Sega tale ni Dua me Vakataki Iko

Mai vei David Dickson

Mekasini ni Lotu

A vakarautaki Esiteri na Turaga me baleta na nona cakacaka bibi, ka sa cakava tale tikoga o Koya me baleti iko.

Cakava e dua na ka ena gauna saraga oqo. Dua ga na ka e rawa! Sabica vata na ligamu e dela ni ulumu, vakacocowiriwiri, se kailavaka eso na vosa lialia me vaka na, “Au taleitaka na madrai jaina!”

Sa caka kece? Vinaka. O sa qai cakava oti ga e dua na ka e sa bera vakadua ni bau caka e liu. Me vaka na kena irogorogo matalia, se cava ga o cakava—kevaka sara mada ga o vakasamataka e dua na ka ia o sega ni qai cakava—e sa bera vakadua ni caka ena sala o ya ena itukutuku makawa taucoko. Sega ena vanua o tiko kina, sega ena gauna saraga oqo, ka sega mai vei iko.

Na vakatovotovo lalai oqo e vakatakilakilataka e dua na tikina bibi: e sega tale ni dua e vakataki iko, ka sega talega ni vaka na kemu ituvaki. E sega mada ga o iratou na tacimu. E vuravura taucoko, e sega tale ni dua e tu vua na veisemati vinaka ni nomu taledi, rawa ka, veitokani, matavuvale, isolisoli vakayalo, kei na rai ni tamata yadua.

Me vakataki Esiteri mai na Veiyalayalati Makawa, o sa rawata vakavinaka sara ena “dua na gauna vakaoqo” (Esiteri 4:14) me levu kina na revurevu vinaka ena nodra bula na tamata kecega o kila.

Sa tu na veika bibi mo vakayacora!

Mai na Luveniyali ki na Sucu Turaga

Ni o vulica na Veiyalayalati Makawa ena vula oqo me tiki ni Lako Mai, Mo Muri Au, o na vulica kina e dua na marama vakasakiti vaka Jiu ka yacana o Esiteri. Ena dua na gauna ni nona bula vagone, a luveniyali o Esiteri ka susugi mai vua e dua na lewe ni matavuvale voleka, o Moatekai. A tubu cake o koya ena dua na gauna era a tauri vakavesu kina mai na dua na matanitu tani na Jiu.

Ni goneyalewa luveniyali ka tiko ena dua na vanua tani, a sega sara beka ga ni bau tu ena nona vakanananu ni dua na siga ena yaco me ranadi. Ia oqori sara ga na ka a yaco (raica na Esiteri 2). A digitaki me watina na tui, o Easuerosi.

Ia ena dua na siga a sotava o koya e dua na bolebole rerevaki: o ira na tamata i Esiteri, o ira na Jiu, a vakasauri na basika ni kena rawa ni ra vakamatei. Na watina, na tui, ni oti na nona rogoca na nodra ivakasala na nona daunivakasala, a vakadonuya e dua na lawa me ra na vakamatei na Jiu taucoko ena loma ni koro levu oya ena dua na tikinisiga ena lewa o koya.

Era a lewe levu sara na tamata era tiko ena koro levu oya. Era a lewe levu talega na Jiu era tiko ena korolevu o ya. Ia e a dua ga na Ranadi Esiteri. Ka sa ikoya duadua ga na tamata e rawa ni cakava e dua na ka me tarovi kina na leqa oqo.

Me vakataki Ranadi Esiteri, e duabau ga o iko. Sai iko duadua ga e rawa ni o vakayacora na veika o rawa ni o cakava—na veika e gadreva na Turaga mo cakava. Na veika e rawa ni veimuataki ki na nodra vakabulai e vuqa na tamata.

Na iSau ni Masu

Vinaka vakalevu ni sega soti na madigi mo sotava kina e dua na ka rerevaki ka vakadomobula me vaka a sotava o Esiteri. Ia oya e sega ni kena ibalebale ni nomu inaki ni bula e sega soti ni bibi.

