“Kakua ni Rere, Sa Tiko Kei Kemuni na Turaga,” Me iSakisaki ni iTabagone, Jiulai 2022.
iOtioti ni Vosa
Kakua ni Rere—sa Tiko kei Iko na Turaga
Mai na dua na vosa ena koniferedi raraba ni Okotova 2018
Na rere e sega ni ka vou. Mai liu sara, na rere sa dau yalana na nodra ivakarau ni rai na luve ni Kalou. Ena 2 ni Tui, a tala na tui kei Siria e dua na mataivalu me toboka ka vakamatea na parofita o Ilaisa.
“A sa sou na tamata ni Kalou [Ilaisa] ena mataka, ka curu yani, ka raica, sa buku na druadrua ni koro e na ivalu kei na ose kei na qiqi-ni-valu. A sa kaya vua [Ilaisa] na nona cauravou, Isa, noqu turaga! a cava me daru cakava?” 2 Tui 6:15
O ya e vosa ni rere.
“A sa kaya [o Ilaisa], Kakua ni rere: ni ra sa lewevuqa era sa tiko kei kedaru, ka lewe lailai era sa tiko kei ira.
“A sa masu ko Ilaisa, ka kaya, Kemuni Jiova, mo ni vakayadrata mada na matana me rai rawa ko koya. A sa vakayadrata na matana na cauravou ko Jiova; a sa rai ko koya; ka raica sa oso na ulunivanua ena ose kei na qiqi bukawaqa, era tiko vakavolivoliti Ilaisa.” (2 Tui 6:16–17).
Ena tiko beka se sega na noda qiqi bukawaqa me mai kauta laivi na noda rere ka valuta na noda tevoro, ia na lesoni e matata. Sa tiko kei keda na Turaga, sa nanumi keda ka vakalougatataki keda ena sala e rawa duadua ga ni cakava o Koya.
Ke da sa gumatua ena nuitaka na Turaga kei na Nona sala, ke da sa cakava na Nona cakacaka, eda na sega ni rerevaka na toso ni vuravura oqo se lomaleqa kina. Sa wanonovi keda tiko na Turaga, kauwaitaki keda, ka tucake tu e yasada.