Eso na Ka Cecere

Mai vei David A. Edwards

Mekasini ni Lotu

E dau yaco ni veika lalai ka rawarawa era sa ka levu sara.

Da kaya mada ni tiko e dua na nomu leqa ni bula vakayago ka na sega ni yali rawa. E dua e tukuna vei iko me baleta e dua na tamata e rawa ni vakabulai iko. E tiko sara vakayawa o koya, ia mo volavola vua ka qai lako kina me rawa ni o raici koya ka rogoca na veika e tukuna.

Ni o yaco yani ki nona vale, a lako mai na nona ivukevuke ka kaya ni tukuna o nona boso mo lako isili ena dua na uciwai voleka ga.

E vuki lesu o ivukevuke, ka o biu tu mai ena yalorarawa. O nanuma, “Au lako sara mai ki ke me baleta ga na ka oya?”

Veika e Namaki

Oqo na ka e yaco dina vei Neamani. O koya e dua na turaganivalu ni Siria—e dua na turaga rokovi ka levu tu na nona itavi. Ia a tauvi vukavuka, e dua na mate rerevaki ni kuli ni yago.

E dina ga ni a sega ni Isireli, a rogoca o koya me baleta na parofita o Ilaisa mai vua e dua na goneyalewa italai gone ni Isireli. E vakabauta o Neamani na nona ivakadinadina baleti Ilaisa kei na Kalou ni Isireli. A mani lako me raici Ilaisa. Ni sa yaco yani o Neamani ki na itikotiko nei Ilaisa, a tala yani o Ilaisa e dua na italai, ka tukuna vei Neamani me la‘i sili vakavitu ena uciwai na Joritani me vakabulai.

A cudru ko Neamani. A raitayalotaka tu o koya ni na sota kei Ilaisa ka na tabaka na ligana ko Ilaisa ena tiki ni yagona tauvimate, masuta na Kalou, ka vakabulai koya ena cakamana. E nanuma o koya ni levu sara na uciwai e vinaka cake mai nodratou a rawa ni sili kina.

A vuqa sara na nona vakanuinuio Neamani. E namaka o koya me lako yani o Ilaisa ka raici koya. Oqo beka e baleta ni a taura tu e dua na itutu cecere o Neamani ka sa matau vua me dau rokovi. A namaka talega o koya me a wali na nona leqa ena cakamana veivakurabiutaki mai na kena a soli vua. E rairai yaco oqo baleta na italanoa a rogoca me baleti Ilaisa. Sa mani yalorarawa o koya ena veika e a yaco.

Yalomalua

Ia na italanoa kei Neamani e sega ni cava e kea. E dua vei ira na nona italai a solia vua eso na ivakasala vuku:

“Kevaka sa vakarota vei iko e dua na ka levu na parofita, ko na sega li ni cakava? sa dodonu vakalevu cake, ni sa kaya vei kemuni, Mo sili, ka ko na savasava?” 2 Tui 5:13

Sa qai kila o Neamani ni sa dina na tamata oqo. Kevaka e a kerea vua na parofita me cakava e dua na ka levu, ena cakava o koya. Na cava me sega kina na ka rawarawa? A vakayalomalumalumutaki koya. A savai koya vakavitu ena uciwai na Joritani ka sa vakabulai.

Na Veika Lailai ka Rawarawa

Ena so na gauna e rawa ni kerea na Turaga e dua na tamata me cakava “e dua na ka levu.” Ia e sega ni dau vakaoqori e veigauna na cakacaka ni Turaga. Ena vuqa na gauna e dau vakayagataka o Koya na “veika lalai ka rawarawa” me kauta mai na “veika lelevu” ena noda bula (Alama 37:6).

Ena so na gauna na veika eda namaka se na noda qaciqacia e dau vakavuna me da nanuma ni sala ni Turaga sa rui rawarawa se lailai me kilikili kaya na noda gauna (raica na 1 Nifai 17:40–41). Ia na Turaga e rawa ni vukei keda me da vorata rawa na yalo vakaoqo ka vakayalomalumalumutaki keda. E lomani keda o Koya ka vinakata me vakalougatataki keda ka vukei keda me da vakataki Koya vakalevu cake (raica na Mosese 1:39).

Oqo e vica na ivakaraitaki ni veika lalai ka rawarawa e kerea na Turaga me da vakayacora ka me da toro voleka yani kina Vua ka ciqoma na Nona veivakalougatataki.

Masu ka wilika na ivolanikalou e veisiga (raica na 2 Nifai 32:3, 9).
Ni ko sa ivalavala ca, veivutuni (raica na Vunau kei na Veiyalayalati 1:31–32).
Lakova na lotu ka vakaivotavota ena sakaramede ena veimacawa (raica na Moronai 6:5–6).
Saumi ikatini (raica na Malakai 3:8–10).
Muria na Vosa ni Vuku (raica na Vunau kei na Veiyalayalati 89).
Dau dina (raica na Vunau kei na Veiyalayalati 51:9).
Dau yalo loloma (raica na Efeso 4:32).
Qaravi ira na tani (raica na Maciu 25:34–40).

Ena rawa beka ni o vakasamataka e levu tale na ka.

O koya gona, ni ko takosova mai e dua na ka lailai ka rawarawa, vakarorogo vinaka. E rawa ni dua na idusidusi ena ivolalailai Me iSakisaki ni iTabagone , eso na ivakasala ena dua na vosa ni koniferedi, se dua na ka a kerea vei iko na nomu bisopi mo cakava. Se cava ga, nanumi Neamani, ka cakava. Ena lailai beka, ia na veivakalougatataki ena cecere.