Me vakataki Esiteri ga, o sa tuberi ka vakarautaki mo sai iko vakataki iko ena gauna oqo. Ka na tomani tiko na vakavakarau oqori ni o muri Jisu Karisito. Sa rawa mo isau ni nodra masu e veisiga e vuqa na tamata.

E dina sara, ena levu sara mada ga ni taledi kei na rawa-ka e tu vei iko, e dau vinaka duadua mo kerea na veivuke vakayalo ni o lako voli me vakataki Esiteri.

Na Vakabauta, na Yalodina, kei Iko

E kila o Esiteri ni dodonu me tovolea me vakabulai ira na nona tamata. E kila talega o koya ni gadreva na ikuri ni vakabauta kei na veitokoni ni nona tamata ena nona vakasaqara na veivuke ni Kalou. “Dou lako, vakasoqoni ira vata na Jiu era tiko mai Susani, ka mo dou lolovaki au,” a kaya o Esiteri vei wekana, “mo dou kakua ni kana se gunu ena bogi se na siga,, ka bogi tolu: koi au kei iratou na noqu goneyalewa keitou na lolo talega; ia kau na lako vua na tui, ka sega ni vaka na lawa: ia kevaka au sa mate, au na mate ga” (Esiteri 4:16).

iVakatakilakila

Esiteri

Esiterimai vei James L. Johnson

Ni dau dredre na bula, era sa vuki vagumatua cake vua na Kalou o ira na yalodina. Sa gadreva o Esiteri na veivuke taucoko e rawa ni rawata. A sega walega ni gadreva na veivuke ena nona vakauqeta na watina me veisautaka na nona lewa, ia ena solia talega na nona bula ena nona lako yani vua na watina ni sega ni kacivi mai (oqori e veisaqasaqa kei na lawa).

O a toboka beka na nona yaloqaqa kei na vakabauta? E yaga sara me wiliki vakarua: “Kevaka au sa mate, au sa mate,” a kaya o Esiteri. Na veivosa qaqa vaka oqori e ratou a vakavoqataka o Setareki, Mesaki, kei Apeti-niko vua na Tui o Nepukanesa ni ra sega ni via sokalou ki na matakau koula ni tui.

Ena gauna mada ga e kaya kina me viritaki iratou ki na lovo ni bukawaqa ena nodratou talaidredre, e ratou kaya vakadoudou, “Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni bukawaqa, ia ena vakabulai keitou mai na ligamuni na tui.

“Ia ke sega, mo ni kila, koi kemuni na tui, ni keitou sa bese ni qarava na nomuni kalou, se vakarokorokotaka na matakau koula ko ni sa vakaduria” (Taniela 3:17–18, vakamatatataki).

“Ia kevaka e sega” ka “Kevaka kau sa mate, au sa mate ga” era sa itukutuku vakasakiti ni vakabauta. Na mataqali vakabauta kaukauwa vakaoqo e tiko se cava ga na kena icavacava. Na nona itovo qaqa o Esiteri e a yaco me veivakabulai kina vei ira na nona tamata! Io, e kila o koya mai na kena ivakatevu, me vakataki Setareki, Mesake, kei Apete-niko, ni me vaka ni sega ni dau vakadeitaki na vua ni digitaki ni vakabauta, na caka dodonu ena dau digidigi dodonu tikoga e veigauna.

Ena yaco beka ena so na gauna ena nomu bula ni na dredre na nomu digitaka e dua na salatu dodonu. E sega ni dua vei keda e galala mai na veivakatovolei dredre ni bula oqo. Ia eke talega o rawa ni digitaka mo vakataki Esiteri. Digitaka na ivalavala dodonu; laiva me qai muria mai na kena isau.

Me ivakadei, sa iko vakataki iko duadua ga—kei na nomu “gauna” mo cakava kina na vuravura me vanua vinaka cake sa ikoya saraga oqo.