovuti vuravura tiko yani na itukutuku tomani tiko ni Veivakalesui mai.
Na dina vakalesui mai, vakabibi na dina eda vulica mai na cakacaka vakalotu ni valetabu, e vakaibalebale kina na bula ka solia vei keda na kaukauwa me vukei keda ena noda ilakolako tawamudu.
Vakayacora me Tiki ni Nomuni Bula na Valetabu
Ena dredre beka vei iko mo vakasamataka ni dua na ka o rawa ni cakava nikua ena vakayacora e dua na veisau levu ena veiyabaki mai muri se ni oti sara mada ga na bula oqo. Ia nanuma tiko na ilakolako tawamudu o sa tiko kina. Ni ko sa papitaiso ka vakadeitaki, o sa vakayaco kalawa bibi ena ilakolako oqo.
E rawa ni o vukei ira era sa mate me ra toso ki liu ena nodra ilakolako ena nomu la‘i papitaiso ka vakadeitaki ena vukudra ena valetabu. Au a cakava oqo ena vuqa na gauna ni‘u a se tiko ena nomuni yabaki. Au nanuma ena dua na gauna ni‘u a papitaiso ena vukudra e sivia e 60 na tamata. Au sega ni rawa madaga ni taura dei na noqu icegu ena maliwa ni veipapitaisotaki!
Kevaka e tiko na madigi mo lako ki na valetabu, vakayacora sara! Mo dau lako wasoma ena kena levu ga o rawata. Yalovinaka kakua ni vesuki ena veika e rawa ni taura e levu na nomu gauna ka vagolei iko tani mai na veika e dina ka tawamudu. Kevaka mada ga o tiko vakayawa mai na dua na valetabu, vakanamata ka vakarautaki iko ena gauna oqo mo kilikili mo curuma na valetabu.
Vakavakarau Oqo ki na Nomu Veivakalougatataki ni Valetabu
E dua vei ira na imatai ni cakacaka vakalotu ni valetabu o ciqoma me baleti iko sa ikoya na edaumeni. Oqo e dua na isolisoli ni kaukauwa vakamatabete sa vakarautaki tu vei ira kece na luve ni Kalou. Eda rawata na kaukauwa oqo ena noda ciqoma na cakacaka vakalotu ka maroroya na veiyalayalati eda cakava ena valetabu ena veisiga yadua ni noda bula.
Sa rawa mo vakavakarau ki na nomu edaumeni kei na cakacaka vakalotu tale eso ni valetabu ena nomu vakasamataka vakatitobu, masulaka, ka vulica na veika me baleta na valetabu. Kevaka e rau a lako ki na valetabu na nomu itubutubu se tubumu, veitalanoataka kei iratou na kena veivakalougatataki lagilagi. Ena vukei iko talega na nomu bisopi kei ira na iliuliu tale eso. Au nuitaka talega ni ko na kunea eso na itokani vinaka me ra tokoni iko. Ko na vakavinavinaka ni sa yaco mai na siga mo lako kina ki na valetabu ka o sa vakarau tu mo ciqoma na yalayala totoka kei na veivakalougatataki e gadreva na Turaga me solia vei iko.
E Vakatavulici Ira na Nona Tisaipeli o Karisito, mai vei Justin Kunz
E Tomani Tiko na iLakolako
Na inaki ni bula oqo sa ikoya me da vakarautaki keda ki na kena e tarava. Na ituvatuva cecere nei Tamada Vakalomalagi e sega ni mai takali ena mate, baleta ni sega ni mate na yalomu. E toso tikoga ki na vuravura ni yalo me tomana tikoga na vuli, veiqaravi, ka waraka na Tucake Tale. Oti, ena qai tekiduru na duru kecega ka vakatusa na yame kecega ni o Jisu e Karisito (raica na Aisea 45:23). Ena vuku ni Nona Veisorovaki kei na Tucake Tale, ena duavata tale na yagoda kei na yaloda, ka na tomani yani na noda ilakolako ki na veigauna tawamudu. Sa na dua dina na veivakalougatataki lagilagi vei keda kece sara oya!
Ni sa tukuni ka vakayacori na veika taucoko, na veika kece e tawamudu na kena yaga kei na kena bibi e vakanamata ki na bula kei na ilesilesi i Jisu Karisito. Ena tubu na nomu kila-ka kei na nomu vakabauti Koya ni o veiqaravi ena valetabu. Ko na vakila na Nona loloma tawayalani vei iko ka vakila na reki kei na kaukauwa vakayalo ena nomu bula taucoko.